Prawicarski politikar wólby dobył
Ljubljana (dpa/SN). W Słowjenskej, čłonskim kraju EU a NATO, je nawoda prawicarskokonserwatiwneje opozicije Janez Janša wólby parlamenta dobył. Jeho strona SDS zawěsći sej 25 z cyłkownje 90 mandatow ludoweho zastupnistwa, kaž narodna telewizija wčera wječor po wuličenju nimale wšitkich hłosow w Ljubljanje zdźěli. Druha najsylniša politiska móc bu prěni króć nastupjena strona LMS měšćanosty a bywšeho komikarja Marjana Šareca, kotraž zdoby sej 13 mandatow, medije informuja.
Janša bě we wólbnym boju připowědźił, zo chcył Słowjensku hermetisce přećiwo ćěkancam a migrantam zawrěć. 59lětny bjerje sej susodnu Madźarsku pod Viktorom Orbánom za přikład.
Dotal njeje jasne, hač móže Janoz Janša knježerstwowu koaliciju zestajeć. Statny prezident Borut Pahor je připowědźił, zo wólbnemu dobyćerjej wotpowědny nadawk přepoda. Janša bě wot lěta 2004 do 2008 a wot 2012 do 2013 hižo raz šef knježerstwa. Korupcije dla sedźeše krótki čas w jastwje.
To a tamne (04.06.18)
Powětrowej balonkaj stej sobotu pola Drježdźan zasadźenje helikoptera zawiniłoj. Wěža lětanišća bě policiju wo zadźěwku w čarje informowała, po kotrejž mašiny přileća. Wobsadka policajskeho helikoptera wšak zwěsći, zo njejstej balonaj strašnej. Wuknjacy zakładneje šule běchu balonki na dnju dźěsća pušćeli a mějachu samo dowolnosć, kotraž je w susodstwje lětanišća stajnje trěbna.
Piwčenja dla su w Bremerhavenje policiju wołali. Rentnarka bě zdźěliła, zo sedźi ptačk w jeje kuchni a žałostnje piwči. Zastojnicy piwčenje tohorunja słyšachu. Te pak pochadźeše wot kuroweho alarmowaka na wjerchu, kotrehož baterije běchu słabe, a je hnydom wuměnichu.
Z ćahom sama kupać jěła je pjećlětna w hessenskim Bad Arolsenje. Hakle w dźěćacym bazenku wona personalej napadny. Staršej běstej jej dźeń do toho přilubiłoj, zo kupać pojědu. Dokelž to holčce spěšnje dosć njeńdźeše, sej wona sama do kupjele wuleća
Nowe italske knježerstwo
Rom (dpa/SN). Prawniski wědomostnik Giuseppe Conte je w Italskej znowa nadawk dóstał, nowe knježerstwo wutworić. Wone měło z hibanja Pjeć hwězdow a prawicarskeje Lega wobstać. Statny prezident Sergio Mattarella bě jemu nadawk wčera oficialnje přepodał. Hišće w běhu dnja chcychu nowych ministrow kabineta spřisahać. Parlament dyrbi nowemu knježerstwu hišće přihłosować. Tole pak je tak derje kaž wěste, dokelž matej Pjeć hwězdow a Lega tam wjetšinu.
Rajoy wotwoleny
Madrid (dpa/SN). Španiska je dźensa historiski dźeń dožiwiła: Parlament kraja je ministerskeho prezidenta Mariana Rajoyja wotwolił. 180 z cyłkownje 350 zapósłancow hłosowaše we wotumje njedowěry přećiwo 63lětnemu. Nawoda socialistiskeje strony Pedro Sanchez bě wotum njedowěry nastorčił. Rajoy je prěni knježerstwowy šef Španiskeje, kotryž dyrbi pobrachowaceje dowěry dla wotstupić. Konserwatiwna Ludowa strona Rajoya je chětro hłuboko do korupciskeje afery splećena.
Njewjedra znowa zachadźeli
Słódny lód w horcoće dadźa sej Vaska Kitanova, Elena Stojčeva a ...
Kritizuja nowe cła
Washington (dpa/SN). Wot USA jednostronsce wukazane cła na wocl a aluminij z Europy wot dźensnišeho płaća. Na importy žadaja sej USA nětko 25 procentow pola wocla a dźesać procentow na aluminij. To samsne płaći za importy z Kanady a Mexika. Zwjazkowe knježerstwo ma cła za njezakonske, kaž jeho rěčnik Steffen Seibert zdźěli.
Hospodarski minister Peter Altmaier (CDU) je mjeztym raznu reakciju EU připowědźił. Zwjazk němskeje industrije kritizuje, zo Trump wuwiće transatlantiskeho partnerstwa wo lětdźesatki wróćo ćisnje. „Bjezkompromisne postupowanje Trumpa je krótkowidne a jemu samomu na škodu“, rjekny prezident zwjazka Dieter Kempf. Francoski prezident Emmanuel Macron ma cła za „ilegalne“.
Nowe komando NATO
Krajej tajnych jastwow CIA dla zasudźenej
Straßbourg (dpa/SN). Europske sudnistwo za čłowjeske prawa je Rumunsku a Litawsku zasudźiło, dokelž buchu na statnym teritoriju wobeju krajow w tajnych jastwach ameriskeje tajneje słužby CIA čłowjeske prawa wospjet ranjene. Zamołwići we woběmaj krajomaj su wo wonych jastwach wědźeli a najebać to z wonkownej tajnej słužbu USA hromadźe dźěłali, sudnicy w Straßbourgu zdźělichu. Z tym su hrožace ranjenja čłowjeskich prawow ćerpjeli.
Skóržbu zapodałoj běštaj bjezstatny Palestinjan a muž ze Sawdi-Arabskeje. Wobaj twjerdźeštaj, zo buštaj w tajnych jastwach čwělowanaj. Mjeztym sedźitaj w dwělomnym jastwje USA Guantánamo na Kubje. Palestinjanej wumjetuja, zo je nadpady na World Trade Center w New Yorku 11. septembra 2001 sobu přihotował. Muž ze Sawdi-Arabskeje je pječa atentaty na łódźe přewjedł.
Na kolesu za škit alejow w Němskej
Sellin (dpa/SN). Z 1 900 kilometrow dołhej jězbu wot Rujanow hač k Bodamskemu jězorej chcedźa přirodoškitarjo a kolesowarjo na trěbny škit němskich alejow skedźbnić. Po informacijach přirodoškitneho zwjazka BUND, kotryž dźensa so zahajacu jězbu sobu organizuje, je wulki dźěl starych alejow w přiběrajcy špatnym stawje. Někotre su drje rjane a derje hladane, druhe porno tomu su „sadźane a zabyte“, rjekny zamołwita sobudźěłaćerka Katharina Dujesiefken.
Jězba, kotruž zahajichu dźensa rano w Sellinje, powjedźe wobdźělnikow hač do 15. junija mjez druhim wot Mecklenburgsko-Předpomorskeje přez Braniborsku hač do Bayerskeje a Badensko-Württembergskeje. Při tym chcedźa so kolesowarjo nadrobnje wo stawje němskich alejow wobhonić.
To a tamne (01.06.18)
Zwěrjacu pomoc je stražnistwo Wojerowskeho zwěrjenca minjeny kónc tydźenja dóstało. W nocy na njedźelu bě so pjeć wosobow z Wojerowskeje kónčiny do coologiskeje zahrody zadobyło a wótře wołajo po terenje běhało. Na to reagujo započachu šěre čaple škrěčeć. Sobudźěłaćerjej města, kiž runje nimo běžeše, njewšědna hara napadny. Zadobywarjow wuhladajo wón policiju informowaše, kotraž skućićelow nachwilnje zaja. Nětko přepytuje kriminalna policija.
Agilny rój pčołkow je w Awstriskej wohnjowu woboru zaběrał. Tysacy pčołow bě so najprjedy na kolesu a potom na awće zaměstniło, kaž rěčnik wohnjoweje wobory w Kremsu, 80 kilometrow sewjernje Wiena, zdźěli. Za tajke situacije specielnje wukubłany wohnjowy wobornik pčołki popadny a přesydli, po tym zo bě je z wodu popryskał.
Region na kromje wójny
New York (dpa/SN). Eskalacija namocy mjez militantnymi Palestinjanami a Israelom pokazuje po měnjenju wosebiteho pósłanca UNO za Bliski Wuchod Nikolaja Mladenowa, zo je region „kóždy dźeń na kromje wójny“. Na wurjadnym posedźenju Bjezstrašnostneje rady UNO Mladenow mjezynarodnu zhromadnosć namołwješe, nadpady Palestinjanow na Israel zasudźić. Zdobom wón na to pokaza, zo steja ataki w direktnym zwisku z tydźenje trajacymi protestami Palestinjanow, při kotrychž běchu israelscy wojacy wjace hač sto demonstrantow zatřělili.
Muž z nožom bě ćěkanc
