Charlie Jahnke zaso w Běłej Wodźe
Łužiske lodohokejowe liški su so wo nawrót 26lětneho Charlieja Jahnki do Běłeje Wody postarali. 178 cm wulki a 90 kg ćežki srjedźny nadběhowar hraješe hižo wot 2016 hač do 2020 ze spěchowanskimi licencami Běłych mjedwjedźow Berlin a Düsseldorfskeje EG w módro-žołtym trikoće liškow. Jako rodźeny Berlinjan nawukny wón pola Běłych mjedwjedźow juniors hokej hrać. W hrajnej dobje 2016/17 debitowaše wón w DEL za Běłe mjedwjedźe Berlin kaž tež za Łužiske lodohokejowe liški w DEL2. Tři lěta pozdźišo woteńdźe Charlie potom k Düsseldorfskej EG a hraješe w samsnym lěće tež hišće hry za Běłowodźanow w DEL2. W lěće 2021 přidruži so wón na dwě lěće Nürnberger Ice Tigers. Skónčnje hraješe loni za mustwo Iserlohn Roosters. Cyłkownje absolwowaše dotal 254 partijow w najwyšej němskej lodohokejowej lize. Mjezynarodnje swjećeše wuspěchi z němskimi dorostowymi wubrankami U18, U19 kaž tež U20. Za němske narodne mustwo A steješe dwójce na lodźe.
Snadne dobyće za Kulowčanow
Njespokojacej testowej hrě
Sokoł Ralbicy/Hórki –
ST Porchow 1:1 (0:1)
Zestawa domjacych: Schöne, Schultz, B. Heidorn, Rawš, Matka, Mjechela, Šewc, L. Heidorn, Gloxyn, P. Šiman, Korjenk, Woko, Markus Šołta
Pjatk wječor testowachu so Sokoljo přećiwo mustwu z Porchowa, kotrež je loni dobre třeće městno we wokrjesnej lize wobsadźiło. Prěnju šansu po někak běrtlk hodźinje měješe młody Leonhard Heidorn. Wotzamkny akciju pak ze swojej słabej nohu a třěli pódla wrotow. Tež flanka Michała Matki na Filipa Šimana ničo ličomneho njepřinjese. Tohorunja pospytaj Stanija Šewca a Pawla Rachele wrota misnyštaj. Krótko do přestawki Ralbičenjo nadběhowarja w šěsnatce foulowachu a Neumann postajenu jědnatku wěsće we wrotach zaměstni (42.).
Wjele dobyćow w předkołach
Němske 3x3-basketbulistki su na swojej olympiskej premjerje direktnje wulki wuwołak sadźili. Mustwo wokoło Svenje Brunckhorst přesadźi so 17:13 přećiwo topfaworitej USA. Přichodny přećiwnik Brunckhorsta, Sonje Greinacher, Elise Mevius a Marie Reichert je Awstralska. W skupinskej fazy nastupi DBB cyłk přećiwo wšitkim zbywacym sydom wobdźělnikam. Najlěpšej mustwje skupiny stejitej wěsće w połfinalu, mustwa wot třećeho do šesteho městna hraja wo dalšej městnje.
Hižo dale w turněrje pokročowali su mužojo na wulkim polu. Němscy basketbulisća su mjenujcy hižo dočasnje štwórćfinale docpěli. Swětowy mišter swjećeše w Lille z 86:73 přećiwo Brazilskej druhe dobyće w druhej partiji. W poslednjej skupinskej hrě přećiwo Francoskej dźe wo skupinske dobyće.
Mjetarki Němskeje su nuznje trěbne dobyće docpěli. Po dwěmaj poražkomaj přewiny wubranka zwjazkoweho trenarja Markusa Gaugischa Słowjensku wutoru 41:22 a ma dźakowano prěnjemu wuspěchej w Parisu nětko zaso dobre karty w boju wo k.o.-koło.
Kónc tydźenja wuspěšny był
Minjeny kónc tydźenja wužiwachu trenarjo 1. a 2. mustwa SJ Chrósćicy, zo bychu zakłady za nowu hrajnu dobu połožili. Nimo štyrjoch treningowych jednotkow běštej tež testowej hrě za wobaj cyłkaj planowanej.
Po lochkim a lóštnym starće pjatk dopołdnja z turněrom w koparskim tenisu bě w druhej jednotce dnja wosebje wutrajnosć koparjow žadana. W dwojich skupinach podachu so chowancy Filipa Marka a Fabiana Hejduški do wokolnych wjeskow. Trenarjej staj štyri stacije přihotowałoj. Koparsku staciju na Chróšćan sportnišću, sprintowu a wutrajnu staciju při Chróšćan pomniku, staciju za atletiku při Worklečan sportowej hali a kupansku staciju w Hórčan skale. Po nimale 16 kilometrach a tři a poł hodźinach je wšitkich 26 koparjow cil w Chrósćicach docpěło. Wječor skónči so z turněrom FIFA we wjesnym młodźinskim klubje.
Na druhim dnju běštej dopołdniši trening a testowa hra za 1. mustwo we Wojerecach planowanej. Po rańšim běhu steješe wosebje taktika w srjedźišću treningoweje jednotki. Po wobjedźe podachu so koparjo do Wojerec.
Wojerowski FC – SJ Chrósćicy 2:0 (2:0)
Druha medalja za Němsku tohorunja złota
Michael Jung je druhu złotu medalju za Němsku w Parisu dobył. 41lětny jěchar z Horba přesadźi so ze swojim žrěbcom Chipmunkom přećiwo Christopherej Burtonej z Awstralskeje a britiskej europskej mišterce Laura Collett. Za Junga samoho bě to třeće olympiske złoto w mnohostronskim jěchanju. Triumf w mustwje bě sej do toho Wulko Britaniska zawěsćiła. Jako načolnik w cyłkownym hódnoćenju jednotliweho wubědźowanja startowaše Jung póndźelu jako posledni jěchar do parcoursa z cyłkownje dźewjeć zadźěwkami. Po sylnych předstajenjach w dresurje a w přezpólnym jěchanju bě jasne, zo w poslednjej disciplinje cil bjez zmylka docpěć dosaha.
Lukas Märtens je druhu medalju za němskich płuwarjow snadnje zapasł. W finalu płuwanja 200 m w swobodnym stilu bu 22lětny pjaty. Złoto docpě Rumun Dawid Popovici.
Nimale runje tak wusko bě za slalom-kanuta Siderisa Tasiadisa. Són wo třećej medali při olympiskich hrach so dočasnje skónči. Augsburgčan docpě w kanadier-finalu štwórte městno. 24 stoćinow pobrachowachu na bronzu. Dobyće zawěsći sej Francoz Nicolas Gestin.
Třeći běh wo lětuše Němske dumperowe mišterstwo DDM je ...
W lěsnej kupjeli bičwolejbul hrali
Energija na generalce so blamowała
FC Energija Choćebuz –
Hannover 96 II 0:3 (0:2)
Energija Choćebuz: Bethke – Hasse (46. Bretschneider), Slamar (46. Kaizer), Campulka, Rorig, Hofmann (46. Möker), Putze, Cigerci, Proničew, Hajrulla (62. Shcherbakovski), Krauß (46. Halbauer)
slěd wrotow: 0:1 Chakroun (4.), 0:2 Besuschkow (15.), 0:3 Sanne (57.)
Kajke to přesłapjenje za fanow FC Energije wosom dnjow do prěnjeje hry w třećej lize. Přećiwo druhemu zastupnistwu Hannover 96, kotrež bě kaž Energija skok do 3. ligi docpěło, dožiwichu njepřijomnu domjacu poražku 0:3. Hosćo pokazachu agresiwnu a ofensiwnu hru a njedachu Energiji šansy za porjadny natwar hry. Nimo toho pokazachu so staroznate wotwobaranske słabosće. Za Delnjosaksow bě lochko Łužičanow přez wysoke hrajne tempo kompletnje z hry wzać. Po 0:2 (15.) přińdźeštaj jeničce Jonas Hofmann a Tim Campulka z hłójčkowanym bulom w 36. min. wrotam bliže.
W druhim wotrězku běštej jenož direktnej wólnej kopaj Henryja Roriga a Cigercija naspomnjenjahódnej. Wobaj pak swój cil misnyštej. Zaměnjeny Phil Halbauer pozdźišo swobodnje stejo bul prawje njetrjechi, tak zo wosta tež tuta mała móžnosć njewužiwana.
Złoty start do olympiskich hrow za Němsku
Pjatk zahajichu so lěćne olympiske hry 2024 w Parisu z jednej z najlěpšich zahajenskich swjatočnosćow hdy. Fachowcy samo wo tym rěčachu, zo bě to najlěpša wotewrjenska ceremonija w stawiznach olympiskich hrow. Po tym, zo někotre discipliny kaž kopańca, mjetańca a rugby, časa dla hižo srjedu a štwórtk do wubědźowanjow startowachu, započinaše so potom sobotu tež za zbytne discipliny olympiske hry. A tak wudoby sej Němski olympiski cyłk hnydom na spočatku swoju prěnju złotu medalju. Lukas Märtens je so sobotu wječor wo prěni złoty wysk w němskim lěhwje postarał. 22lětny Magdeburgčan rozsudźi wubědźowanje přez 400 metrow w swobodnym stilu w 3:41,78 mjeńšinach za sebje a krónowaše so k prěnjemu němskemu olympiskemu dobyćerjej w płuwanskim basenku po Michaelu Großu 1988. W žónskim wubědźowanju płuwaše Isabel Gose jako pjata do cila.
Tež za němske mustwowe sportowe družiny bě to wuspěšny kónc tydźenja. Nimale wšitke cyłki su z dobyćom w swojich wotpowědnych skupinach startowali.
