Situacija so trochu polěpšiła
Budyšin. Incidenca w Budyskim wokrjesu je so na 123,33 znižiła. Aktualnje je 552 z koronawirusom natyknjenych wosobow, 65 wjace hač pjatk. Třinaće dalšich pacientow je kónc tydźenja zemrěło. Tež w Zhorjelskim wokrjesu je incidenca niša a wučinja tuchwilu 121,08. Cyłkownje je 479 inficěrowanych (+ 18), smjertne pady přez kónc tydźenja žane njezwěsćichu.
Mrětwa so dale wupřestrěwa
Zhorjelc. Na wuchodźe swobodneho stata su fachowcy dwanaće nowych padow afriskeje swinjaceje mrětwy zwěsćili, zdźěli zawčerawšim sakske strowotniske ministerstwo. Wšitke fakty pokazuja na aktiwne infekcije we wohroženej kónčinje, kotraž leži w Zhorjelskim wokrjesu. W přichodnych dnjach a tydźenjach liči ministerstwo tuž z dalšimi infekcijemi.
Za medijowe partnerstwa
Při telefonje jara kedźbować
Habrachćicy. Policija warnuje dale doraznje před wobšudnikami, kotřiž spytaja ludźom po telefonje pjenjezy wulišćić. Při tym njejsu jeno starši wobydlerjo potrjecheni, kaž najnowši pad z Habrachćic pokazuje. Tam je so předwčerawšim 45lětna žona z woporom wobšudnikow stała a 7 500 eurow zhubiła. Pozdatny sobudźěłaćer lutowarnje pola njeje zazwoni a rěčeše wo problemach z jeje kontom. Wón žonu po telefonje napominaše, zo měła jemu tři TAN-čisła mjenować a tak wotknihowanja po 2 500 eurach awtorizować. Škodowana z toho wuchadźeše, zo so woprawdźe wo sobudźěłaćerja lutowarnje jedna, a měješe so po jeho słowach.
Biskopicy (SN). Čestnohamtski měšćanski chronist Biskopic Eckehard Paulick je tele dny symboliski staflowy kij za swoje zastojnstwo Geraldej Svarovskemu dale dał. Wot januara 2005 hač do decembra 2020 bě Paulick časowe dokumenty wo stawiznach města zběrał, přebywaše njeličene hodźiny w měšćanskim archiwje a zawostaji tam swoje slědy w mnohich aktowych zwjazkach. Tež w přichodźe drje jeho hdys a hdys w archiwje zetkaš, nětko pak chce so bóle swojej zahrodce wěnować, agilny wuměnkar přeradźi. Wyši měšćanosta Holm Große je so 73lětnemu za wobšěrne dźěło dźakował, wuzběhujo jeho kulturne, dokumentariske a stawizniske dźěło za město. Na te wašnje je Eckehard Paulick bytostnje k domiznowědnemu slědźenju w regionje přinošował, Große podšmórny.
Budyšin. „Stajimy swětło na wokno, swětło žarowanja, swětło sobuželnosće, swětło sobučuća.“ Z tutymi słowami němski zwjazkowy prezident FrankWalter Steinmeier pozbudźa, wječor zaswěćenu swěčku na wokno stajić a tak na zemrětych koronapandemije kaž tež na jich žarowacych přiwuznych spominać. Towarstwo Cyrila a Metoda so namołwje přizamkuje.
Budyske nalěćo hakle nazymu
Budyšin. Zo njebychu so wobydlerjo sprjewineho města a jich hosćo woblubowaneho nalětnjeho swjedźenja wzdać trjebali, budźe lětuše 1 019. Budyske nalěćo wot 3. do 5. septembra. Tole zdźěli měšćanske zarjadnistwo. Přičina stej aktualne połoženje korony dla a njewěsty přichod. Hłowne torhošćo, Bohata hasa a Žitne wiki maja so zaso z wulkim jewišćom stać. Hižo nětko je jasne, zo zaklinča jazz z Heidelberga, elektrohudźba kaž tež kubaske rytmy.
Nowačkow přizjewić
W parlamentach dwurěčnych gmejnow je lědma žonow. W Pančicach-Kukowje běchu w minjenych měsacach samo jeničce mužojo. To pak je so z wčerawšim posedźenjom změniło.
Wotrow (SN/MWj). Dotal běchu w gmejnskej radźe Pančicy-Kukow móhłrjec mužojo mjez sobu. Jako jenička žona bu w lěće 2019 Katrin Piller do gremija wuzwolena. Chorosće dla pak wona zastojnstwo bórze po wólbach złoži. Wot toho časa bě parlament ryzy muski. Dokelž pak je Stefan Rjeda kónc minjeneho lěta swój mandat wotedał, maja nětko zaso žonu w gmejnskej radźe. Je to Grit Hawšowa z Pančic-Kukowa, kotraž nětko za Serbske wolerske zjednoćenstwo parlamentej přisłuša. Při wólbach 26. meje 2019 bě wona dohromady 115 hłosow dóstała. Grit Hawšowa přisłuša nětko tohorunja hłownemu wuběrkej gmejny a je zastupowaca čłonka techniskeho wuběrka.
Dokelž bě Stefan Rjeda wjele lět zastojnstwo 1. zastupowaceho wjesnjanosty wukonjał, dyrbjachu wčera tež tule poziciju znowa wobsadźić a wuzwolichu za to Stefana Andersa (CDU). 2. a 3. zastupowacy wjesnjanosta staj Peter Rietscher (CDU) a Stefan Cyž (Serbske wolerske zjednoćenstwo).
Halštrow (SN/MWj). Kóždežkuli powołanje žada sej wosebite kmanosće, a žane powołanje drje njeje tajke, zo móhł je kóždy čłowjek wukonjeć. Druhdy dyrbiš so prosće za to abo tamne hodźeć. Ale jako pochowar skutkować žno je jara specielne dźěło. Zemrěteho doma, w hladarni abo chorowni wotewzać, ćěło za pochowanje přihotować a ze žarowacymi přiwuznymi rěčeć, zo by posledni puć lubeho čłowjeka dostojny dosć był, njeje kóždemu date. To wě tež Marko Bulank-Paška. W hornich Sulšecach bydlacy ma mjeztym sydom lět pochowanski institut ze sydłom w Halštrowje.
Zawki a přikryw z wustajeńcy
Tendency snadnje rozdźělnej
Budyšin. Ličba z koronawirusom natyknjenych je so w Budyskim wokrjesu wo 76 na dohromady 570 powjetšiła. Třo pacienća su zemrěli. W chorownjach lěkuja 151 wosobow (- 3), 26 z nich intensiwnje. Tudyša incidenca wučinja 133,33. W Zhorjelskim wokrjesu zwěsćichu 47 nowych infekcijow a sydom smjertnych padow. Incidenca zwyši so na 137,5.
„Krok přećiwo antisemitizmej“
Drježdźany. Społnomócnjeny sakskeho knježerstwa za židowske žiwjenje dr. Thomas Feist a generalna sekretarka Towarstwa 321 – 2021: 1 700 lět židowstwa w Němskej Sylvia Löhrmann staj kooperaciske zrěčenje podpisałoj. Za towarstwo jedna so wo „wuznamny krok zhromadneho boja přećiwo antisemitizmej a wažny přinošk za přichod židowstwa w Němskej“.
Kritizuja rozsud komisije EU