Policija (16.01.19)
Zastojnikam hrozył
Wojerecy. Wjacori podružnicy Wojerowskeho bydlenskeho domu na Budyskej aleji su so póndźelu krótko do 23 hodź. pola policije hóršili, zo jedyn ze sobuwobydlerjow wótře hudźbu słucha a nócny měr myli. Na jich klepanje a klinkanje při bydlenskich durjach pak wón njereagowaše. Bórze na to stejachu policisća před bydlenjom 24lětneho a jeho napominachu, nócny měr druhich respektować. Po tym so młody muž najprjedy tež měješe. Lědma pak běchu policisća wotjěli, dyrbjachu susodźa znowa harowanja dla na Wojerowskim rewěrje zazwonić. Nětko chcychu zastojnicy krućišo zakročić a sterejopřiprawu sćazać. To pak so 24lětnemu scyła njelubješe, tak zo so wón z kapsnej lampu do policistow da. Jenička móžna reakcija bě, alkoholizowaneho muža sputać a jeho sobu na policajski rewěr wzać. Tam pola njeho zwěsćichu, zo měješe 1,98 promilow alkohola w kreji.
Wobjězdka wostanje zawrjena
Radwor (SN/MkWj). Radwor zhladuje za dwě lěće na 800. róčnicu wobstaća. To je wjesnjanosta Wincenc Baberška (CDU) na wčerawšim posedźenju tamnišeje gmejnskeje rady wozjewił. Zakład toho su slědźenja muzejownicy, Radworčanki Andreje Pawlikoweje. Wědomostna sobudźěłaćerka Serbskeho muzeja w Budyšinje bě w tachantskim archiwje wuslědźiła, zo bu Radwor 24. junija 1221 prěni króć w historiskim dokumenće Mišnjanskeho biskopstwa naspomnjeny. Tak maja Radworčenjo składnosć rozmyslować, kak chcyli jubilej woswjećić.
Posedźenje gmejnskeje rady zahajił je wčera Radworčan Ludwig Sachsa z krótkim widejowym přinoškom wo dźěle šulerskeho dźěłoweho zjednoćenstwa „drjewo“. Hižo wjele lět šulerjo pod čestnohamtskim nawodom Ludwiga Sachsy drjewjane ławki twarja a po wšej gmejnje nastajeja. Wobrazy dokumentowachu, kak šulerjo z pomocu formy betonowe sćežory sami kidaja. Při kóždej ławce připrawjeja metalowu taflu, kotraž pokazuje, zo su woni ławku twarili.
Mjez wobdźělnikami lětušeho festiwala dźiwadła a reje ...
Krótkopowěsće (16.01.19)
Festiwal ze swójskim piwom
Chrósćicy. Přihotowanski wuběrk folklorneho festiwala Łužica 2019 je so wčera zhromadnje z wobsedźerjemi a wobhospodarjerjemi wobdźělenych statokow w Chrósćicach na to dojednał, lětsa wosebite festiwalne piwo poskićeć. Dwě družinje běštej na wuběr. W nadawku zarjadowarjow budźe napoj w Lubiju warjeny, wobkrući čłon wuběrka Beno Šołta.
Poskića referendaram přiražku
Drježdźany. Referendarojo dóstanu tysac eurow přiražki, hdyž su zwólniwi na wjesnej šuli wuwučować. To je sakski statny minister za kultus Christian Piwarz (CDU) wčera na nowinarskej konferency w Drježdźanach wozjewił. W Zhorjelcu a Annabergu-Buchholzu nastawatej přidatnej wukubłanišći studijnych referendarow za zakładnu šulu.
Němska koło dale
Na łužiskich zahonach zaso kołpje přebywaja
Njeswačidło (SN/mwe). W Hornjej Łužicy stej kaž po cyłej srjedźnej Europje cyłe lěto dwě družinje kołpjow žiwej. To stej spěwaty (Singschwan) a horbikaty kołp (Höckerschwan). Přez zymu pak so jimaj dalša ptača družina rodu kołpjow a swójby kačich ptakow přidruža: małoróstny kołp (Zwergschwan). Tón k nam ze skandinawiskich kónčin abo tež sewjerowuchodnje z Ruskeje přileći. Zwěrjo swój bydlenski rum wopušći, dokelž su tam w zymje žiwjenske wuměnjenja njepřihódne.
Čas čakanja bórze nimo
Bywšu Chróšćansku pěstowarnju móža prjedy spotorhać hač myslene
Chrósćicy (JK/SN). Dobru powěsć móžeše Chróšćanski wjesnjanosta Marko Kliman (CDU) swojim radźićelam na jich zašłym posedźenju zdźělić. We wobłuku swojich informacijow wón rjekny, zo je so nastupajo něhdyšu Chróšćansku pěstowarnju na Budyskim krajnoradnym zarjedźe něšto hibało. Po naprašowanju gmejny, kelko lět je wona na spěchowanske srědki wjazana, dósta nětko konkretnu wotmołwu. Samo na sebi maja objekty, twarjene z pomocu spěchowanskich srědkow, 25 lět dołho stejo wostać. To by za pěstowarnju, kotruž běchu w lětomaj 2003 a 2004 natwarili, rěkało, zo so jeje hač do lěta 2028 přimać njesmědźa. Gmejna pak chce pěstowarnju rady spotorhać a teren za nowe zaměry přihotować. Na wotpowědne naprašowanje w zwisku z planowanym torhanjom pěstowarnje a skedźbnjejo na to, zo maja mjeztym nowu pěstowarnju, dóstachu z Budyšina dobru powěsć.
Radźićeljo zaběraja so z wopłóčkami
Policija (15.01.19)
Křiže nastajeli
Budyšin. 23 drjewjanych křižow, něhdźe 1,70 metrow wulke, su njeznaći minjeny kónc tydźenja na Budyskim Hrodźišku nastajeli. Na nje napisachu mjena ludźi, kotřiž běchu w zašłosći w zwisku z wukrajnymi wobydlerjemi žiwjenje přisadźili. Po wuprajenju swědkow je policija jězdźidła a podhladne wosoby zwěsćiła.
Dźěl njewobydleneho domu na Budyskej Hornčerskej je so wčera ...
Krótkopowěsće (15.01.19)
Iniciatiwa dyrbi so radźić
Flensburg. Iniciatiwa Minority SafePack wo zlěpšenje prawow narodnych mjeńšin wostanje ćežišćo skutkowanja FUEN. Předewšěm měri so organizacija na wólbny bój za EU-parlament, zdźěli jeje prezident Loránt Vincze. Schleswigsko-holsteinski ministerski prezident Daniel Günther (CDU) je dalšu pomoc přilubił a wuzběhnył, zo dyrbi so iniciatiwa radźić.
Młodźinska wobora dźesać lět
Ralbicy. Křesćan Janca je nowy naměstnik nawody Ralbičanskeje wohnjoweje wobory. Na njedawnej hłownej zhromadźiznje přesadźi so wón přećiwo třom dalšim kandidatam. Nawoda wobory Achim Měrćink přednjese statistiku lońšich zasadźenjow a informowaše wo přichodnych terminach. Tak hotuja so na dźesaćlětne wobstaće młodźinskeje wobory. Přijimali su nimo toho dweju noweju čłonow.
Posledni nutřkokrajny lět
