Za nuzny pad zwučowali
Budyšin (CS/SN). Přez ekstremnu suchotu zawinowane lěsne wohenje so w poslednim času kopja. Při hašenju maja so kameradojo wohnjoweje wobory husto z tym bědźić, zo dosć hašenskeje wody k dispoziciji njeje. Na tutón scenarij wusměrjene bě zwučowanje, kotrež wotmě so tele dny při Budyskim spjatym jězoru. Bě to zhromadne zwučowanje Budyskeho Techniskeho pomocneho skutka (THW) z tudyšej powołanskej wohnjowej woboru.
THW ma mjeztym 20 lět přewšo sylnu klumpu Hanibal, kotraž je kmana, 5000 litrow wody na mjeńšinu klumpać. Nimo toho maja čestnohamtscy sobuskutkowacy pola THW fałdate sudobja, kotrež móža 24 000 litrow wody přiwzać. Tute zběrniki, kiž wupadaja kaž kupanski bazenk na zahrodźe, so z pomocu hadźicow přez klumpu pjelnja. Wone słuža wohnjowej woborje jako składy při hašenju wohenja. K přirunanju: Tankowe hašenske jězdźidło wjedźe jenož 5 000 litrow wody ze sobu.
Dwurěčnosć sylnišo wobkedźbować
Wojerecy (AK/SN). Wot nalěća 2023 Wojerowsku Łužisku kupjel wobšěrnje saněruja. Kaž jednaćel Matthias Brauer předwčerawšim zdźěli, chcedźa lětsa w septembru 60 procentow wšěch twarskich dźěłow wupisać. Dohromady inwestuja 22 milionow eurow. Z toho financuja 90 procentow přez hornc za strukturnu změnu. Dźesać procentow zapłaći město.
Wot meje 2023 hač do oktobra 2024 wostanje kupjel zawrjena. Jenož płuwanski basenk hodźi so dale wužiwać. Wočerstwjenišćo dóstanje nowy zachod za kupjel a sawnu, nowy socialny wotdźěl za sobudźěłaćerjow a přidatny 25 metrow dołhi płuwanski basenk ze štyrjomi čarami. Jedna z nowych atrakcijow w nim budźe tak mjenowana wodowa crossowa čara za młodostnych.
Nimale wšo kaž přeco
Prěni test, z lisćikom za dźewjeć eurow z busom na dźěło jěć
Pančicy-Kukow/Budyšin. Ručež bě rozsudźene, zo móžeš wot dźensnišeho za dźewjeć eurow wob měsac z busami a regionalnymi ćahami jězdźić, je sej něchtóžkuli předewzał, tónle poskitk wužiwać a nic hižo z awtom, ale z busom na dźěło jězdźić. Žadyn smjerć wulki nawal pak dźensa rano zwěsćić njebě. Znajmjeńša na čarje 530 wot Pančic-Kukowa do Budyšina bě samo na sebi wšo při starym.
Krótko do tři štwórć na sydom čakachu w Pančicach jenož někotři šulerjo na bus. Tón měješe tři mjeńšiny zapozdźenja. Na přewjele sobujěducych pak to zaležeć njemóžeše. Dosć městnow bě hišće swobodnych. Swój lisćik za dźewjeć eurow sym sej před dnjomaj hižo na Budyskim busowym dwórnišću kupił a samo swoje mjeno na zelenu cedlu napisał. W busu wšak lisćik tohorunja předawaja.
Tójšto ludźi w Rogeńskim parku
Wojerecy regionej kruće poboku su
Město Wojerecy Krabatowemu towarstwo přistupi. To je měšćanska rada wčera z wjetšinu wobzamknyła. 14 radźićelow hłosowaše za přistup, wosom přećiwo tomu při třoch hłosawzdaćach.
Wojerecy (AK/SN). „Stejimy regionej kruće poboku, chcemy k tomu přinošować“, podšmórny wyši měšćanosta Torsten Ruban-Zeh (SPD). Krabatowe towarstwo je w tymle nastupanju hižo w nowembrje 2020 styki z městom nawjazało. Zhromadnu předrozmołwu mějachu lětsa 21. januara, nětko měli přistupić.
Měšćanska radźićelka Claudia Florian (CDU) so wobhoni, hač je přistup města trěbny. Wšako je marketingowe towarstwo „Region swójbow Wojerecy“ hižo z čłonom Krabatoweho towarstwa. Kak kryje so tajki přistup z konceptom za konsolidaciju budgeta, kotru nadhódnotu ma za město, chcyše wona wědźeć. Wyši měšćanosta skedźbni na sylny angažement towarstwa za dwurěčnosć a pěstowanje serbskeje kultury. Jako čłon Krabatoweho towarstwa móže město jenož přidobyć.
Krótkopowěsće (01.06.22)
Serbske medije tematizowali
Budyšin. We wobłuku dwudnowskeho workshopa Němskeho žurnalistiskeho zwjazka (DVJ) wo žurnalizmje w zadnim kraju wěnowaše so diskusijne koło dźensa dopołdnja dźěławosći serbskich medijow. Zarjadowanje wotmě so na wulkej žurli Budyskeho krajnoradneho zarjada. Wčera bě tudyši znaty fotograf Rolf Dvoracek wobdźělnikam přednošował.
Kocorowa biografija w němčinje
Budyšin. Publicistka Chrysta Měškankowa je dotal jeničku biografiju wo Korli Awgusće Kocoru z pjera Zbigniewa Kościówa, wudata lěta 1972 w Ludowym nakładnistwje Domowina, do němčiny přełožiła. Knižna premjera budźe njedźelu, 12. junija, na žurli Budyskeho Serbskeho muzeja. Nimo awtora a přełožowarki porěčitaj Měrko Šołta a wudawaćel noweje publikacije Matthias Donath. Serbski ludowy ansambl zarjadowanje z twórbami Kocora hudźbnje wobrubi.
Wuznamjenja čestnohamtskich
Hudźba, spěwy a mólby w baroknym hrodźe
Njeswačidło (ML/SN). W powołanskim žiwjenju steja na jewišću Choćebuskeho Statneho dźiwadła – spěwna a hudźbna skupina „Štyri Capriolojo“. Rady pak woni we wólnym času spěwno-hudźbny programy wuhotuja, kaž na mejskej njedźeli na baroknej žurli Njeswačanskeho Stareho hrodu. Ze „Štyrjomi Capriolemi“ zahaji so tam lětuši rjad hrodowych koncertow.
Wuměłcy z delnjołužiskeje metropole zanošowachu lóštne šlagry a šansony z lětow 1920 do 1940 z filmow UFA, z operetow a rewijow woblubowanych komponistow kaž Ralpha Benatzkeho, Freda Raymonda a Paula Abrahama. Za tajke tehdy woblubowane šlagry kaž „Wenn nachts die Sterne leuchten“, „Auf der Reeperbahn nachts um halb eins“ abo „Nur nicht aus Liebe weinen“ kaž tež za šansony, tehdy zanošenych wot nacijow wuhnatych interpretow, žnějachu „Štyri Capriolojo“ tež w Njeswačidle wjele přikleska.
Policija (31.05.22)
Kolesa pokradnyli
Lejno. Při Lejnjanskim jězoru běchu minjeny kónc tydźenja paduši kolesow po puću. W Lejnom (Geierswalde) su njeznaći w nocy na njedźelu dohromady tři kolesa typa Giant w cyłkownej hódnoće 3 500 eurow pokradnyli. Kolesa słušeja dowolnikam, kotřiž so tam kónc tydźenja wočerstwichu. Wojerowscy policisća pad přepytuja.
Z cyłej swójbu na wulku turu
Syć za dźěło z dźěćimi a młodostnymi přihotuje kolesowanje na horu
Biskopicy (SN/MiR). Butrowa hora je mnohim ludźom přijomna adresa, hdyž chcedźa so w tamnišim hosćencu wočerstwić. Mnozy wužija za to dobru infrastrukturu a dojědu sej tam z awtom. Samo busy so tam hač na wjeršk dóstanu. Dalši, a tych je stajnje wulka ličba, pak wužiwaja derje wuhotowane šćežki a puće tež za to, zo bychu so pućujo abo samo kolesujo na wjeršk dóstali. Składnosć, do pedalow teptajo zhromadnje zabawny dźeń dožiwić, budźe 21. junija. Mjez wjacorymi nošerjemi zarjadowanja je tež Biskopičanska Syć za dźěło z dźěćimi a młodostnymi (KiJu). „Po dwěmaj lětomaj chcemy mjeztym 21. króć tele woblubowane zarjadowanje přewjesć. Wažne nam je, zo maja wobdźělnicy wjeselo a zo sej wotkryja hornjołužisku krajinu“, rjekny nawoda KiJu Andreas Mikus.
Chce wjesnjanosta wšitkich być
K wólbam wjesnjanosty Worklečanskeje gmejny 12. junija maja so wobydlerjo mjez dwěmaj nowačkomaj rozsudźić. Nimo kandidata CDU je to kandidat-jednotliwc Clemens Poldrack z Wudworja. 34lětny so jeno za politiku njezajimuje, ale je tež „wulki fan demokratije“. A dokelž su jeho wobydlerjo narěčeli, hač nochcył kandidować, je so wón za tónle krok rozsudźił.
