Připowědźa skóržbu přećiwo zapósłancam
Drježdźany (dpa/SN). Mandźelski bywšeje předsydki AfD Frauke Petry, Marcus Pretzell, chce wólbny pruwowanski wuběrk Sakskeho krajneho sejma prawokřiwjerstwa (Rechtsbeugung) dla wobskoržić. To je 45lětny jurist a zapósłanc Europskeho parlamenta pjatk na kromje sudniskeho procesa přećiwo swojej žonje wopačnych wuprajenjow dla na Drježdźanskim krajnym sudnistwje připowědźił. Skóržba měri so přećiwo šesćom z cyłkownje sydom čłonow wuběrka. Jenož něhdyša zapósłanča AfD Kirstin Muster je z toho wuwzata. Pretzell widźi „grawěrowace ranjenja“ ciwilneho procesoweho porjada. Wón mjez druhim z toho wuchadźa, zo běchu čłonojo wuběrka na posedźenju w nowembru 2015 ćišć na Petry wukonjeli.
Marcus Pretzell tež njewuzamkuje, zo předsydu wuběrka Marka Šimana (CDU), dźensnišeho kultusoweho ministra Christiana Piwarza (CDU) a politikarja Lěwicy Andréja Schollbacha wopačnych wuprajenjow dla wobskorži. Za to pak chce wón kónc sudniskeho jednanja přećiwo Frauke Petry wočaknyć.
Merkel měła kanclerka wostać
Köln (dpa/SN). Dwě třećinje wobydlerjow Němskeje stej přećiwo tomu, zo zwjazkowa kanclerka Angela Merkel (CDU) dočasnje wotstupi, a přejetej sej, zo wona hač do kónca wólbneje doby w lěće 2021 dale knježi. Tele přeće zwuraznja po dźensa wozjewjenym naprašowanju sćelaka RTL 67 procentow ludźi. Jeno 29 procentow woprašanych chcyło, zo Merkel zastojnstwo dočasnje spušći. Tak je ličba tych, kotřiž chcedźa Merkel dale za kanclerku měć, wot februara 2018 wo dwanaće procentow rozrostła.
W padźe dočasneho wotstupa Merkel je 56 procentow ludźi za nowowólby. Potom chcyło 39 procentow Annegret Kramp-Karrenbauer za nowu kanclerku měć, 28 procentow Friedricha Merza. 33 procentow nochce žanoho z wobeju.
Sćelak RTL na to skedźbnja, zo njeje połoženje z lětom 1998 přirunujomne, jako sej mnozy wotstup zwjazkoweho kanclera Helmuta Kohla přejachu. Nawopak: Hladajo na krizowe wuwiće po wšěm swěće njewidźi wjetšina ludźi w Němskej žaneje alternatiwy k Merkel.
Železo kować, dołhož so žehli
Zastupnistwo Serbski sejm namołwi Zwjazkowu republiku Němsku, „,dorěčenje wo domoródnych a w kmjenach žiwych ludow w njewotwisnych krajach‘ Mjezynarodneje organizacije za dźěło (ILO 169), kotrež je 5. septembra 1991 płaćiwosće nabyło, ratifikować kaž tež serbski lud jako indigeny narod w zmysle dorěčenja připóznać“.
Hodźij (SN/at). Wuběrk „wustawa/prawo“ noweho zastupnistwa je nadawk dóstał, zdobyć partnerow za přesadźenje wobzamknjenja; w jednanjach měli na to skutkować, je zwoprawdźić. To je wobsah wobzamknjenja z 5. posedźenja cyłka sobotu w Hodźijskim kantoraće.
Wabja dwurěčnje za swětowe namrěwstwo
Znate brune awtodróhowe tafle z turistiskimi pokiwami njejsu jenož w Delnjej a Hornjej Łužicy tež dwurěčne. Tele dny su w gmejnje Dannewerk blisko Schleswiga (Schleswigsko-Holsteinska) tajkej z němsko-danskim popisanjom aktualizowanej připrawili.
Dannewerk (SN/at). Štož njeje za módre puće pokazowace awtodróhowe tafle hišće móžno, zda so za brune tafle při awtodróhach, wabjace za wuznamne turistiske cile, zdawna samozrozumliwosć być: dwurěčne popisanje. Nimojěducych na wosebitostki skedźbnjeć njeje jenož naležnosć łužiskich turistikarjow.
To a tamne (11.03.19)
„Najstarši čłowjek swěta“ smě so Japanjanka Kane Tanaka wotnětka mjenować. Na swjatočnosći w starowni města Fukuoka přepodachu jej, kotraž je 116 lět a 68 dnjow stara, zastupnicy Guinnessoweje knihi rekordow sobotu wotpowědny certifikat. Loni w juliju bě jeje předchadnica jako najstarši čłowjek, tohorunja Japanjanka Chiyo Miyako, w starobje 117 lět a 81 dnjow zemrěła.
Ze zhromadnym picowanjom psow, tak mjenowanym „wooferendumom“, na naměsće před parlamentom w Londonje su britiscy wobsedźerjow psow přećiwo wustupej kraja z Europskeje unije protestowali. Pod hesłom „Brexit is a dog‘s dinner (brexit je wulki šmjat) woni swojim štyrinohačam něšto k žranju dawachu, žadajo sej nowy referendum. Z akciju chcychu tych pozbudźić, kiž su hižo rezignowali.
Manager Trumpa do jastwa
Washington (dpa/SN). Sudnistwo w staće USA Virginia je něhdyšeho wólbnobojoweho managera prezidenta Donalda Trumpa, Paula Manaforta, k nimale štyrjom lětam jastwa zasudźiło. Sudnistwo wosta tak jasnje pod žadanjom statneho rěčnistwa, Manaforta na 25 lět do jastwa tyknyć. Sudnistwo bě hižo loni w awgusće zwěsćiło, zo je Manafort dawkoweho jebanstwa a bankoweho wobšudnistwa dla winowaty.
Maas za dalše sankcije
Berlin (dpa/SN). Zwjazkowy wonkowny minister Heiko Maas (SPD) chce na prezidenta Venezuele Nicolása Madura dale ćišć wukonjeć. Tak móhł sej dalše sankcije přećiwo jeho režimej předstajić, kaž medijam zdźěli. Na njedawnym zetkanju wonkownych ministrow EU běchu wo tym rěčeli, Maas rjekny. Zdobom wotpokaza wumjetowanje, zo je so Němska do nutřkownych naležnosćow kraja měšała. Němska podpěruje tam kaž druhe kraje nawodu opozicije Juana Guaida.
Za čas šule njedemonstrować
K ćežkemu wobchadnemu njezbožu z třomi mortwymi dóńdźe dźensa ...
Dalše srědki na dobro wjesnych kónčin
AfD hrozy pokuta wjace hač 100 000 eurow
Berlin (dpa/SN). W aferje ilegalnych pjenježnych darow dla hrozy AfD pokuta wjace hač 100 000 eurow. Předsyda strony Jörg Meuthen wo tym informowaše, zo je zarjadnistwo zwjazkoweho sejma w tym prašenju prěnje rozsudy wobzamknyło. Zdobom Meuthen připowědźi, zo chce so spřećiwić a skoržić.
Šwicarska firma Goal AG bě lěta 2017 plakaty a dalše wabjenske srědki za wólbny bój kandidata AfD za Sewjerorynsko-westfalski krajny sejm Guida Reila zhotowiła. AfD nima to za ilegalny pjenježny dar na dobro strony. Zarjadnistwo zwjazkoweho sejma widźi to hinak a wukaza chłostanku, kotraž je trójce tak wulka kaž pjenježny dar.
Dulig: Bjez žonow njeby ničo šło
Drježdźany (dpa/SN). Sakski hospodarski minister Martin Dulig (SPD) sej žada, ze žonami w hospodarstwje fairnje wobchadźeć. „Bjez žonow by dźěłowy swět w Sakskej stejo wostał“, rjekny wón wčera w Berlinje hladajo na dźensniši Mjezynarodny dźeń žonow. Bjez žonow njeby Sakska jenož chětro zrudny blečk była, ale njeby tež hospodarsce wobstać móhła. „Busy a tramwajki bychu stejo wostali, lěkarske praksy a šule zawrjene“, hospodarski minister zwěsći.
Po słowach Martina Duliga je w Sakskej nadpřerěznje wjele žonow powołansce aktiwnych, w starobje 18 do 65 lět na wšě 78 procentow. Tež podźěl powołanskich kwalifikacijow a wysokošulskich wotzamknjenjow je wulki. „Cyła towaršnosć ma swoje lěpšiny wot najlěpje wukubłaneje žónskeje generacije wšěch časow. Njeje ani jeničkeje přičiny, čehodla měli žony mjenje zasłužić hač jich muscy kolegojo. Samsna mzda za samsne dźěło dyrbjała samozrozumliwa być.“
