Přehladka hišće přistupna
Njeswačidło. Před 300 lětami bu stary hród w Njeswačidle twarjeny a barokny park załoženy. Hišće hač do reformaciskeho dnja 31. winowca je w Njeswačanskim domizniskim muzeju widźeć wosebita wustajeńca, kotraž tole kaž tež dalše twarjenja bliže předstaja. Něhdźe sto fotow a šěsć witrinow zbliži wopytowarjej tehdyše twary, tam so wotměwace podawki a swjedźenje a jich nětčiše wužiwanje. W jednej witrinje dopominaja fota a teksty na hońtwjerski pawiljon, kotryž bu wot lěta 1721 do 1725 twarjeny a kotryž běše w 19. lětstotku skład. W času hitlerskeho knjejstwa bě tam lěhwo muskich młodostnych dźěłoweje słužby a nětko je tam hižo lětdźesatki woblubowana młodownja. Wustajeńca je njedźelu popołdnju a přidatnje 31. winowca přistupna.
Holaski dwójce koncertuja
Zo by milina zaso tuńša była
W Kulowskej wodočisćerni dźěła nětko fotowoltaikowa připrawa
Kulow (AK/SN). Z fotowoltaikowej připrawu, kotraž wot septembra w Kulowskej wodočisćerni dźěła, nadźija so město zalutowanjow při wudawkach za milinu a z tym wolóženja wobydlerjow. Tole rjekny komornik Mathias Kockert na zašłym posedźenju Kulowskeje měšćanskeje rady.
Naprawa bě w hospodarskim planje měšćanskeho zawoda předwidźana. Wona ma rjedźenske procesy we wodočisćerni potuńšeć. „Runočasnje wotpowědujemy tak zaměram wuwićoweho koncepta města Kulowa. W naprašowanju wobydlerjow kaž tež w dźěłowych skupinach su ludźo prajili, zo měli so wobnowjomne energije spěchować.
Wosebitu kofejownju wotewrěli
Kulturna kofejownja w Njebjelčicach wotnětka měsačnje kóždu 1. a 3. sobotu popołdnju na zhromadne akcije přeprošuje. Wotewrjenje zašłu sobotu je wosebje młodych zajimcow přiwabiło.
Njebjelčicy (SN/MiR). W rumnosćach Njebjelčanskeje gmejny klinčachu sobotu popołdnju njezwučene zynki. Błuke bubnowanje je ludźi pohnuło pozastać a posłuchać. Štóž je rejowarja Drježdźanskeho Statneho činohrajneho dźiwadła wuhladał, je so dźiwał a rady posydnył. Sekoo Bamogo, wukubłany rejowar a profi za afriske reje, je z wuzrawjenymi choreografijemi połnych elementow tradicionalnych afriskich rejow, přitomnych na swoje wuměłstwo putał. Wosebje pak druhi dźěl jeho poskitka, w kotrymž dóńt swojeje swójby tematizowaše, je kedźbnosć publikuma wubudźił. Pokazujo na to, kak wažnej stej měr a mjezsobnosć ludźi, dopominaše wón na morjenje swojeho nana a z tym na přiběracy njeměr a wójny we wšelkich krajach swěta.
We wobłuku ekskursije k hatam wokoło Kupoje mějachu wopytowarjo ...
Krótkopowěsće (25.10.23)
Sakske wysoke šule požadane
Drježdźany. Sakske uniwersity, wysoke šule a powołanska akademija móžachu na spočatku zymskeho semestra ličby studijnych nowačkow zwyšić. Na 14 statnych wysokich šulach je něhdźe 15 000 młodych ludźi prěni raz studij nastupiło, 1 000 wjace hač loni. W powołanskej akademiji Sakskeje maja 1 569 nowych zapisanjow, loni bě jich 1 532.
Wupad wučby nadal wulki
Drježdźany. Wupad wučbnych hodźin na šulach Budyskeho wokrjesa je nadal wulki, zwěsća sakske kultusowe ministerstwo hladajo na druhe šulske połlěto 2022/2023. Najwjetši wupad 12,5 procentow je w spěchowanskich šulach. Něhdźe 10 procentow hodźin wupaduje na wyšich šulach, dźewjeć procentow na gymnazijach. Zakładne šule maja ze 4,3 procentami najnišu kwotu wupada. Hłownej přičinje stej zo nadal wučerjo a šulske rumnosće njedosahaja.
Nowy profil Kretschmera
Spěšne jednanje pomha
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (30).
Nazymske wěncy paslili
Inwestor projekt cofnył
Zmysłapołne wužiwanje bywšeje zakładneje šule zwrěšćiło
Běły Chołmc (AK/SN). Wot lěta 2010 je bywša zakładna šula „Fritz Kube“ w Běłym Chołmcu prózdna. Tu chcyše inwestor Daniel Scholze dowolowe bydlenja wutwarić. Tónle plan je nětko cofnył, kaž na naprašowanje zdźěli. Jako přičinu mjenuje wón dwě wuwići. „Na jednym boku je so hospodarske połoženje firmy Perplex Holding & Consulting jako inwestor tak pohubjeńšiło, zo smy nětko w saněrowanskim procesu. Na tamnym boku smy minjene lěta hižo tójšto inwestowali, mjez druhim do planowanja a do posudkow, w kotrychž dachmy pódu, wobchad, wohnjoškit a přirodoškit přepytać. Při tym jewješe so telko postajenjow a wobmjezowanjow, zo dźeń a bóle dwělowachmy, hač so projekt hospodarsce liči“, Daniel Scholze rozłoži.
Policija (24.10.23)
Awto pokradnjene a namakane
Budyšin. Paduši su so na Leibnitzowej w Budyšinje w nocy na njedźelu do wosoboweho awta typa Hyundaj zadobyli a z nim wotjěli. Wobsedźer móžeše pozdźišo swoje jězdźidło z pomocu techniki na parkowanišću při Schliebenowej zwěsćić. Tam steješe wone njezamknjene a njewobškodźene.
Na zwjazkowej dróze twarja
Delnja Hórka. Z poćežowanjemi nadróžneho wobchada dyrbja šoferojo hač do spočatka decembra na zwjazkowej dróze B 156 mjez Budyšinom a Delnim Wujězdom ličić. Tu kładu na wšelakich městnach tak mjenowane banketowe platy, zo bychu kromy puća stabilizowali. Twarske dźěła su w třoch wotrězkach předwidźane. Te su z Budyskeho směra přijěducy krótko před Delnjej Hórku kaž tež mjez Lěskej a Delnim Wujězdom. Z pomocu ample tam wobchad nimo twarnišća wjedu.
Informuja wo wobšudnikach
Budyšin. „Zjebanje při telefonje a druhe činki“ je hesło přichodneho serbskeho popołdnja župy „Jan Arnošt Smoler“ štwórtk, 26. oktobra, w 16.30 hodź. na žurli Budyskeho Serbskeho domu. Wo aktualnej temje zjebanja při telefonje, přez whatsapp abo mejlki budźetaj policistaj rozprawjeć. Wažne budu pokiwy, kak so najlěpje škitać. Zarjadowanje wotměje so w rjedźe přednoškow za čłonow Domowinskich skupin a towarstwow w župje kaž tež wšitkich zajimcow.
Přednošuje wo pućowanju
