„Mexičenjo“ so přesadźili
Sportowe towarstwo Marijina hwězda bě sej za minjenu sobotu na jubilejny nowolětny turněr ludosportowe volleyballowe cyłki přeprosyło. 14 mustwow hraješe tam wo dobyće. Běchu to zastupnistwa z blišeje wokoliny. Worklečanske Dźiwje micki a Zmjetane črije, za kotrymiž chowachu so hrajerki 1. mustwa Marijinych hwězdźičkow, běštej jeničkej ryzy žonjacej cyłkaj.
W předkole nastupi w třoch staflach kóždy přećiwo kóždemu. Dalše koło hrajachu přez křiž, tak zo wobchowachu sej tež w předkole ći na druhim městnje šansu na dobyće. Mjeztym zo na započatku cyłki ze zdźěla jara rozdźělnymi zamóžnosćemi na so trjechichu, běše niwow w druhim kole jara wurunany. Horco wojowachu wo kóždy bul. Wulke stróžele wubudźi situacija, jako so Gerald Bachmann z mustwa Kopańca starych knjezow po nadběhu zwjeze a ležo wosta. Noha bě w njestrowym kuće zhibnjena. Ze spěšnej medicinskej pomocu dowjezechu sportowca do Kamjenskeje chorownje. Pozdźišo wón zawoła a zdźěli, zo bě noha w zhibadle wukulena. Po krótkim přetorhnjenju móžeše turněr dale hić, nic pak za njeho.
Chróšćenjo trójce dobyli
Halowy koparski turněr za dorostowe mustwa
Je hižo z tradiciju, zo wuhotuje Sokoł Ralbicy/Hórki mjez hodami a Nowym lětom halowe koparske turněry za serbske dorostowe mustwa. Tež tónkróć dóstachu znowa SJ Chrósćicy, ST Radwor, SJ Njebjelčicy a ST Marijina hwězda přeprošenje za wubědźowanja młodźiny F, E a D.
28. decembra zetkachu so w dźewjećich najprjedy najmłódši koparjo. Bambinije Sokoła a SJ Njebjelčicy přewjedźechu w hali přećelsku hru, kotraž skónči so 0:0. Po tym zahwizda sudnik Kilian Hrjehor z Róžanta prěnju partiju F-juniorow. Tam nastupichu dwě Njebjelčanskej, dwě Ralbičanskej a jedne Chróšćanske mustwo, kotrež prěni turněr zhromadnje z Ralbičanskim cyłkom doby, wšako měještej wobaj dźesać dypkow a wrotowy poměr 8:2. Kaž je w Ralbicach z wašnjom, njedósta dobyćer pokal, ale słódkosć. Štóž so prócowaše, wulce njehóršeše a fairnje wojowaše, dósta porno tomu medalju. A dokelž serbscy koparjo tele hódnoty wobkedźbowachu, dźěše na kóncu kóždy z medalju domoj – tež wšitcy koparjo młodźiny E a D.
49. silwesterski běh w Budyšinje
Serbscy sportowcy so přeco zaso sobu wobdźěleja
Staremu lětu božemje prajili su minjeny štwórtk – silwester – dopołdnja lubowarjo běhanja na swojim mjeztym hižo 49. tradicionalnym běhu w Budyšinje. Pod jara přijomnymi wjedrowymi wuměnjenjemi podachu so entuziasća běhanja, wot třilětneho dźěsća hač k 81lětnemu wuměnkarjej, ze stadiona Młynkec łuka po pućach podłu Sprjewje do Humboldtoweho haja na 2,5 km, 5,3 km a 10,6 km a zaso wróćo do stadiona.
Najmłódši hrajer dwoje wrota třělił
57. Budyska hodowna kopańca
Při wurjadnych wjedrowych poměrach zetka so 26. decembra 25 dźensa hišće aktiwnych a njeaktiwnych sportowcow k 57. hodownej kopańcy, kotraž bě na sportowym arealu Budissy Budyšin w Humboldtowym haju. Prěni króć hrajachu na kumštnym trawniku.
Klaus Cisak a Jurij Nuk běštaj 1959 hižo sobu hrałoj a staj dźensa přihladowarjej. Nuk bě jako jenički na wšitkich 57 zarjadowanjach pódla, 35 króć je sobu hrał. W běhu lět wobdźěleše so tež tójšto dalšich serbskich sportowčow a sportowcow. Z cyłkownje 26 Serbow je Michał Paška 17 króć sobu hrał, Achim Paška 16 króć, Klawdija Hejdušcyna dźesać, Křesćan Paška a Maćij Buk wosom, bratraj Jakub a Hubertus Čórlich sydom a Bernadet Paškec a Fabian Hejduška šěsć króć.
Třeće městno w Husce sej zawěsćili
Za ST Marijinu hwězdu zasadźeni: O. Schmidt, C. Sbjeznie, M. Łušćanski, T. Jurš, R. Hawš, L. Langer, J. Pakoßnick, D. Jurš, A. Winkler
Z prominentnym hosćom
25. króć halowy koparski turněr CDU we Worklecach přewjedli
Nětko hižo 25. króć zetkachu so koparske cyłki wokolnych wsow dźeń do silwestra we Worklečanskej ćěłozwučowarni, zo bychu tam wo pokal CDU wojowali. Hłowny organizator turněra Alojs Mikławšk je krótko do 13 hodź. zhromadnje z Matejom Dźisławkom, komentatorom turněra, wšitke mustwa powitał. Runočasnje wón naspomni, zo čaka hišće ta abo tamna překwapjenka na jubilejnym turněrje. Kaž přeco wojowaše stajnje pjeć mustwow w dwěmaj staflomaj wo połfinalne městna. Hnydom w prěnich hrach so pokaza, zo bě turněr jara wurunany a po niwowje jedyn z najlěpšich scyła. Nimale wšitke mustwa wobstejachu z mnohich nětčišich abo bywšich aktiwnych hrajerjow. W stafli A přesadźichu so Pěskecy a Nowa Wjeska před dwěmaj Worklečanskimaj mustwomaj a starymi knjezami Zeleno-běłych Hórkow.
„Njepóńdźemy z běłej chorhoju na kopanišćo“
W krajnej lize na třećim městnje, w sakskim pokalnym kole w połfinalu a w swojich rjadach tež hišće třělca měsaca nowembra w sportowym wusyłanju Sportschau pola ARD: Pola Jednoty Kamjenc tuchwilu po zdaću wšo kulojće běži. Přičina to Hanspeterej Benadźe so raz z trenarjom Frankom Ričelom rozmołwjeć.
Sće z dotal docpětym zawěsće spokojom?
F. Ričel: Spokojom poprawom być njesměš. Hladajo na zašłu sezonu pak je jasne stopnjowanje spóznajomne. Smy mjez prěnimi pjećomi w tabulce. To bě naš zaměr. Móžemy potajkim wo dobrej prěnjej połseriji rěčeć.
Byšće-li na kóncu na prěnim městnje stali, byšće potom tež prawo na postup do wyšeje ligi přiwzali?
F. Ričel: Dyrbimy hišće dalšu połseriju absolwować. W kopańcy je wjele móžno. Chcemy tuchwilne městno z dobrymi wukonami spytać skrućić. Dyrbjało-li na kóncu prěnje městno wuskočić, budźe naše wjednistwo zawěsće wšo za to činić, zo by wone wužadanje přiwzało.
Su nowopřichady wočakowanja spjelnili?
F. Ričel: Cyłkownje haj, pola dweju pak sym sej wjace wočakował.
Je Was něchtó wosebje překwapił?
Přihoty běža
Volleyballisća SGB we wokrjesu Budyšin dominuja
Šulerjo Serbskeho gymnazija Budyšin steja w cyłkownym wokrjesnym hódnoćenju šulow před Goethowym gymnazijom Biskopicy na čole.
Hižo mnohe lěta wotměwaja so pod hesłom „Młodźina trenuje za olympiju“ tež w sportowej hali na Budyskim Třělnišću šulerske wokrjesne wurisanja we volleyballu z najstaršej starobnej klasu I (11. do 13. lětnik). Wukónc tychle wubědźowanjow, kotrež zakónčichu před dwěmaj tydźenjomaj, bě z wida Serbskeho gymnazija Budyšin (SGB) tróšku njezbožowny, dokelž běchu holcy finalnu partiju přećiwo Goethowemu gymnazijej Biskopicy w rozsudnym přechodźe snadnje z 13:15 přěhrali. Někotre mjeńšiny pozdźišo njekiwaše tež hólcam SGB trěbne zbožo, jako w hrě wo městno tři Powołanskej šuli za techniku a hospodarstwo Budyšin tež w třećej sadźbje ze 14:16 podležachu. Holcam kaž hólcam SGB pak słuša wulki kompliment za jich angažement při wysokim saku.
Widźał, słyšał, napisał (04.01.16)
Awtor dźensa
Jurij Bjeńš
