Konrad Skatula H 18
1Jako čłon předsydstwow městneho towarstwa Kamjenc a wokolina a Budyskeho wokrjesneho zwjazka Budyšin SPD mam serbsku rěč a kulturu za wažne zachowajomne a škitajomne kulturne kubło. Trjebamy sylniše sebjewědomje, zo njebychu so serbske nałožki stali z ryzy muzejowym abo show-aktom za turistow. Za to trjebamy demokratisce wuzwolene zastupnistwo zajimow, kotrež nima Domowinu wustorčić. Wobaj cyłkaj měłoj so wudospołnjeć a hromadźe dźěłać.
2Zmysłapołne je, wšitke prócowanja wo serbski lud do zhromadneje akcije zwjesć. Jako přeswědčeny SPDnik je mi demokratisce wuzwolene ludowe zastupnistwo wažne. Wone móhło w zjawnosći tójšto wuskutkować.
3Chcu so přećiwo hidźe a šćuwańcy zasadźeć. Dwurěčnosć njeměli jako dyrbiznu, ale jako šansu wobhladować, na přikład ze serbskimi rěčnymi poskitkami tež na němskich šulach a pěstowarnjach. Wažnej stej respekt a toleranca mjez Serbami a Němcami a migrantami.
Handrij WjeńkH 19
1Lubosć k serbskej domiznje a móžnosć, našimaj synomaj serbske wukubłanje w pěstowarni a w šuli zaručić, su nas pohnuli, so 2015 zaso do Łužicy nawróćić. W poslednich 18 lětach mějach móžnosć, swoje kmanosće za wšelakore mjezynarodne firmy w financnym wobłuku zasadźić. Moje wobšěrne nazhonjenja a kmanosće z tutoho wobłuka chcu rady jako kandidat Serbskeho sejma na dobro serbskeho luda zasadźić. Ja chcu so aktiwnje za zachowanje našeje serbskeje mjeńšiny zasadźeć.
2Ze serbskim parlamentom skići so wšitkim tym, kotřiž so k serbskemu ludej wuznaja, historiska móžnosć sobupostajowanja. Wšojedne hač su ewangelscy, katolscy, němskorěčacy abo zwonka Łužicy bydlacy Serbja – wšitkim da swobodnje woleny Serbski sejm zhromadny hłós.
3Najwažniša naležnosć je mi samopostajene wukubłanje serbskich kubłarjow a wučerjow. To zaruči sylny zakład za wukubłanje přichodnych generacijow serbskich dźěći.
Siegbert BudišinD 1
1Měnju, zo serbska rěč a kultura mjez němskimi sobuwobydlerjemi hišće přemało wothłosa nazhonjatej. Nadźijam so, zo móžemy w běhu časa wšitkich Serbow w Delnjej a Hornjej zjednoćić. Potom změjemy snadź tež wjace prawa soburěčenja, Serbow w Braniborskej a Sakskej podpěrać. Ze swojim mjenom mam wosebity zwisk do Budyšina.
2Serbja w Braniborskej a Sakskej móža z parlamentom lěpje kontakty nawjazać, předewšěm z jednym hłosom w zjawnosći rěčeć, wosebje napřećo politiskim stronam a nošerjam rozsudow.
3Budu-li wuzwoleny, chcu so zasadźeć za wučbu serbšćiny a Witaj w zakładnych šulach. Za to, zo kulturne serbske nałožki tak rozkćěja, kaž su prjedy raz byli. Na přikład, zo widźimy na zapusće zaso tradicionalne postawy kaž dwuwobličo abo mjedwjedźa a nic nowe cuze elementy. Tež nastupajo serbsku rěč měli wotewrjeni za dalewuwića być.
Stefanie Kosycowa D 2
1... dokelž su europske přikłady, pola kotrychž je politiske samopostajowanje (narodnej) mjeńšinje wobdźiwajomne wuwiće wunjesło. Łužica trjeba runje tajke wuwiće!
2Dźe mi wo to, kulturu a tradicije zachować a skrućeć, wosebje we wobłuku zdźěłowanja a kubłanja z přisłušnymi institucijemi. To je tež wusko zwjazane na přikład ze spěchowanjom serbskeje rěče za naše dźěći! Serbski sejm je tež mjezynarodnje legitimowane politiske zastupnistwo, złožowace so na Zakładny zakoń, Chartu Europskeje unije a Lissabonske zrěčenje z lěta 2007.
3Zasadźić chcyła so za nowe jednanja nastupajo statne zrěčenje wo financowanju kulturneje a kubłanskeje awtonomije, dale za skrućenje serbskeje rěče kaž tež za wustawu na zakładźe rezolucije 61/295 Zjednoćenych narodow a za wutworjenje korporacije zjawneho prawa za lud Serbow.
Hanzo Wylem-KełD 3
1Tema politiske sebjepostajowanje za Serbow steji hižo 15 lět na mojej agendźe.
2Sejm je demokratisce wuzwoleny forum zastupowanja ludu, legitimowany nastupajo nutřkowne a wonkowne samopostajowanje, a jako instrument tajkeho Serbow politisce zastupuje. Wón wuprudźa regionalnje a nadregionalnje, twori identitu ze swójskej serbskej politiku, skruća wobstejace kulturne a kubłanske institucije. Rozsudy, kotrež su Łužičanam na wužitk, měli so jim tež přewostajić (po principje subsidiarity).
3Chcu so prócować wo narodne wujednanje k stawizniskim přewrótam wosebje w lětach 1945–2000, dźěłać za wustawu na zakładźe rezolucije Zjednoćenych narodow 61/295 a za wutworjenje korporacije zjawneho prawa za lud Serbow. Jako dalšej temje stej mi wažnej nowe jednanja nastupajo statne zrěčenje wo financowanje kulturneje a kubłanskeje awtonomije kaž tež zesylnjenje dwurěčnosće we Łužicy.
Dirk Pawlik D 4
1Chcu serbskej mjeńšinje wužadacy hłós za regionalne, kulturne, kubłanske a tohorunja hospodarske samopostajowanje być. Serbske ludowe nałožki, kaž na přikład łapanje kokota, tradicije a rěč njesmědźa so zhubić. Mamy je čile nałožować a dale dawać.
2Naš prěni wuzwoleny serbski parlament zmóžni sebjewědome a runohódne wustupowanje w Němskej a Europje.
3Naše tradicije a nałožki nimamy jenož turistisce zwičnjeć. W swójbach a w zjawnosći njech je serbšćina zaso srědk mjezsobneje komunikacije a druha hamtska rěč. Łužiske regionalne předewzaća maja so při zjawnych nadawkach a zwičnjenju hospodarsce preferować. Zasadźam so za spěchowanje ekologiskeho ratarjenja na małych płoninach, zo bychmy pódu naslědnje wobhospodarjeli a ju našim potomnikam zachowali.
Dirk Marx D 5
1Kandiduju za Serbski sejm, zo móhło so přichodnje towaršnostne wobdźělenje Serbow ze swójskeje perspektiwy lěpje poradźić.
2Mysl wo regionalnym parlamenće je fascinowaca. Wona z mojeho wida njewoznamjenja žane skonfrontowanje k dotalnym parlamentariskim zastupnistwam. Dźe skerje wo to, instrument jako přikładny rezonancny rum tak wuwić, zo regionalnu bliskosć z globalnymi potrěbnosćemi zwjedu.
3Wobdźělu so na tym ze swojeho wida trěbnu transparencu socialnych, towaršnostnych a politiskich poćahow takle zmóžnić, zo docpěwa wobdźělenje (participacija) formu, z kotrejž dohromady, jako w regionje a zwonka njeho žiwi ludźo, woprawdźite wobdźělenje na rozsudach nazhonimy.
Sandra WylemowaD 6
1Njemóže być, zo w serbskim sydlenskim rumje staršim šulu předpisuja, dokelž w blišich kubłanišćach žana Witaj-wučba njeje abo być njemóže. Njesmě dale być, zo su přeco hišće starši w sydlenskim rumje, kotřiž po wjace hač 15 lětach projekta Witaj móžnosć bilingualnych pěstowarnjow a/abo šulow njeznaja.
2Direktna demokratiska legitimacija kaž tež zjawne wuradźowanja a rozsudy tworja transparencu, bliskosć k wobydlerjam, zawjazanosć a politisku zwjazanosć. Wo regionalnych nadawkach, kaž stej to na přikład spěchowanje kultury a sporta a wosebje kubłanska politika, měło so we Łužicy dźiwajo na jeje wosebitosć dwurěčnosće dla rozsudźić.
3Moje polo je kubłanska politika. Dźěći a jich rěč/e su přichod! Wjacerěčnosć ma telko lěpšin. Łužica je wjacerěčna, štož mamy zachować a zesylnić. Dźěći měli so tu zakorjenić a wšitko za to činić, zo Łužica rozkćěje. Dźěći su přichodni tworićeljo hódnotow!
Jan KosykD 7
1Wuzwoleny sejm wutworić je po wšěch dotalnych pospytach konsekwentne. Zo bych wólby podpěrał a swoju generaciju – kotraž znaje serbstwo zwjetša jeno ze swjedźenjow a ze šule – zastupował, so na historiskim podawku wobdźělu.
2To je wuběrna móžnosć, wobstejace zwjazki a přirady wo politiski grat wudospołnjeć. Jenož hdyž wšitcy akterojo hromadźe dźěłaja, móžemy serbsku rěč a kulturu zachować.
3Moja naležnosć je zhromadne skutkowanje wšěch institucijow. Na jednej stronje dźe wo financne a kulturne spěchowanje, wo ničenje serbskeho sydlenskeho ruma brunicy dla abo wo turistiske móžnosće (strukturnu změnu). Nimo toho su to kubłanskopolitiske prašenja, kaž na přikład rozšěrjenje serbskeje wučby a dohladowanje dźěći. Na europskej runinje je wuměna z dalšimi mjeńšinami wažna, runje hladajo na Europu regionow.
Kito PjenkD 8
1Žiwe Serbstwo leži mi na wutrobje a ja sej myslu, zo dyrbimy nětko wšelake wěcy za přichod činić. Tohodla kandiduju. My trjebamy jedyn njewotwisny a ze swobodnymi wólbami legitimowany parlament a zastupnistwo za wšěch Serbow, za cyły serbski lud.
2Njedomowinjenjo nimaja žadyn hłós a lědma wobdźělenja. My trjebamy nowu demokratiju za wšitkich.
3Chcu so zasadźeć za naše serbstwo w Slepjanskej wosadźe, za serbsku rěč, projekt Witaj, strowy wobswět a jeho škit. Wažne su mi dale kónc wudobywanja brunicy, zachowanje serbskich wsow, pomnikoškit, nowe a humaniše hórnistwowe prawo a klimowy škit (COP 21).
