Krótkopowěsće (26.07.16)

wutora, 26. julija 2016 spisane wot:

Duchowny w cyrkwi morjeny

Rouen. Při nadpadźe na katolsku cyrkej njedaloko sewjerofrancoskeho města Rouena staj atentatnikaj dźensa 84lětneho duchowneho wosady moriłoj. Dalšeho zastajenca wonaj ćežko zraništaj. Policiju nadpadnikow zatřěli. Francoski prezident François Hollande je w běhu dnja městno atentata wopytał a „hrózbny teroristiski njeskutk“ zasudźił.

Krućiše wěstotne naprawy

Drježdźany. Reagujo na nadpady w Bayerskej je agentura Semmel Concerts wěstotne naprawy za Drježdźanske koncerty při Łobju přiwótřiła. Wopytowarjo měli so na konsekwentne kontrole při wrotach nastajić a toboły a nachribjetniki doma wostajić, kaž připowědźichu. Semmel Concerts zahaji tam pjatk rjad štyrjoch koncertow Rolanda Kaisera.

Miliony za slědźerski projekt

Krótkopowěsće (25.07.16)

póndźela, 25. julija 2016 spisane wot:

Mjenje njeskutkow na kěrchowach

Drježdźany. Ličba padustwow a njeskutkow wandalizma na kěrchowach Sakskeje woteběra. Kaž krajny kriminalny zarjad zdźěla, su prěnje poł lěta 126 tajkich njeskutkow zličili. Loni w samsnym času bě jich 209. Registrowana škoda so wot 70 000 na 20 000 eurow pomjeńši. Přičinu tohole wuwića njeznaja.

Ze strony wustupiła

Praha. Wšelakich nahladow w zwisku z politiku ćěkancam napřećo je čěska zapósłanča Kristýna Zelienková z liberalno-populistiskeje strony ANO wustupiła, kaž nowiny rozprawjeja. „Wona sej přeje, zo přiwozmje tři miliony ćěkancow“, je předsyda strony Andrej Babiš rozsud 41lětneje sarkastisce komentował. Babiš sam ćěkancow wotpokazuje.

Chmjel so derje radźił

Querfurt. Plahowarjo chmjela w Sakskej, Durinskej a Saksko-Anhaltskej móža so dosć dobrych žnjow nadźijeć. Po słowach prezidenta Zwjazka plahowarjow chmjela Jörga Kamprada liča z něhdźe 55 000 centnarjemi wunoška. Po dobrych žnjach minjenych lět su ratarjo lětsa płoninu za chmjel rozšěrili. Dźakowano dobrej płaćiznje na wikach je plahowanje rostliny wunošne.

Krótkopowěsće (22.07.16)

pjatk, 22. julija 2016 spisane wot:

Nuzowe zastaranje wobćežne

Frankfurt n. W. Nuzowa medicina po­dłu němsko-pólskeje mjezy ma njedostatki. Puće do přichodneje chorownje su častodosć předołhe, rjekny direktor Frankfurtskeho klinikuma Thomas Funk. Za krótši puć do chorownje na tamnym boku rěki pak pobrachuje kooperaciske zrěčenje. Němsko-pólske dojednanje je na kóždy pad trěbne, Funk potwjerdźi.

Rekordne žně hromaka

Podstupim. Telko hromaka kaž hišće ženje su lětsa w Braniborskej nažnjeli. Ratarjo nakałachu cyłkownje 19 600 tonow tuteje zeleniny. To je 27,8 procentow wjace hač loni, zdźěla tamniši statistiski zarjad­. Mnóstwo je zdobom rekord. Poprawom běchu plahowarjam skerje snadne žně wěšćili. Hromak plahowali su lětsa na 3 400 hektarach.

Kitesurfing dowoleny

Hamor. Kitesurfowarjo smědźa přichodnje tež Bjerwałdski jězor wužiwać. Sakska krajna direkcija je wodosportej na wotmjezowanym arealu přizwoliła, kaž dźensa rěkaše. Gmejna Hamor ma do toho wěstotne naprawy přewjesć a čaru markěrować. Kitesurfing je sport, při kotrymž mały parašut surfowarja po wodźe ćehnje.

Krótkopowěsće (21.07.16)

štwórtk, 21. julija 2016 spisane wot:

Vattenfall dale z minusom

Stockholm. Šwedski energijowy koncern Vattenfall je w 2. kwartalu lěta straty třoch miliardow eurow nadźěłał. Tež wobrot je dale woteběrał, kaž šef koncerna Magnus Hall dźensa ze Stockholma zdźěli. „Hospodarske połoženje wostanje niskich płaćinow miliny dla dale jara wobćežne“, wón rjekny. Hall chcył łužisku brunicowu wotnožku ručež móžno čěskemu koncernej EPH předać.

Spěchowanske srědki přepodała

Běła Woda. Sakska ministerka za socialne a škit přetrjebarjow Barbara Klepsch (CDU) je dźensa Běłowodźanskej wokrjesnej chorowni přizwolenje spěchowanskch srědkow nimale 1,5 milionow eurow za ponowjenje tamnišeje intensiwneje stacije přepodała. Twarske a techniske njedostatki wobstejaceje stacije maja so wotstronić.

Z truskalcami spokojom

Drježdźany. Sakscy ratarjo móža lětsa na dobre žně truskalcow zhladować. „Smy spokojom z kwalitu a mnóstwom“, měni předsyda krajneho ratarskeho zwjazka Sakski sad Gerd Kalbitz. Zliwki njejsu truskalcam tyli, přiwšěm bilanca spokojo. Kalbitz liči za Saksku z wunoškom něhdźe 3 000 tonow.

Krótkopowěsće (20.07.16)

srjeda, 20. julija 2016 spisane wot:

Wo imersiji so wobhonił

Pančicy-Kukow. Na swojim wčerawšim wopyće w klóštrje Marijinej hwězdźe zetka so šef sakskeje statneje kenclije dr. Fritz Jaeckel (CDU) z Janom Bartom. Jaeckel wobhoni so wo nazhonjenjach a wuspěchach dwurěčneho kubłanja po koncepće imersije, kiž bě Jan Bart před lětami na wusahowace wašnje nastorčił a kotryž dźensa wuspěšnje nałožuja.

Žane dowolowe lěty

Moskwa. Najwjetša lětanska towaršnosć Ruskeje Aeroflot je předań lisćikow za lěty do Istanbula a Antalyje přetor­h­nyła. Ruski lětanski zarjad bě to wu­kazał, dokelž ma połoženje w Turkowskej po wojerskim puču za njewěste. Lěty wottam do Ruskeje su porno tomu hišće móžne. Minjeny kónc tydźenja bě so 2 000 ruskich­ dowolnikow z Turkowskeje wróćiło.

Do jastwa na čas žiwjenja

Krótkopowěsće (19.07.16)

wutora, 19. julija 2016 spisane wot:

Biografija Brězana jako e-book

Budyšin. K 100. posmjertnym narodninam Jurja Brězana bě Ludowe nakładnistwo Domowina prěnju wobšěrnu biografiju wo jeho žiwjenju a tworjenju pod hesłom „Jurij Brězan – Leben und Werk“ wudało. Kniha prof. dr. Dietricha Šołty předleži mjeztym tež jako e-book. Skazać móža sej jón zajimcy we wotpowědnych internetnych wobchodach.

Čěska literatura ćežišćo

Lipsk/Praha. Awtorojo a nakładnistwa z Čěskeje maja na Lipšćanskich knižnych wikach 2019 w srjedźišću stać. Na to staj so čěski minister za kulturu Daniel Herman­ a direktor Lipšćanskich wikow Oliver Zille wčera w Praze dojednałoj. Wo detailach chcedźa hišće jednać, zrěčenje ma so klětu podpisać. Klětu budźe Litawska, lěto pozdźišo Rumunska ćežišćo Lipšćanskich knižnych wikow.

Zakoń tyje zahrodkarjam

Krótkopowěsće (18.07.16)

póndźela, 18. julija 2016 spisane wot:

Teslu do Kamjenca wabić

Palo Alto/Kamjenc. Sakska chce Teslu wabić, w Kamjencu zawod baterijowych bańkow twarić. Dokelž chce ameriski twarc elektroawtow w Europje inwestować, bě jemu sakski statny sekretar Hartmut Mangold při rozmołwach w Kaliforniskej Kamjenc namjetował, rozprawja MDR. Zasydlenje móhła Sakska z hač do 15 procentami spěchować. Tesla zhotowja jako jenički zawod e-awta z dosahom (Reich­weite) wjac hač 400 kilometrow.

Literarne myto Drježdźanjance

Drježdźany. Sakske literarne myto 2016 dóstanje Drježdźanska spisowaćelka Franziska Gerstenberg. 5 500 eurow hódne myto spožča 37lětnej za socialnokritisku twórbu „Tak dołho po tym – dawno hižo njewěrne“. To zdźěla ministerstwo za wuměłstwo w Drježdźanach. Gerstenberg běchu hižo wospjet wuznamjenili, mjez druhim lěta 2013 ze Lessingowym spěchowanskim mytom.

18 awtow wobškodźenych

Krótkopowěsće (15.07.16)

pjatk, 15. julija 2016 spisane wot:

Nowa serbska proza němsce

Drježdźany. Lětnje wudaće němskeho literarneho časopisa Signum wěnuje so druhi raz po lěće 2006 nowej serbskej literaturje. Dorothea Šołćina, Ingrid Hustetowa, Měrana Cušcyna, Hańža Wjeselic a Marion Kwicojc předstajeja swoje teksty. Benedikt Dyrlich, kiž bě wudawaćela Norberta Weissa podpěrował, je z basnju zastupjeny.

Bjez delanskeje gmejny

Ralbicy. Kaž běchu so čłonojo gmejnskeje rady Ralbicy-Róžant hižo na swojim zašłym posedźenju wuprajili, woni wčera w Ralbicach oficialnje wobzamknychu, so na zhromadnej přemysłowej přestrjeni zarjadniskeho zwjazka Při Klóšterskej wodźe njewobdźělić. Dokelž njeje znate, kotre wudawki gmejnje z toho nastanu, je radźićelam riziko přewulke so za přestrjeń pola Miłoćic angažować.

Nowe dźěłowe městna

Krótkopowěsće (14.07.16)

štwórtk, 14. julija 2016 spisane wot:

Žane zapławjenja njebyli

Budyšin. Za dźensa připowědźene móžne zapławjenja sylneho dešća dla su w Hornjej Łužicy wuwostali. Byrnjež so cyły dźeń dešćowało, rěki mnóstwa wody přiwzachu a njejsu přeběželi. Pegele, mjez druhim Klóšterskeje wody a Čornicy, drje postupichu hač do popoł­dnja wo něhdźe 30 centimetrow a dalše zdźěla wjace, wostachu pak pod alarmowym schodźenkom.

WWF přilubja myto

Berlin. Po najnowšim morjenju wjelka w Sakskej přilubja wobswětoškitna organizacija WWF 25 000 eurow za rozsudny pokiw na skućićela. Nimo toho žada sej WWF intensiwniše přesćěhanje skućićelow. Minjene tři lěta su w Němskej 18 wjelkow ilegalnje morili. Pola Biehaina w Zhorjelskim wokrjesu nańdźechu minjenu sobotu zatřělenu wjelčicu.

Kritizuja nowy zakoń

Krótkopowěsće (13.07.16)

srjeda, 13. julija 2016 spisane wot:

Akcije přećiwo internetnej hidźe

Lipsk. We wobłuku wšoněmskeje akcije přećiwo hidypołnym komentaram w interneće je policija dźensa w Sakskej wjacore bydlenja přepytała. Kaž rěčnica operatiwneho wotwobaranskeho centruma w Lipsku zdźěli, běchu tež bydlenja we wuchodnej Sakskej potrjechene. Slědźenja měrja so přećiwo 60 podhladnym w 14 zwjazkowych krajach.

Dalše sylne njewjedra

Waršawa. Wulke zliwki su minjenu nóc we Waršawje dwě staciji metro zapławili. Po nachwilnym zawrjenju móžachu jej zaso wotewrěć, rozprawja sćelak TVN24. Dwaj dnjej trajace njewjedra su pólsku stolicu dotal wosebje trjechili. Dróhi a pincy stejachu pod wodu. W měsće wudyri wobchadny chaos. Wichor je třěchi 170 domskich wobškodźił.

T-shirt škita žiwjenje

nawěšk

nowostki LND