Budyšin. Na Hłownym torhošću a na Bohatej hasy swjeća zajutřišim, njedźelu, Budyski nazymski swjedźeń. Wot 13 do 18 hodź. su wobchody wočinjene. Nimo toho budźe mała přehladka domjaceho skotu Helmec ratarskeho zawoda z Jitka widźeć. Na Hłownym torhošću móža so dźěći na słomjanych walčkach wucychnować. Tež live-hudźba zaklinči. A na Bohatej budźe 190 metrow dołha kofejowa tafla spřihotowana.
Nowy termin dźěłarnički
Žuricy. Swoju rězbarsku dźěłarničku wo serbskich bajach planuje Spěchowanski kruh za serbsku ludowu kulturu 26. a 27. oktobra pola rězbarja Alojsa Šołty w Žuricach. Wobdźělenje płaći pjeć eurow za dźěći a młodostnych, 20 eurow za dorosćenych. Drjewo přewostaji rězbar, trěbny grat njech sej kóždy wobdźělnik sam sobu přinjese. Zajimcy maja so hač do 19. oktobra pod telefonowymaj čisłomaj 03591/ 550 108 (wotmołwjak) abo 0172/ 916 94 55 (Alojs Šołta) abo e-mailnje pod přizjewić.
Nazymski koncert z kofejom
Chrósćicy (aha/SN). Přetwar bywšeje Chróšćanskeje srjedźneje šule na gmejnske a kulturne srjedźišćo budźe dróše, hač bě dotal planowane. Tole rozłoži architekt Marko Dźisławk gmejnskim radźićelam na jich wčerawšim posedźenju. Spočatnje bě za přetwar 260 000 eurow předwidźanych. Z toho dóstachu mjeztym 170 000 eurow spěchowanja přizwolenych. Po wupisanju wjacorych losow dóšłe poskitki rjemjeslniskich zawodow pak kalkulowanu sumu přesahuja. Nětko je wotwidźeć, zo dyrbi gmejna swójskemu podźělej 90 000 eurow hišće 30 000 eurow přidać. Dalše spěchowanske srědki hižo njedóstanje. Zamołwita za financy Chróšćanskeje gmejny w zarjadniskim zwjazku Při Klóšterskej wodźe Franciska Čapikowa pak widźi móžnosć, kak přidatne wudawki w etaće wurunać.
Zhorjelc (AK/SN). Žitawska wuskokolijata železnica, kotraž Jonsdorf a Oybin zwjazuje, turizm w regionje wobohaća a je zdobom wažny hospodarski faktor. Tole podšmórny Žitawski wyši měšćanosta a radźićel Thomas Zenker (Zittau kann mehr e.V.) na njedawnym posedźenju Zhorjelskeho wokrjesneho sejmika. W lětach 2005 do 2017 móžeše Sakska hornjołužiska železniska towaršnosć (SOEG) ličbu sobujěducych podwojić. Wot něhdźe 100 000 pasažěrow rozrosće wona loni na 214 000. „Tuchwilu bilancujemy sumu 13,1 miliona eurow. Lětny wobrot wotpowěduje 3,6 milionam eurow“, rjekny jednaćel SOEG Ingo Neidhardt. „Poskićamy tež přenocowanja w Jonsdorfje a Oybinje, štož 90 000 eurow wobrota wob lěto wunjese.“
Zhorjelski wokrjes ma z 69,9 procentami hłowny podźěl na wuskokolijatej železnicy. Dalše podźěle maja město Žitawa (7 procentow), gmejna Olbersdorf (9,8 procentow), gmejna Oybin (6,3 procenty), gmejna Jonsdorf (6,3 procenty) a gmejna Bertsdorf-Hörnitz (0,7 procentow). Ze zaměrowym wobchadnym zwjazkom Hornja Łužica-Delnja Šleska (ZVON) je SOEG hač do lěta 2023 wobchadne zrěčenje podpisała.
Šiman znowa direktny kandidat
Budyšin. Marko Šiman požada so znowa jako direktny kandidat CDU we wólbnym wokrjesu 56 za klětuše wólby Sakskeho krajneho sejma. 69 čłonow CDU je jeho wčera na wólbnowokrjesnym zarjadowanju w Hrubjelčicach z 98,5 procentami hłosow wuzwoliło. Šiman je wot lěta 1990 direktnje woleny krajny zapósłanc. „Chcu dale mosty twarić. Hornja Łužica trjeba perspektiwy do přichoda“, 63lětny wčera potwjerdźi.
Wobdźělnicy pomjenowani
Budyšin. Iris Brankačkowa (molerstwo), Michael Kruscha (molerstwo), kaž tež z młodeje generacije Frauke Rahr (film) a Hella Stoletzki (molerstwo) wobdźěla so na wustajeńcy za serbske wizuelne wuměłstwo trojoregionoweho projekta „Wobrazy krajiny“ 2019/2020 – Łužica-Korutanska-Koroška. Wo tym informuje dźensa Załožba za serbski lud nastupajo wutorny rozsud jury.
Póńdu Romojo wolić?
Paduši w firmje
Budyšin. 13 płunowych blešow z maćiznu za klimowe připrawy su njeznaći minjene dny z firmy na Drježdźanskej dróze w Budyšinje pokradnyli. Zawodej nasta tak škoda nimale 7 000 eurow.
Prěnje wodźenje pod hesłom „dźeń dźiwich zelow“ je zańdźenu sobotu na Žiwjenske kubło w Pomorcach zajimcow přiwabiło. Uwe Haspel bě zarjadowanje přihotował.
Pomorcy (CS/SN). Uwe Haspel běše jara spokojom z wothłosom na zarjadowanje. „Zańdźene měsacy sym wodźenja wo dźiwich zelach wospjet w Budyšinje poskićał, štož je stajnje wjele zajimcow přiwabiło. Tak so rozsudźich, wotpowědne zarjadowanje tež w Pomorcach přewjesć. Prawdźepodobnje pytaja mnozy ludźo móc z přirody jako wurunanje k industrielnje produkowanym žiwidłam a medikamentam.“
Kamjenej (BHR/SN). Štóž chce popołdnjo na Dnju němskeje jednoty na zajimawe, lóštne a powučne wašnje přežiwić, za toho je Kamjenej pola Radworja kóždolětnje dobra adresa. Mjez něhdźe 150 wopytowarjemi napřemoworanja wo najrunišu brózdu njeběchu wčera tuž jeno zajimcy z gmejny, ale tež ze zdalenišich wsow. Organizatorojo wurisanja pod nawodom Měrćina Bohota běchu zaso wšitko perfektnje spřihotowali. Tak je so tónraz cyłkownje pjatnaće traktoristow wubědźowało. Nowosć bě dźesać wulkich mašinow z dwěmaj radlicomaj. Zajimawe bě, zo jednaše so při nich zasadnje wo mašiny z časa do přewróta. Najstarši traktor firmy Zettelmeyer pochadźeše z lěta 1941.