Pjeć hwěžkow za Kodiaq

Donnerstag, 08. Juni 2017 geschrieben von:
Praha (ČŽ/K). Nowe awto typa Škoda Kodiaq­ z awtotwornje w sewjeročěskich Kvasinach je wot organizacije Euro NCAP za swoju wěstotu dóstało pjeć hwěžkow, štož je najwyše hódnoćenje. Nastupajo škitanje dorosćenych pasažěrow docpě Kodiaq 92 procentow, nastupajo škitanje dźěći 77 procentow. Najwjac dypkow su wozydłu za wěstotu před pobóčnej zražku dali. Kodiaq je wuhotowany ze systemom nuzoweho borzdźenja, kiž sobujěducych a tohorunja pěškow škita. „Zwyšili smy pasiwnu wěstotu, štož rěka, zo sama konstrukcija karoserije hižo we wulkej měrje k wěstoće přinošuje“, rjekny zamołwity za wuwiwanje w přede­wzaću Škoda Avto Christian Strube. „Přidatnje smy progresiwny asistentny system rozšěrili, zo by so njezbožam po móžnosći cyle zadźěwało“, Strube doda. Nimo superkruteje karoserije škita pasažěrow dźewjeć airbagow, tójšto wěstotnych pasow a system Isofix za dźěćace sedła. NCAP je njewotwisny konsorcium europskich ministerstwow za wobchad, awtomobilowych klubow a zawěsćernjow.

Zeman w Azijskej

Dienstag, 06. Juni 2017 geschrieben von:
Praha (ČŽ/K). Čěski prezident Miloš Zeman přebywa z wulkej delegaciju přede- wzaćelow tuchwilu na wopyće we Vietnamje. Na programje ma mjez druhim jednanja z prezidentom kraja Tran Đai Quang wo zběhnjenju winowatosće wizuma za čěskich turistow a wo di­rektnym lětarskim zwisku mjez Čěskej a Vietnamom. Tema je tohorunja nahladna vietnamska mjeńšina w Čěskej, mjez druhim nastupajo jeje wuspěšne integrowanje, ale tež wšelkich kriminelnych počinanjow dla kaž zhotowjenja drogow. Zeman wobdźěli so tež na čěsko-vietnamskim hospodarskim forumje. Padłych za swobodu kraja počesći z wěncom při pomniku narodnych rjekow. Wuprawa ma wunjesć rjad zrěčenjow, hłownje wo wzajomnym wikowanju a jedne wo zhromadnym dźěle policije wobeju statow a wróćozwjedźenju zasudźenych wosobow. Naslědnje wopyta prezident Zeman ze swojim přewodom Kazachsku. W stolicy Astanje wobdźěli so wón pjatk na zahajenju mjezynarodneje wustajeńcy Expo 2017. Tón dźeń ma na programje tež jednanja z kirgiskim prezidentom Almazbekom Atambajewom.

Česća Kaczyńskeho jako rjeka

Freitag, 02. Juni 2017 geschrieben von:

Dróhi a naměsta w Georgiskej po něhdyšim pólskim prezidenće pomjenowane

Waršawa. Pólski statny prezident And­rzej Duda bě spočatk tydźenja tři dny na statnym wopyće w Georgiskej. Oficialna přičina bě 25. róčnica diplomatiskich poćahow mjez krajomaj. Tam móžeše Duda płody žnjeć, kotrež bě bywši pólski prezident Lech Kaczyński swój čas w Georgiskej wusył.

Budźa zajim za křesćanstwo

Freitag, 02. Juni 2017 geschrieben von:

NÓC CYRKWJOW wotměje so dźens za tydźeń po cyłej Čěskej republice. Při­bližnje 15 000 Božich domow, kapałkow a modlernjow móža sej ludźo při tejle składnosći wobhladać. Přistupne budu tohorunja rumnosće, do kotrychž wopytowarjo hewak njepřińdu. W Nocy cyrkwjow spóznaja zajimcy křesćanstwo w jeho architektoniskej podobje a njeposrědnje ze zetkawanjom z jeho zastupnikami – měšnikami, mnichami a dalšimi. Zarjadowanje wobrubja z bohatym kulturnym a duchownym programom, organizowanym wot wjele tysac dobro­wólnych. Wopytowarjo móža sej z poskitka wuzwolić koncerty, komentowane wodźenja, dźěłarnički a dźiwadłowe předstajenja. Móžno je, pohladać do sakristijow abo rozhladować so w zahrodach klóštrow, zahrać sej na pišćelach, zalězć na cyrkwinu wěžu abo zestupić do kryptow. Wulke dožiwjenje lubi „putnikowanje swětła“, při kotrymž poćahnu ludźo ze swěčku w ruce wot cyrkwje swj. Tomaša k cyrkwi swj. Salvatora po Karlowym mosće. Nóc cyrkwjow ma nic naposledk zaměr, budźić zajim za towaršnostnu a kulturnu hódnotu Božich domow.

ANO dale prědku

Donnerstag, 01. Juni 2017 geschrieben von:
Praha (ČŽ/K). Šmjatki knježerstwoweje krizy w Čěskej dla njejsu hibanju ANO wotwołaneho financneho ministra Andreja Babiša zeškodźeli. Jeho strona by wólby sejma kaž w aprylu z 28,5 procentami dobyła. To wuchadźa z woprašo­wanjow agentury Focus. ČSSD premiera Bohuslava­ Sobotki, kiž bě cyłu wěc naškarał, žadajo sej pušćenje Babiša, by porno tomu jenož hišće na 17 procentow přišła a tak tři mjenje dóstała hač mi­njeny měsac. Zaćahnyli do sejma bychu KSČM, za kotruž by 14 procentow hłosowało, ODS z 10,8 procentami a TOP 09 z 9,8 procentami. Sobu knježaca KDU-ČSL njeby w parlamenće w tym padźe hižo­ zastupjena była, by-li k wólbam w koaliciji z hibanjom STAN nastupiła, přetož hromadźe dyrbjałoj dźesać procentow docpěć. Woprašowanje wuswědča pak „cyłkej“ skromne 7,4 dypki. Pod pjeć procentami bychu wostali Piraća a Zeleni. Trochu poškrabany ze wšeho je tohorunja prezident Miloš Zeman wušoł – jemu dowěrja nětko 41 procentow wolerjow město 55 w aprylu. „Surowje chłostane“ je knježerstwo Sobotki, z 22 proc. ma wone dotal najmjenje akceptancy.

Zakaz kurjenja płaćiwy

Mittwoch, 31. Mai 2017 geschrieben von:
Praha (ČŽ/K). Wot dźensnišeho płaći w Čěskej dospołny zakaz kurjenja w rum­nosćach hotelow, hosćencow, korčmow kaž tež na dalšich zjawnych arealach. Zakoń naprawja zdobom předań alkohola. Dotalny zakaz předawanja alkoholiskich napojow widźomnje wopitym abo pod drogami stejacym wosobam je wudospołnjeny z winowatosću předawarja, tajkeho namołwić, předawarnju wopušćić. Skupina 20 senatorow chce wšak na wustawowe sudnistwo hić a zběhnjenje dźělow zakonja docpěć. Woni kritizuja absolutny zakaz kurjenja, zakaz předawanja alkohola a tobakowych wudźěłkow na zarjadowanjach za dźěći.

Praha (dpa/SN). Na hłownym dwórnišću čěskeje stolicy dopominaja wot najnowšeho na transporty, z kotrymiž běchu židowske­ dźěći z tehdyšeje Čěskosłowakskeje bjezposrědnje do wudyrjenja Druheje swětoweje wójny do Jendźelskeje a tak do wěstoty dowjezli. Wot měrca do awgusta 1939 na te wašnje 669 holcow a hólcow před holocaustom wuchowachu. Wjetšina z nich njeje swojeju staršeju po tym ženje wjace widźała. Nowy pomnik symbolizuje durje ćaha z wotćišćom dźěćaceju rukow na jednym boku wokna a rukow dorosćeneho na tamnym boku. „Njewědźachmy tehdy, čehodla naši starši płakaja. Běchu wšak nam rjekli, zo jědźemy jenož na wulět“, rjekny Zuzana Marešová powěsćerni ČTK. Wona bě natwar pomnika zhromadnje z dalšej přežiwjenej, lady Milenu Grenfell-Baines, nastorčiła.

Hłowny organizator Praskeje wuchowanskeje akcije, Brita sir Nicholas Winton, bě 2015 w starobje 106 lět zemrěł. Wón dósta wjacore wuznamjenjenja, mjez druhim čěski rjad Běłeho lawa. Britiska kralowna bě jeho na ryćerja pasowała.

Lodohokej: Narodna katastrofa

Montag, 29. Mai 2017 geschrieben von:

Peter Čačko rozprawja z Bratislavy za Serbske Nowiny

Jako bě na lětušich swětowych mišterstwach w lodohokeju, přewjedźenych prěni raz w dwěmaj krajomaj z hrajnišćomaj w francoskej stolicy Parisu a němskim Kölnje nad Rynom, wurisanske finalne koło na rjedźe, su hrajerjo sło­wakskeje wubranki dawno hižo zaso doma byli. Na wobrazowce telewizora móžachu sej tuž woměrje wobhladać, kak najlěpše mustwa, wubědźowace so wo titl championa, wuspěšnje za pukom na lodźe honja.

Zo Słowakska tónkróć lědma wobsteji, běchu poprawom wočakowali. Znajmjeńša wot teje chwile krótko do zahajenja swětowych mišterstwow sem, zo bě trenarjej Zdenej Cígerej dwaceći nominowanych hrajerjow zdźěliło, zo jeho přeprošenje do narodneho mustwa njesćěhuja. Do Kölna su tak chcyjo nochcyjo jěli lodohokejisća­, z kotrychž žadyn njeje skutkował w sławnej amerisko-kana­diskej lize NHL (njenadźaty swětowy mišter 2017 Šwedska bě porno tomu z kompletnej wubranku hrajerjow ze zamórskeje ligi pódla).

Nahladny róst w 1. kwartalu

Montag, 29. Mai 2017 geschrieben von:
Praha (ČŽ/K). Hospodarstwo Čěskeje republiki dale rozkćěwa. W prěnim kwartalu přiby wone wo 2,9 procentow a tak hišće bóle, hač běchu analytikarjo wěšćili. Tole wozjewjeja medije kraja, powołace so na daty Čěskeho statistiskeho zarjada (ČSÚ). Hłownje přinošowało je k tomule spomóžnemu wuwiću sylne naprašowanje z wukraja, při čimž su Škodowki z Mladeje Boleslavy a wozydła scyła wosebje požadane. Dźakowano rosćacym mzdam je wšak so tohorunja přetrjeba domjacnosćow dale powjetšiła. ČSÚ konstatuje, zo je wukonliwosć nimale wšitkich hałžkow ludoweho hospodarstwa přibyła, kaž předźěłaceho přemysła tak tež nimale wšěch móžnych posłužbow. Sylny hospodarski róst wuskutkuje po sudźenju eksperty Komercneje banki Viktora Zeisela njemały ćišć na dźěłowe wiki. „Njedostatk dźěłowych mocow a njewuchilne dalše zwyšowanje mzdow dowjedźetej prawdźepodobnje tež k zwyšenju přetrjebarskich płaćiznow“, ma wón zdobom za to. Za cyłe lěto wočakuja róst čěskeho hospo­darstwa wo štyri do pjeć procentow.

W kóždej gmejnje pomnik

Freitag, 26. Mai 2017 geschrieben von:

Jarosław Kaczyński chcył swojeho bratra Lecha po cyłym kraju zwěčnić

Waršawa. Kóžde pólske město, městačko abo samo gmejna, kotrež maja na někajke wašnje ze slědami lěta 2010 při znje­zboženju lětadła w Smolensku zemrěteho prezidenta Lecha Kaczyńskeho činić, měli jemu pomnik postajić abo jeho na hinaše­ wašnje wopominać. Tole žada sej jeho bratr Jarosław Kaczyński, předsyda knježaceje strony Prawo a sprawnosć. Wopominanje je jemu runjewon patriotiska winowatosć, kotrejž měł kóždy Polak wotpowědować. Kaczyński móhł sej předstajić, zo noša přichodnje naměsta, dróhi, parki, haj samo kružne wobchady w městach mjeno jeho bratra.

Při tym su minjene lěta hižo sta tajkich pomnikow a wopominanskich taflow nastali. Najnowši pomnik za Lecha Kaczyńskeho twarja tuchwilu w Białystoku. Ludźo pak so přiběrajcy spjećuja. W Białystoku je wjace hač 70 procentow wobydlerjow přećiwo pomnikej, kaž medije­ zwěsćeja. Wótře prajić pak sej to nichtó njezwěri. Wšako knježi w Pólskej starodawna zasada: Wo zemrětym so derje­ rěči abo scyła nic.

Serbska debata

Neuheiten LND