Zapósłanča Lěwicy w Němskim zwjazkowym sejmje Caren Lay ...
Laschet za kurs srjedźizny w CDU
To a tamne (02.11.18)
Hrózbu šěrjaceho klawna přebił je swójbny nan na halloween w Lossatalu w Lipšćanskim wokrjesu. 19lětny klawn bě wjacore dźěći w swojim kostimje a z motyku w ruce nastróžił. Mać dźěći sej na to žadaše, zo měł so klawn pola nich zamołwić. Nan jeho samo z motyku přebi a nuzowaše, na kolenach klečo dźěći wo wodaće prosyć. 19lětny je 34lětneho nana mjeztym wobskoržił, po tym zo bě so w chorowni lěkować dał.
Alkoholowych problemow pilotow dla je japanski minister za wobchad prawidła w branši přiwótřił. Minjeny čas bě stajnje zaso k njeluboznym podawkam dochadźało. Hakle njedawno zaja britiska policija w Londonje 42lětneho japanskeho pilota, kiž bě w nocy do wotlěta do Tokija dwě bleši wina a dwaj litraj piwa wupił. Tež personal w mašinje su wospjet lepili, jako alkohol pijachu.
Merkel po puću na Ukrainu
Berlin (dpa/SN). Zwjazkowa kanclerka Angela Merkel (CDU) je dźensa na Ukrainu wotlećała. W stolicy Kijewje chce so wona z prezidentom Petrom Porošenkom kaž tež z ministerskim prezidentom Wolodymyrom Hrojsmanom zetkać. Hłowne temy su poćahi mjez krajomaj a kriza na wuchodźe Ukrainy. Mjez druhim chcedźa trěbne kročele k zwoprawdźenju měroweho zrěčenja wobrěčeć.
Defektny sensor wina był
Moskwa (dpa/SN). Skóncowany sensor je po dotalnych ruskich informacijach misnjeny start rakety typa Sojuz z dwěmaj kosmonawtomaj 11. oktobra zawinił. To zdźěli zamołwity wotrjadnik, něhdyši kosmonawt Sergej Krikaljow w Moskwje. Sensor bě wina, zo njejstej so prěni a druhi schodźenk ćěridła rakety kaž planowane dźěliłoj. Raketa so tuž dwě mjeńšinje po wotlěće sama rozpušći. Dźakowano zatwarjenemu wěstotnemu mechanizmej móžeštaj so kosmonawtaj zaso na zemju nawróćić.
Trump sćele wojakow na mjezu
Tež ewangelska cyrkej Berlina-Braniborskeje-šleskeje Hornjeje ...
Konserwatiwni w CDU skerje za Friedricha Merza
Berlin (dpa/SN). W diskusiji wo noweho předsydu CDU so dźeń a bóle wotbłyšćuje, zo ma Friedrich Merz wočiwidnje najlěpše šansy wažne zastojnstwo přewzać. Zastupnica konserwatiwneho Berlinskeho kruha, zapósłanča CDU w zwjazkowym sejmje Sylvia Pantel, rjekny powěsćerni dpa: „Friedrich Merz je mudry a nazhonity politikar z wulkej hospodarskej kompetencu, ze solidnymi zakładnymi přeswědčenjemi a žiwjenskim nazhonjenjom.“ Pantel je sej wěsta, zo Merz mnohich wolerjow, kotřiž su so wot CDU wotwobroćili, wróćo zdobudźe.
Friedrich Merz bě swoju kandidaturu za předsydstwo CDU připowědźił, zo by nowy rozmach w stronje zahajił, kaž wón wčera hišće raz potwjerdźi. „Sym hladajo na swoje přeswědčenja a přichilnosće hospodarski liberalny, po hódnotach konserwatiwny a socialnopolitisce angažowany čłowjek.“ Dotalna předsydka CDU Angela Merkel bě připowědźiła, zo zastojnstwo złoži.
Prěnja skupinska skóržba dóšła
Berlin/Braunschweig (dpa/SN). Na wyšim krajnym sudnistwje w Braunschweigu je dźensa prěnja skupinska skóržba přećiwo awtotwarcej VW w originalu dóšła. Hižo w nocy bě Zwjazkowa centrala za škit přetrjebarjow wjace hač 200 stron wopřijacu skóržbu z faksom pósłała. Zwjazk skorži přećiwo koncernej jako zastupjer dźesaćitysacow wobsedźerjow dieselowych awtow. Zwjazk chce docpěć, zo dyrbi VW wobsedźerjow awtow z manipulowanym wotpłunom wotškódnić.
Skupinska skóržba je wot dźensnišeho móžna. Z tutym nowym instrumentom móža organizacije za škit přetrjebarjow zastupujo potrjechenych skóržbu zapodać. Přetrjebarjo sami nimaja při tym žane financne riziko. Volkswagen njewočakuje, zo změje skóržba wuspěch. Kupcy w Němskej nimaja najebać manipulaciju žane prawo na wotškódnjenje, rěka ze stron koncerna. „Awta su přizwolene, technisce w porjadku a jězdźenjakmane.“ Tuchwilu předleži 26 000 skóržbow přećiwo VW. Dotalne wusudy su skerje na njedobro wobsedźerjow.
Komplicow z fintu lepili
Peter Čačko rozprawja z Bratislavy za Serbske Nowiny
Słowaksku za čas jeje wobstaća politisce a towaršnostnje ničo njeje tak ze sćěhami přetřasło kaž zamordowanje přepytowaceho nowinarja Jána Kuciaka a jeho slubjeneje Martiny Kušniroveje. A zdobom so ničo njeje tak wobćežnje wuswětlić dalo kaž tele złóstnistwo. Po jeho skućenju 24. februara bě měsacy dospołna „ćišina“ knježiła, tak zo šukotachu hižo wo „zamazowanju“, měješe dźě pječa hić wo splećenje někotrych ministrow Ficoweho knježerstwa z italskej mafiju. Spočatk septembra nałoži policija taktisku fintu – wozjewi identifikaciske foto muža, kiž bě so za čas mordarstwa blisko Kuciakoweho domu w jeho ródnej wsy Veľká Mača „pohibował“. A hlej – mjez wěstymi wosobami nasta hektiske e-mailowanje. Tak lepichu komplicow móžneho naštykowarja mordarstwa, dwělomneho předewzaćela Mariána Kočnera, kiž jebanstwa dla hižo w přepytowanskej jatbje sedźeše. Mjez komplicami bě tež žona. Byrnjež praweho skućićela hišće njeměli, je zjawnosć na postupowanje policije z připóznaćom reagowała.
Žiwjenje wuchował
To a tamne (01.11.18)
Zo móhli kónčki cigaretow recyclować, chcedźa před wšitkimi 350 wobchodami wikowanskeho rjećaza Franprix w Parisu popjelniki nastajeć. Zwjazane je to z namołwu: „Dajće nam swoje cigaretowe kónčki, činimy něšto wužitneho z toho.“ Z filtrow cigaretow chcedźa kumštnu maćiznu wudobywać a nimo toho dróhirjedźerjam pomhać: Jeničce w stolicy Parisu namjetu kóžde lěto 350 tonow cigaretowych filtrow.
Tak derje před staršimaj so schował, zo dyrbještaj policiju wołać, je so třilětny w Kaiserslauternje. Staršej njemóžeštaj jeho ani w domje ani na zahrodźe namakać. Zastojnicy sej dom hišće raz wobhladachu a namakachu hólčka za kuchinskimi durjemi. Tam bě wón wołanje staršeju wotpohladnje ignorował.
