Něhdźe 40 wobydlerjow Konjec a Šunowa poda so minjenu njedźelu na swój kóždolětny wulět z kolesami, organizowany wot Domowinskeje skupiny Konjecy-Šunow, do blišeje wokoliny. Zetkachmy so při Šunowskim haće. Starši, młódši, swójby a samostejacy nastajichu so zhromadnje na puć do Tradowa. Tam čakaše na nas swačina. K tomu předstajichu nam stawizny wsy. Po małym wokołopuću jědźechmy k Tradowskim hatam, hdźež kački, kołpje a rubježne ptaki lahnu.
Dalši puć wjedźeše do Sulšečanskeho młyna. Robert Brězan nas po swojim zawodźe wodźeše. Při tym njezhonichmy jenož wjele zajimaweho wo stawiznach młyna, ale tež wo dźensnišim wašnju dźěła w nim. Runje tak kaž wonka móžachmy so nutřka po wšitkich poschodach rozhladować. Bě to jara zajimawa hodźinka, předewšěm tež za naše dźěći. Dokelž bě wjedro tón dźeń runjewon lěćne, bě derje, zo nas wosobowe awto přewodźeše a nas z napojemi zastarowaše.
Krabatowej regionaj Žumberak w Chorwatskej/Słowjenskej a Łužica chcetej wušo hromadźe dźěłać. Tole podšmórny Monika Bračika, sobuzałožerka Krabatoweho towarstwa na chorwatskim boku, minjeny kónc tydźenja na wopyće we Wulkich Ždźarach.
Wulke Ždźary (AK/SN). Hosći ze Žumberakskeho regiona su minjeny pjatk na Biskopičanskim měšćanskim swjedźenju oficialnje witali. Samsny dźeń zetkachu so woni z čłonami Krabatoweho towarstwa na Helmec statoku w Jitku. Sobotu wopytachu Kulow a jeho cyrkej z Krabatowej taflu, Koćinski Krabatowy mlokowy swět, Čornochołmčanski Krabatowy młyn a Wulke Ždźary z Krabatowym wudworom. „Mjeztym je Krabat načolna figura za mnohe wuwića we Łužicy. Cyłu dimensiju ani hišće zapřimnyć njemóžemy“, rjekny Wolfgang Kraus, kiž wopytowarjow pola sebje hospodowaše.
Nowy předsyda
Budyšin. Prawiznik Hagen Döhl z Wojerec je nowy předsyda dohladowarskeje rady Budyskeje Ludoweje banki. Na posedźenju dohladowarskeje rady wuzwolichu jeho za naslědnika Reinharda Schleinitza, kiž bě staroby dla nawod gremija złožił. 52lětny Döhl je fachowy prawiznik za dźěłowe prawo a bě wot lěta 2002 městopředsyda dohladowarskeje rady.
Wito Sćapan nětko kanonik
Drježdźany. Biskop Drježdźansko-Mišnjanskeho biskopstwa dr. Heiner Koch je wčera w Drježdźanskej katedrali Budyskeho tachantskeho fararja Wita Sćapana za kanonika powołał. Powołany bu tež nawoda personalneho wotrjada ordinariata, farar Benno Schäffel. Dotalny kanonik farar Šćěpan Delan z Radworja je nětko čestny kanonik.
Josep Topol zemrěł
Chrósćicy/Smječkecy (TB/SN). W Budyskim wokrjesu su minjeny kónc tydźenja lětušu 48hodźinsku akciju přewjedli. Wjace hač 80 skupin – zwjetša młodostni a dźěći z podpěru staršich – je so gratu přimało a z łopaču, hamorom, seršćowcom a dalšim gratom swoju wjes porjeńšiło. Mjez skupinami běchu tež někotre serbske kaž z Radworja, Smječkec, Worklec a Chrósćic.
Chróšćanska skupina dźěći, młodostnych a staršich móžeše so lětsa nad mytom 250 eurow wot Budyskeje wokrjesneje lutowarnje wjeselić. Woni dóstachu pjenježne myto štwórtk na wotewrjenju akcije w Budyskim krajnoradnym zarjedźe z rukow krajneho rady Michaela Hariga (CDU). Na te wašnje mytowachu jich ideju, při Chróšćanskej pěstowarni zahrodku wutworić, kotruž móža pěstowarske dźěći za najwšelakoriše akcije wužiwać. W zahrodce maja nětko hotel za insekty, stan z witkow, wšelku strowu zeleninu a wězo tež truskalcowe rostliny.
Budyšin (SK/SN). Něšto stow dźěći, staršich kaž tež wowkow a dźědow dožiwi minjenu sobotu w Budyšinje rjany dźěćacy swjedźen. Měšćanscy radźićeljo běchu w Strowotnej studni hromadźe z towarstwom Majak a z Mjezynarodnym europskim klubom za dźěći požadarjow azyla, pózdnich wusydlencow a socialnje potrěbnych ludźi Mjezynarodnemu dnjej dźěsća wěnowane zetkanje přihotowali. Jich podpěrachu mnozy sponsorojo, mjez druhim Nukec napojownistwo a Wjenkec rěznistwo, kaž tež pilni pomocnicy.
Budyski wyši měšćanosta Christian Schramm (CDU) wupraji w postrownych słowach swoje wjeselo nad tym, zo je swjedźeń dobry wothłós našoł. „Wobliča wjesołych dźěći su iniciatoram a organizatoram najrjeńši dźak za nałožowanu prócu“, wón rjekny.
Cyły dźeń, prjedy hač njewjedro njejapki kónc nanuzowaše, sej dźěći hrajkachu, paslachu, šminkowachu so, pospytachu so w tomboli a dachu sej napoje a kołbasku słodźeć. Dźěćaca rejwanska skupina Majaka žněješe za mjezynarodny program rejow wjele přikleska.
Nosaćicy. Koleso z kólnje pokradnył je paduch njedźelu popołdnju w Nosaćicach (Nostitz) pola Wósporka. Najprjedy hrabny wón jedne bjez powětra. Te pak nabok połoži a wućahny druhe z kólnje. Jako to wobydlerka pytny, wona cuzeho narěča, na čož tón z kolesom ćekny. 56lětny wobsedźer a susodźa zhromadnje za paduchom spěchachu a 26lětneho skónčnje na pólnym pućiku mjez Nosaćicami a Žarkami (Särka) dosahnychu. Mjeztym informowana policija jeho nachwilnje zaja. Kriminalisća pad nětko dale přepytuja.
Łaz (AK/SN). Po móžnosći nazymu ma Łazowski šulski hat zaso z wodu pjelnjeny być. „Potom chcemy prěnje ryby wusadźić. Klětu nalěto móhli tam prěni raz wudźić“, podšmórny wjesnjanosta Udo Wićaz (CDU), zdobom prezident wudźenskeho zwjazka Elbflorenz (AVE) w njedawnej rozmołwje z wobydlerjemi. Zwjazk zastupuje 221 wudźenskich towarstwow mjez Budyšinom, Zhorjelcom a Mišnom.
We Łazu chcedźa šulski hat jako wučbny a wudźenski hat wuwić. Towarstwo Slěborny jězor chce jón za dźěło z dorostom wužiwać. Za to hat přetworja, štož AVE jako nošer naprawy ze 100 000 eurami financuje. „Spěchowanje dóstać by ćežko było“, rozłoži Wićaz, „tuž zwjazk projekt stoprocentnje sam płaći.“ Hat budźe přez rołu z Małej Sprjewju zwjazany. Po sylnym dešću móža wodu do rěki wotpušćić, w suchich časach pak wottam wodu do hata klumpać. Trěbna dowolnosć za to ma kónc julija předležeć, tak zo móhli w awgusće abo septembru twarić započeć.
Je z tradiciju, zo poda so chór Lipa jónu wob lěto na wulět ze swójbnymi. Je to zdobom mały dźak swójbnym, kotřiž nas spěwarjow a spěwarki na koncertach a při wšelakich akcijach přez cyłe lěto podpěruja. Druhdy zwjazamy wulět ze zwučowanskim lěhwom. Lětsa pak wuda so rjana składnosć sej do Kulowa dojěć. Towarstwo Bratrowstwo bě naš chór minjenu njedźelu na swój patronatny swjedźeń přeprosyło.