To a tamne (04.07.18)
Njewočakowanu psyču pomoc dósta Lipšćanska policija z Bremena. Na wučušlenje drogow trenowany pos Crawford, kotryž bě zhromadnje ze swojej wobsedźerku w Sakskej na dowolu, je w jednym z Lipšćanskich parkow marihuanu namakał. Wobsedźerka Crawforda je runja swojemu psej w słužbje Bremenskeje policije. Wobaj so po parku při Hłownym dwórnišću wuchodźowaštej, hdźež pos cigaretowu tyzku z drogami wučucha. Namakanku policija sobu wza.
Wjace hač 1 000 listow z pjenjezami a dobropisami a něhdźe 150 pakćikow je listonošerka w hessenskim Bad Hersfeldźe překřiwiła, načiniwši tak 15 000 eurow škody. 33lětnu padušnicu zwěsćichu, po tym zo běchu so ludźo hóršili, zo wočakowana póšta njedochadźa. Nimo toho bě žona kradnjene handyje a laptopy stajnje w samsnym wobchodźe předawała.
Trump kritizuje Němsku
Washington/Brüssel (dpa/SN). Do wjerškoweho zetkanja NATO přichodny tydźeń w Brüsselu je prezident USA Donald Trump Němsku a někotrych dalšich zwjazkarjow z raznymi słowami kritizował, dokelž přemało za zakitowanje a brónjenje wudawaja. Nimo toho wón w lisće warnuje, zo móhli USA sćerpnosć zhubić, dokelž čłonske kraje wojerskeje aliancy swoje přilubjenja njedźerža. Trumpa wočakuja na wjeršku NATO 11. a 12. julija w Brüsselu.
Nowa žołma ćěkancow
Damaskus (dpa/SN). Wótre boje na juhu Syriskeje su po informacijach pomocnikow nowu dramu ćěkancow zawinili. Minjenej tydźenjej je w kónčinje wokoło města Dara, kotruž zběžkarjo kontroluja, znajmjeńša 270 000 ludźi před wojowanjemi a bombardowanjom ćeknyć dyrbjało, rěčnik pomocneho skutka UNHCR zdźěli. Ćěkancy su zadwělowani, dokelž móža sej jeničce do regionow wućeknyć, kotrež wojacy knježerstwa kontroluja. Jordaniska njemóže dalšich ćěkancow přiwzać a je mjeztym swoju mjezu zawrěła.
Woda w Němskej špatna
Dypkownje k zahajenju prózdnin trjebachu ludźo wčera na awtodróze ...
Dyrbja čakać
EU přepytuje přećiwo Pólskej
Brüssel (dpa/SN). Planowaneho dočasneho pensionowanja sudnikow najwyšeho sudnistwa w Pólskej je komisija EU jednanje ranjenja europskich zakonjow dla zahajiła, kaž wčera z Brüssela zdźělichu. Hladajo na wočakowane zwoprawdźenje naprawy ma komisija za trěbne spěšnje jednać. Pólska ma měsac chwile, wotpowědne stejišćo zapodać.
Nowy pólski zakoń, kotryž hižo wot apryla płaći, předwidźi, zo dyrbja najwyši sudnicy wot 3. julija hižo z 65 lětami na wuměnk hić a nic kaž dotal ze 70. Noworjadowanje by třećinu sudnikow potrjechiło. Štóž chcył w zastojnstwje wostać, dyrbi statneho prezidenta Andrzeja Dudu wo to prosyć. Kritkarjo so boja, zo móhło knježerstwo jemu njelubych sudnikow tak dočasnje wotstronić. Komisija EU je problem hižo narěčała, wotmołwa z Pólskeje pak njespokoja.
Šwikaja azylowy kompromis
Berlin (dpa/SN). Azylowy kompromis mjez CDU a CSU zbudźa raznu kritiku opozicije. Předsyda Zelenych Robert Habeck šwika jón jako wožiwjenje starych idejow. „CDU a CSU staj namjet z lěta 2015 wukramosćiłoj a předawatej jón nětko jako dojednanje“, rjekny Habeck powěsćerni dpa w Berlinje. „Tón stary čapor sypnjetej wonej nětko před durje SPD a praja, super, wšitko je w porjadku. Při tym je SPD wone transitne pasma jako masowe lěhwa hižo tehdy wotpokazała.“
Předsyda Lěwicy Bernd Riexinger twitterowaše: „Transitne pasma su masowe interněrowanske lěhwa, kotrež su na škodu čłowjeskosće.“
Kritika jewi so tež w rjadach socialdemokratow. „SPD je zawrjene lěhwa jasnje wotpokazała“, rjekny předsyda Młodych socialistow Kevin Kühnert.
Zwjazkowa kanclerka Angela Merkel (CDU) a předsyda CSU Horst Seehofer běštaj so wčera na kompromis dojednałoj a tak zwrěšćenju koalicije zadźěwałoj.
To a tamne (03.07.18)
Awto z rěki wućahnyć je wohnjowa wobora w Lipsku dyrbjała. 22lětny muž bě wóz na brjohu Běłeho Halštrowa wotstajił, bjez toho zo by ručne borzdźidło přićahnył. Awto jědźeše na to runu smuhu do wody. Hač hodźi so wone nětko hišće wužiwać, nichtó njewě.
Swoju maturitnu klawsuru wospjetować dyrbješe 33 francoskich šulerjow, dokelž bě něchtó jich pruwowanske podłožki pokradnył. Před dobrym tydźenjom pisane klawsury buchu z awta pruwowarja spakosćene, zdźěli rěčnik zamołwiteho šulskeho zarjada w Orléansu. Abiturienća dyrbjachu tuž pruwowanje w socialnych a hospodarskich wědomosćach znowa pisać. W Francoskej maja centralnu maturu, a tohodla dóstawaja wšitcy šulerjo samsne pruwowanske nadawki. Policija přeco hišće za kradnjenymi klawsurami pyta.
Wučba přećiwo antisemitizmej
Berlin (B/SN). Berlinska CDU je žadanje za wólnym předmjetom w šuli zesylniła. Wučba nabožiny jako alternatiwa k předmjetej etika móhła wažny přinošk w boju přećiwo antisemitizmej być a móhła k tomu přinošować, zo muslimscy młodostni nabožinu wopak njeinterpretuja.
Přepytuja wěstotu cyrkwje
Berlin (B/SN). Po zasadźenju policije z wužiwanjom bróni w Berlinskej katedrali, při čimž buštej dwě wosobje zranjenej, pruwuje cyrkwinska wosada móžne konsekwency. Prědar Thomas C. Müller pokaza pak na to, zo ma Berlinska hłowna cyrkej hišće bóle zawěsćena być hač druhe Bože domy. Wosada dźěła hromadźe z priwatnej wěstotnej słužbu, kotraž tam wodnjo a w nocy stražuje.
Pisane stawizny traja 120 lět
Magdeburg (B/SN). Na swoje 120lětne wobstaće móžeše katolska pěstowarnja swj. Marije w Magdeburgu-Sudenburgu njedawno spominać. We wobłuku swjedźenskeho tydźenja so na to dopominachu, kak běchu šěre sotry z kongregacije swj. Hilžbjety dom 1898 załožili a zo ma wón zawěrno pisane stawizny.
Hódnoty za towaršnosć
Zeleni zwólniwi za knježerstwo
Berlin (dpa/SN). Sobupředsyda Zelenych Robert Habeck njewuzamkuje, zo so strona na nowej knježerstwowej koaliciji wobdźěli, dyrbjała-li wulka koalicija SPD, CDU a CSU zwrěšćić. „Smy zwólniwi zamołwitosć přewzać, hdyž so to wudani“, rjekny Habeck dźensa w rańšim magacinje ZDF. Hač zwjazkowa kanclerka Angela Merkel (CDU) prašenje dowěry staji, njemóžeše wón prajić. „W tajkim kołwrótnym času njemóžeš ničo wuzamknyć.“ Wot Merkel nawjedowane mjeńšinowe knježerstwo podpěrać njeby Zelenym „žadyn atraktiwny poskitk był“.
Kapitan před sudnistwom
Valletta (dpa/SN). Němski kapitan wuchowanskeje łódźe „Lifeline“ dyrbješe dźensa dopołdnja na kupje Malta před sudnistwo. Claus-Peter Reisch měješe so za wuchowanje 230 migrantow před libyskim pobrjohom wusprawnić. Powšitkownje wočakowachu, zo sudnistwo kapitanej wumjetuje, zo bě wukazy ignorował wuchowanje ćěkancow libyskej mórskej straži přewostajić. Maltaske knježerstwo chce łódź, kotraž njeje pječa porjadnje registrowana, sćazać.
Za hólcami dale pytaja
