Budyšin. Wutoru po jutrach započnu w Budyšinje Center na Žitnych wikach přetwarjeć. Tam chcedźa dohromady 1,85 milionow eurow inwestować a tak serwisowy poskitk kaž tež přebywansku kwalitu za wopytowarjow polěpšić, zdźěli wjednistwo nakupowanišća. Parkowanski wobłuk dóstanje nowe barbne wuhotowanje a polěpšene wupisanje. Změnić chcedźa wjetše a mjeńše tafle w centeru, zo bychu kupcow wo serwisowych poskitkach lěpje informowali. Dale instaluja nowe sedźenske móžnosće za wotpočnjenje a nabiwansku staciju za smart­phony a tablety. Nimo toho po­nowja nuzniki a natwarja hrajkanišćo. W oktobru ma přetwar hotowy być.

Dźěłarnička za seniorow

Budyšin. Wosebje na seniorow wusměrjena je nowa dźěłarnička SAEK, kotraž zaběra so z wužiwanjom smartphonow a tabletow. Rozłožić chcedźa zawodowy system Android, za čo trjebaš konto pola Google, a kak swójski nastroj škitaš. Dźěłarnička wotměje so šěsć razow w meji, pak dopołdnja pak popołdnju. Wobdźělenje płaći 20 eurow. Zajimcy njech přizjewja so pod telefonowym čisłom 03591/ 464 177.

Błohašecy (SN). Kolesowarjam ze za­padnych kónčin Budyšina přichodnje puć do wokrjesneho města trochu wolóža. W Błohašecach planuja kolesowanski puć a chódnik podłu statneje dróhi S 100. Za njej je město tele dny přizwolenje spěchowanskich­ srědkow we wobjimje 526 000 eurow dóstało. Naprawa je dźěl projekta krajneho zarjada za dróhotwar a wobchad, kotryž planuje wutwar křižowanišća S 100 a S 107 a z tym zwisowacy kolesowanski puć wot Błohašec hač ke křižowanišću.

Nowa šćežka ma wobstejacy kolesowanski puć wot wotbóčki k přemysłownišću z Błohašecami zwjazać a dale hač ke křižowanišću wjesć. To budźe přede­wšěm tež na dobro šulerjow, kotřiž dóstanu so potom po wěsćišim puću hač k busowemu zastanišću. Tuchwilu dyrbja woni podłu hłowneje dróhi nóžkować.

Radźićeljo gmejny Łaz wo wužiwanju komunalneje pawšale diskutowali

Łaz (AK/SN). Lětnu pawšalu 70 000 eurow Swobodneho stata Sakskeje k zesylnjenju wjesneho ruma chce gmejna Łaz takrjec na dwaj dźělej rozkuskować. Kaž radźićeljo na swojim zašłym posedźenju wobzamknychu, wužiwaja 50 000 eurow za ponowjenje Łazowskeje pěstowarnje w nošerstwje Křesćansko-socialneho kubłanskeho skutka. 20 000 eurow ma na dobro jednotliwych wjesnych dźělow być, hdźež rozdźěla pjenjezy po ličbje wobydlerjow. Srědki móhli potom za mjeńše naprawy wužiwać. Wjesne rady dyrbja hač do 27. junija swoje namjety gmejnje zapodać. Při tym maja tež ideje wobydlerjow zapřijeć. Wo doskónčnym wužiwanju rozsudźi potom gmejnska rada­.

Worklecy (JK/SN). Za nowy Worklečanski hort při tamnišej šuli započachu so dźensa hłubokotwarske dźěła. Bager twarskeje firmy z Psowjow je tam prěnje kubikne metry pjeršće storkał. Po jutrach chce Róžeńčanska Sorabija z wysokotwarom pokročować. Runočasnje přihotujetej gmejna a twarski wotrjad zarjadniskeho zwjazka Při Klóšterskej wodźe dalše nadawki. Minjeny štwórtk přewjedźechu tam tak mjenowanu submisiju a wuhódnoćichu poskitki firmow za přichodne losy. Zapodali běchu firmy swoje kalkulacije za ćěsliske, blidarske a aluminijowe dźěła kaž tež za róštytwar a třěchikry­jerstwo. Rozsudźene wšak ze submisiju hišće ničo njeje. Najprjedy dźě ma Kulowski planowanski běrow Gumpert poskitki přepruwować a přirunać a gmejnskej radźe takrjec swojeho faworita po­ručić. Gmejnscy radźićeljo potom roz­sudźa, kotry zawod nadawk skónčnje dóstanje.