Šulerjo druhim rady pomhaja

wutora, 23. januara 2018 spisane wot:

Minjeny kónc tydźenja je so sto šulerjow srjedźnych a wyšich šulow a gymnazijow Sakskeje, tež z Budyšina, w Schönnewitzu pola Mišna schadźowało. Tam woni rozsudźichu, komu chcedźa lětsa we wobłuku akcije „genialnje socialnje“ z pjenjezami pomhać.

Budyšin (SN/mwe). Štyrnaty króć wotměje so lětsa w Sakskej, tež w Budyskim wokrjesu, akcija „genialnje socialnje“. Mjez wobdźělnikami budu znowa holcy a hólcy wot 7. lětnika z Kulowskeje šule, Wojerowskeho ewangelskeho gymnazija Johanneum, Kamjenskich šulow kaž tež z Budyskeho Serbskeho gymnazija.

Hižo nětko přihotuja so kubłanišća na akciski dźeń, kotryž přewjedu 21. junija w zawodach a mjeńšch fimach, w institucijach a chorownjach runje tak kaž pola ludźi doma. „Je přeco zaso wobdźiwanjahódne, kelko młodych ludźi so na tym wobdźěla, swój čas wopruje a aktiwnje sobu skutkuje, zo bychu druhim pomhali. Wšako dźe wo to, žiwjenske a kubłanske wuměnjenja w globalnym juhu, ale tež njeposrědnje před domjacymi durjemi, pozitiwnje změnić“, wuzběhnje Jana Sehmisch, programowa wjednica akcije „genialnje socialnje“.

Chorownja swj. Jana z nowej staciju

wutora, 23. januara 2018 spisane wot:

Wjacore nowosće maja spočatk lěta w Kamjenskej chorowni maltezow. Nimo­ přemjenowanja stacijow wote­wru w februaru nowu staciju za pacientow, kotřiž jenož krótki čas w hojerni přebywaja. Zdobom poskića dušepastyr domu młodym maćerjam a nanam w kapałce žohnowanski paćer.

Kamjenc (SN/mwe). W Kamjenskej chorowni swj. Jana přeproša dušepastyr Vincenc­ Böhmer swójby, staršich z dźěćimi, pjatk, 26. januara, w 16 hodź. do kapałki domu na žohnowanski paćer. Tež tym, kotřiž sej dźěćo přeja, je dušepastyr rady poboku a chce so z nimi na samsnym městnje chorownje srjedu, 7. februara, we 18 hodź. modlić. „Dźěći su často króna lubosćinskeho poćaha, ale puć k tomu móže jara wobćežny być“, so Böhmer­ w nowinskim wozjewjenju chorownje­ maltezow wupraja. Dale chcedźa staršich, kotrymž je so hakle nje­dawno dźěćo narodźiło, do paćerja za­přijeć a jich rady­ do kapałki witaja. Wězo móža so serbscy wěriwi a dalši zajimcy tež w swojej maćeršćinje modlić. Wšako je serbskosć w chorowni zadomjena.

W Smječkecach po puću byli

wutora, 09. januara 2018 spisane wot:
Mjeztym hižo 23. raz su minjenu sobotu Smječkečanscy hwězdni spěwarjo we wsy po puću byli. Lětsa zběrachu woni pjenjezy za potrěbne dźěci w Indiskej. Kóždolětny start je pola Hejduškec swójby, kotraž hižo wot wšeho spočatka akciju we wsy nawjeduje. Mysl, něšto dobre činić, ale tež krasne słónčne wjedro spožčištej dźěćom motiwaciju a wutrajnosć, wot ranja hač do popołdnja z małej wobjedowej přestawku wudźeržeć. Wjesele spěwajo móžachu tak tež swójbam posměwk mjezwoči skuzłać, kotrež so jim z darom a małej chłóšćenku podźakowachu. Wulke mnóstwo słódkosćow rozdźělichu pozdźišo mjez wobdźělnikami, zbytk wužiwaja za dźěćace swjedźenje, kaž na přikład za póstnicy. Foto: Alena Pašcyna

Zběraja pjenjezy za chude dźěći

pjatk, 29. decembera 2017 spisane wot:
Sobu jako prěni běchu hwězdni spěwarjo Wojerowskeje katolskeje wosady swjateje swójby srjedu w radnicy Wojerowskeho wyšeho měšćanostu Stefana Skoru (CDU) wopytali a sej pjenježne dary wuprosyli. Farar Peter Paul Gregor je spěwarjow přewodźał. Lětsa zběraja woni pjenjezy za chude dźěći w Indiskej. „Z pomocu darow chcemy tam šule a projekty podpěrać“, farar Gregor podšmórny. Foto: Martina Arlt

Hwězdni spěwarjo po puću

štwórtk, 28. decembera 2017 spisane wot:
Kaž po wšej Němskej su tež hwězdni spěwarjo Budyskeje tachantskeje wosady wčera dopołdnja započeli pjenjezy za dobry skutk zběrać. Wunošk je lětsa postajeny za naprawy přećiwo dźěćacemu dźěłu w Indiskej. Cyłkownje 50 dźěći chodźeše wčera po sprjewinym měsće, dźensa wopytachu wone wjacore socialne zarjadnišća, na přikład hladarnje starych. Kaž zamołwići akcije zdźěleja, změja hwězdni spěwarjo pjatk, 5. januara, přijeće mjez druhim w Budyskej radnicy kaž tež w krajnoradnym zarjedźe města. Tež w serbskich wosadach budu lětsa hwězdni spěwarjo po puću, w Chrósćicach wupósćelu jich sobotu, 6. januara. Foto: Carmen Schumann

Worklečanske čisło dale płaći

srjeda, 27. decembera 2017 spisane wot:

Tež přez swjate dny su sotry hladanskeje słužby maltezow swoje dźěło derje a dypkownje wukonjeli. Někotremužkuli, kiž žanych přiwuznych nima, zmóžnichu tak rjane hody.

Kamjenc (SN/mwe). Tójšto lět nawjeduje Marika Nowakowa hladansku słužbu maltezow, kotrejež sydło je nětko w Kamjenskej chorowni. Wona ma 47 kruće přistajenych, kotřiž so wo 260 pacientow staraja. Wšědnje jězdźa woni k hladanja potrěbnym w Kulowskej kónčinje, hač do Wós­linka a Běłeje (Biehla), dale do Bisch­heima a Porchowa. Wosebje pak so serbscy pacienća wjesela, hdyž móža w horjanskich abo delanskich wjeskach ze sotrami serbsce rěčeć. „To je jara wažne. Wšako smy to do kolebki połožene dóstali“, Marika Nowakowa praji. Tež w chorowni swj. Jana na to dźiwaja, zo móža so pacienća w swojej maćeršćinje zwuraznić, štož hojenju tyje.

Chori hody derje zastarani

pjatk, 22. decembera 2017 spisane wot:

Při wšelakich symptomach čisło 116 117 zazwonić

Budyšin (SN/mwe). Pod darmotnym telefonowym čisłom 116 117, po cyłej Němskej płaćiwym, pacienća njekomplikowanje zhonja, hdźe je najbliša kasowa lěkarsko-hotowostna praksa, druhdy tež jako nuzowa praksa woznamjenjena. We wotewrjenskich časach móža ludźo do tajkeje praksy tež bjez přizjewjenja přińć. Čuja-li pak so přechori, zo bychu hotowostnu praksu wopytać móhli, přijědźe lěkar tež k nim domoj. Hotowostny lěkar zastaruje nimo kasowych tež priwatnych pacientow. Zaplanować pak měli přez swjate dny tróšku wjace časa. Štó domjaceho lěkarja w času jeho hodowneho dowola zastupuje, wón swojim pacientam zdźěli.

Pomhaja z ćmy na swětło

štwórtk, 14. decembera 2017 spisane wot:

Beneficny koncert skupiny PoŠtyrjoch minjenu sobotu w Jaseńcy bě na dobro sebjepomocneje skupiny Xeroderma Pigmentosum. Jeje dźěło a jeje zaměry je Tobias Bulank publikumej rozłožił.

Za nanajwjetši dźěl ludźi njeje ničo samozrozumliwišo, hač swětły dźeń pod hołym njebjom přebywać. Za něhdźe 50 hač do 80 ludźi w němskorěčnym rumje je to bjez škita njepředstajomne. Woni ćerpja pod genetiskim defektom, kotryž jim njedowola so bjez škita UV-pruham wusadźić, hewak schorja na kóžneho raka. Dźěsći Tobiasa Bulanka stej wobě wot tohole defekta potrjechenej. „To swójbne žiwjenje do teje měry poćežuje, zo dyrbimoj naju dźěsći kóžde ranje z wosebitej kremu namazać, wšudźe tam, hdźež je naha koža widźeć, potajkim ruce, mjezwočo atd. Nimo toho matej wonej specielnu drastu, kotraž jeju před pruhami słónca škita. Hdyž druhe dźěći na přikład na někajkim swjedźenju spěšnje raz z domu skoča, dyrbitej so naju dźěsći najprjedy dokładnje zdrasćić“, powěda wučer na Worklečanskej wyšej šuli.

Nowe kruchi a hudźbni hosćo

štwórtk, 14. decembera 2017 spisane wot:

Beneficny koncert w Jaseńcy je w mnohich protykach kruće zapisany

Je-li Jaseńca w zymskim času z awtami zaparkowana, pokazuje wšitko na to, zo je pola Rynčec zaso beneficny koncert skupiny PoŠtyrjoch. Tajkich pomocnych zarjadowanjow kaž minjenu sobotu je runje w adwenće wjele. Wosebitosć Jasčanskeho pak je jeho ryzy serbski charakter, čehoždla je to mnohim kruty termin w běhu lěta. Hižo hdyž Florian Rynč a jeho mandźelska wopytowarjow wutrobnje witataj, čuješ so kaž doma. „Wězo je to z tójšto dźěłom zwjazane. Ale činju to woprawdźe rady. A nimo toho mam swojich pomocnikow“, angažowany Jasčan měni. Kaž doma so tež čuješ, hdyž pola Rynčec mnohich znatych zetkaš, kotřiž su tohorunja swěrni přiwisnicy beneficneho koncerta.

Zabawjeli so a pomhali

póndźela, 11. decembera 2017 spisane wot:

Wjele připóznaća za koncert skupiny PoŠtyrjoch a jeje přećelow

Jaseńca (SN/MWj). Kopatej połnej běštej garaža a před njej stan na Rynčec statoku w Jaseńcy, hdźež staj Florian Rynč a spěwna skupina PoŠtyrjoch sobotu wječor mjeztym hižo sedmy raz beneficny koncert wuhotowałoj. Program skićeše dobru měšeńcu mjez znatymi a nowymi pěsnjemi skupiny, w kotrejž skutkuja Krystof a Jan Rjeda, Beno Hojer a Marek Rjelka. Tak dožiwi po tradicionalnym spěwnym zaćahu titl „Po štyrjoch žno je“ swoju premjeru. Tekst na znatu melodiju Marianny Rosenberg spisał bě Jan Rjeda. Z jeho pjera pochadźeja tohorunja linki znatych spěwow kaž „Do piwa dam“ abo „Jurij“. Z hosćom bě lětsa Sorbian Art Trio, wustupowace tónkróć jako štwórtka ze Symanom Hejdušku, Janom Brězanom, Symanom Handrikom a Jurjom Hantušom. Młodźi hudźbnicy zanjesechu instrumentalne runje tak kaž spěwne kruchi a přeprosychu publikum na wulki koncert pod hesłom „Trio a kumple“ 30. decembra w Radworskej „Meji.

nawěšk

  • 21. jolka-swjedźeń w Nuknicy je nimo. Štož zwostanje su dopomnjenki na rjany žortny a zabawny wječor w Nukničanskej Brězanec bróžni. Někotre impresije serbskeho wječora w Nuknicy, kotrež je naša fotografowka-wolontarka Hanka Šěnec zhotowiła, wam tule
  • Serbske Nowiny-LND-Tuchmacherstr. 27 02625 Bautzen: Jolka 12.01.2019
  • Serbske Nowiny-LND-Tuchmacherstr. 27 02625 Bautzen: Jolka 12.01.2019

nowostki LND