Sopron (dpa/SN). Zwjazkowa kanclerka Angela Merkel (CDU) a madźarski ministerski prezident Viktor Orbán staj dźensa prěnju masowu ćěkańcu staćanow NDR před 30 lětami na zapad wopominałoj. 19. awgusta 1989 bě so wjace hač 600 wobydlerjam NDR poradźiło, na awstrisko-madźarskim pomjeznym přechodźe pola Soprona do Awstriskeje ćeknyć, jako pomjezne wrota krótki wokomik wotewrěchu. Podawk bě prěnja pokazka na drjebjacy so železny zawěšk mjez zapadom a wuchodom. Jenož něšto tydźenjow pozdźišo bu Berlinska murja po­walena.

Merkel a Orbán wobdźělišaj so dźensa dopołdnja na Božej słužbje w ewangelskej cyrkwi w Sopronje. Po tym bě bilateralna rozmołwa planowana. Wo wuslědkach chcyštaj politikarjej na nowinarskej konferency rozprawjeć.

Najebać wšitke diferency mjez Němskej a Madźarskej předewšěm politiki ćěkancam napřećo dla bě Angela Merkel kónc tydźenja přinošk Madźarskeje k znowazjednoćenju Němskeje wuzběhnyła.

Młodźinske hibanje wobdźělnikow z pjeć krajow zjednoćiło

Zgorzelec (AK/SN). Žiwa kultura dopominanja započina so ze zetkanjom. Wona trjeba stajnje zaso intensiwnu diskusiju a rozestajenje ze stawiznami. Tole je so tež na lětušim 12. mjezynarodnym dnju młodźinskeho hibanja „Worcation“ w Zgorzelecu pokazało. Dwaj tydźenjej je dwaceći młodostnych z Němskeje, Pólskeje, Ukrainy, Italskeje a Francoskeje zhromadnje w bywšim lěhwje wójnskich jatych STALAG VIII A přebywało. Zarjadowanje organizowało bě towarstwo Meetingpoint Music Messiaen. Wone so hižo lěta za to zasdźa, stawizny lěhwa dale a dokładnišo wobdźěłać. Na ležownosći je dźensa mjezynarodny młodźinski a zetkawanski centrum zaměstnjeny.

Bych-li wšěch naličić dyrbjał, kotřiž so tuchwilu wo to prócuja SPD nawjedować směć, to drje bych chětro jakotać započał. Na wšě 14 wosobow je so dotal přizjewiło – pjeć porikow a jednotliwcy. Sym sej wěsty, zo tež socialdemokraća sami poněčim přehlad zhubja. Ći maja mjenujcy nowe nawodnistwo strony postajić, hač jako porik abo jednotliwca. A nětko je so tež hišće financny minister Olaf Scholz přizjewił. Po tym zo bě spočatnje wšitke ambicije na zastojnstwo prěł, je sej wěc nětko hinak přemyslił, po tym zo bě „połoženje znowa posudźował“, kaž sam rjekny. Njewěrju, zo so SPD z tajkim chaotiskim postupowanjom pod hesłom „kóždy smě so přizjewić“ z najćešeje krizy swojich sta­wiznow wudrapa. Doba přizjewjenja so 1. septembra skónči. Samsny dźeń drje budu wolerjo dožiwić dyrbjeć, kak je nahladnosć SPD w Sakskej a Braniborskej dale woteběrała. Tajku stronu nawjedować nikomu­ njezawidźu. Marko Wjeńka

Tepjene špundowanje matej wot najnowšeho lawica Gina a jeje partner Navin w Kölnskim zwěrjencu. Na wšě 200 000 eurow je přetwar płaćił, kaž coo zdźěla. Porik móže so nětko rozsudźić: Pak wotpočuje na hórce před wočemi wopytowarjow, pak zminje so w nowej tepjenej prózdnjeńcy. Tež kwartěr tigrow chcedźa w Kölnje podobnje ponowić. Tigraj Sergan a Hanya dyrbitej nachwilnje do druheho zwěrjenca.

Spěšnje a tunjo nakupować chce wjetšina ludźi w Němskej. To je wuslědk naprašowanja slědźenskeho instituta Nielsen. Tak su 65 procentam přetrjebarjow potuńšene poskitki jara wažne. Nimale runje telko ludźi (59 procentow) najradšo tam nakupuje, hdźež maja swoju lisćinu najspěšnišo wotdźěłanu. Wěcywustojne poradźowanje ma jenož kóždy štwórty kupc za wažne.