Milwaukee (dpa/SN). Prezident USA Donald Trump je hněwny, zo planuje twarc motorskich Harley Davidson, dźěl swojeje produkcije nowych chłostanskich cłow Europskeje unije dla z Ameriki wurjadować. „Sym překwapjeny, zo Harley Davidson jako prěnje předewzaće běłu chorhoj wupowěsnje“, Trump twittero­waše. Předewzaće argumentuje, zo so mašiny po zwyšenju cłow w Europje wo ně­hdźe 2 200 dolarow podróša.

Tež Španiska ćěkancow nochce

Madrid (dpa/SN). Němska pomocna łódź „Lifeline“ z něhdźe 230 ćěkancami čaka dale na dowolnosć, do jednoho z přistawow dojěć směć. Tež Španiska je Drježdźanskej organizaciji Mission Lifeline zakazała, přistawy kraja wužiwać. Mjeztym so połoženje na łódźi přiwótřa, dokelž so wjedro spochi pohubjeńša. Lifeline, kotraž bě minjeny štwórtk ludźi na morju wuchowała, přeco hišće před kupu Malta čaka. Pječa je so francoski prezident Emmanuel Macron za to wuprajił, zo měła Malta ćěkancow přiwzać.

Přećelstwo potwjerdźił

Berlin (dpa/SN). Bywši předsyda SPD Sigmar Gabriel warnuje před zahubnymi sćěhami za Němsku a Europu, dyrbjała-li knježerstwowa koalicija rozpadnyć. „Prašam so, hač su woni wobłudnili“, rjekny Gabriel w rozmołwje z powěsćernju dpa. „Runje jako socialdemokrat praju: Na­dźijam so, zo Angela Merkel kanclerka wostanje. Wona dźě je waha Němskeje w Europje a nawopak waha Europy w Němskej. To prawdźepodobnje wjetšinje tamnych pobrachuje.“ Wodźacy zastupnicy CDU, CSU a SPD chcedźa so dźensa wječor wosrjedź raznych rozestajenjow azyloweje politiki dla w koaliciskim wuběrku schadźować.

„Bavaria first, rěka hesło CSU“ měni Gabriel hladajo na wólby Bayerskeho krajneho sejma lětsa nazymu a na pospyt, rozmach AfD wobmjezować. „To je jara riskantne. Wolerjo njebudu CSU mytować, hdyž zwjazkowu republiku zni- či a Němsku a Europu do chaosa storči.“ W rjadach CSU je so po wudyrjenju krizy ćěkancow dla 2015 „tójšto nakopiło ­a drje nětko bjez kontrole wubuchnje“.

Blidotenisowy rekord nastajiło je wjace hač tysac šulerjow w Düsseldorfje. Dokładnje 1 252 dźěći a młodostnych z 25 šulow a institucijow je so w Düsseldorfskim koparskim stadionje zešło, zo bychu blidotenis hrali. Dotalny rekord 508 wobdźělnikow z lěta 2017 su tak wjac hač podwojili. Pomocnicy běchu 102 tenisowej blidźe nastajili, zo móhli wobdźělnicy „kołoběh“ hrać. Při tym wjacori blidotenisća za samsnym blidom hraja, běhajo wot jedneje strony na druhu.

Mortweho delfina wosrjedź lěsa namakała je ruska turistka njedaloko čornomórskeho Sočija. Žona hnydom zamołwitych informowaše, po tym zo bě so njedaloko awtodróhi wuchodźowała. Dotal njemóža sej rozkłasć, kak je dwaj metraj dołhe zwěrjo do lěsa přišło. Móžno, zo běchu delfina ilegalnje w zwěrjencu dźerželi, zo je na transporće zahinył a zo su jeho na to w lěsu wotbyli.

Vatikan (B/SN). Wotstronjenje zakaza wotehnaća přez ludowy rozsud w Irskej Vatikan jara wobžaruje. „Wěrju, zo njemóžeš tu žohnowanje wozjewić“, rjekny prezident Bamžowskeje akademije za žiwjenje, arcybiskop Vicenco Paglia. „Nětko dyrbimy hladać, na kotre zakonske rjadowanje so politikarjo dojednaja.“ Hač do kónca lěta ma so nowy zakoń, kotryž wotehnaće hač do dwanateho tydźenja samodruhosće dowola, schwalić.

Nowy bus za zbrašenych

Zhorjelc (B/SN). Nowy bus za zbrašenych ma Caritas w Zhorjelcu. Jim móža nětko wosebje ambulantne słužby wolóžić. Z „Akciju čłowjek“ je so poradźiło, wobstarać mały bus z dźewjeć městnami. 70 procentow cyłkownych kóštow, ni­male 50 000 eurow, přewza mjenowana akcija. Bus zasadźa hižo w Mengelsdorfskim domje Carity na lětušim swjedźenju wobydlerjow.

Vatikan přiručku wotpokazał