Tři njewuprajene sady
Drježdźany (SN/at). Je ministerski prezident Michael Kretschmer (CDU) w swojej knježerstwowej deklaraciji něšto na adresu Serbow prajił, abo njeje wón? W manuskripće znajmjeńša čitamy: „Našej domiznje přisłušeja Serbja. Tuta cyle wosebita mjeńšina nas zwjesela. Woni su Němcy a Saksojo a pěstuja swoju kulturu.“ Zapósłanc Hajko Kozel (Lěwica) piše k tomu na Twitteru: „Sym to najprjedy přesłyšał.“ A cituje wone tři sady w němskej rěči. Tute ma wón za prawe, formulaciju pak za diskusijehódne. Redakcija je nahrawane słowa premiera hišće raz w internetnej dokumentaciji krajneho sejma pruwowała, a zwěsćiła, zo njebuchu prajene.
Zapósłanc Marko Šiman (CDU) ma narěč ministerskeho prezidenta zdobom za signal, zo so naležnosće rjaduja, kotrež su ležo wostali. „Mam nadźiju, zo zaso do politiskich kolijow přińdźemy, kotrež so sylnišo problemam w našim kraju wěnuja“, rjekny Šiman našemu wječornikej.
To a tamne (01.02.18)
Rjedźenske robotery so tele dny na Berlinskim Hłownym dwórnišću wubědźuja. Cyłkownje štyri wšelake nastroje toho razu srěbaja, trěja a rjedźa. Najlěpšemu roboterej kiwa zrěčenje Němskeje železnicy za dwulětnu testowu dobu. Při tym hladaja zamołwići na to, kak porjadnje roboter rjedźi, kak derje sam nawigěruje a kak lochko hodźi so posłužować. Roboter ma personal dwórnišća podpěrać a ma tež njedźelu a w nocy dźěłać.
Lěni listonoš je přez lěta wjace hač poł tony listow nakopił, město toho zo by je roznosył. Policija namaka njedaloko města Vicenza w sewjernej Italskej mjez druhim zličbowanki, dawkowe informacije, wabjenja a chłostanki. 56lětnemu listonošej wobswědčichu „njelóšt“. Je to dotal najwjetša namakanka njeroznošenych listow w Italskej. Nětko chcedźa je adresatam posrědkować.
Kretschmer: Nowy rozmach trěbny
Drježdźany (SN/MkWj). Nowy sakski ministerski prezident Michael Kretschmer (CDU) je wobydlerjow swobodneho stata pohonjował, so zhromadnje za nowy rozmach w kraju zasadźeć a so na nowe puće zwažić. W swojej knježerstwowej deklaraciji wón dźensa w Sakskim krajnym sejmje apelowaše, towaršnostny cyłk zachować a dobru zhromadnosć w kraju pěstować. „Swobodny stat ma wšitke šansy do dobreho přichoda“, wón w tym zwisku rjekny.
We wobłuku stodnjowskeho programa chcył wón dale wutwarić, štož bě jeho předchadnik Stanisław Tilich (CDU) nastorčił. Wuraznje so Kretschmer Tilichej za jeho skutkowanje dźakowaše, „kotrež sej tež druhdźe waža“, tak Kretschmer.
Zhromadny namjet frakcijow
Podstupim (SN/at). Z namjetom k wobzamknjenju chcedźa frakcije Lěwicy, SPD, CDU a Zwjazka 90/Zelenych docpěć, zo braniborske knježerstwo wuměnjenja za wažne serbske naležnosće polěpša. Na inciatiwu frakcije Lěwicy nastaty dokument zapodaja w zwisku z wobjednanjom prěnjeje serbskeje rozprawy krajneho knježerstwa jutře w Krajnym sejmje Braniborskeje. Parlamentownicy maja po rozrěči wo tymle namjeće wothłosować.
Kaž tam rěka, namołwi krajny sejm braniborske knježerstwo na přikład pruwować, hač móže so kraj we wobłuku swojeho budgeta bóle na přidatnych kóštach wobdźěleć, wurosćacych z Witaj-skupin a dźěćacych dnjowych přebywanišćow. Knježerstwo měło dale we wuskej wuměnje z Radu za naležnosće Serbow zawěsćić, zo nowe Serbske šulske postajenje najpozdźišo wot spočatka šulskeho lěta 2019/2020 płaći.
Runje tak prosy krajny sejm komuny w serbskim sydlenskim rumje, swoje w nowym Serbskim zakonju zakótwjene nadawki zwoprawdźić a sej při tym, kaž w zakonju postajene, kóšty zarunać dać.
Gabriel w Israelu
Jerusalem (dpa/SN). Dźewjeć měsacow po eklaće při nastupnym wopyće wonkowneho ministra Sigmara Gabriela w Israelu je ministerski prezident Benjamin Netanjahu dźensa politikarja SPD w Jerusalemje přjał. Loni w aprylu bě Netanjahu zetkanje z Gabrielom krótkodobnje wotprajił, po tym zo bě so němski politikar ze zastupnikami knježerstwu napřećo kritisce nastajenymi organizacijemi zetkał. Gabriel chcył so tónkróć tež z palestinskim prezidentom Abbasom zetkać.
Wjace personala w hladarnjach
Berlin (dpa/SN). Unija a SPD su so w swojich koaliciskich jednanjach na to dojednali, hladarjow chorych a starych přichodnje lěpje zapłaćić. Nimo toho chcedźa w hladanskim wobłuku hnydomne naprawy k polěpšenju personalneje situacije přesadźić. Tak chcedźa za lěkarske hladanje w starownjach a hladarnjach 8 000 nowych přidatnych fachowych mocow zasadźić. Zhromadnje z tarifowymi partnerami chedźa so wo to postarać, zo so přichodnje wšitcy přistajeni po tarifowych zrěčenjach płaća.
Pašowarjow ludźi zajeli
Jastwo wostanje
Zdźěłuja wustawu
Dźěłodawarjo Sakskeje šwikaja dźěłarnistwo
Drježdźany (dpa/SN/MkWj). Dźěłodawarjo metaloweje a elektroindustrije Sakskeje su wot dźěłarnistwa IG metal planowane cyłodnjowske stawki jako njepřiměrjene kritizowali. To by tarifowy konflikt njetrjebawši přiwótřiło, kritizowaše zwjazk wčera w Drježdźanach. Namołwy poćahuja so na žadanje za zwyšenjom mzdow wo šěsć procentow, kotrež chcychu dźěłodawarjo hižo w minjenym tarifowym kole w Badensko-Württembergskej spjelnić, poskićejo 6,8 procentow w běhu 27 měsacow. Na stawki wusměrjena taktika dźěłarnistwa tuž spěšne dojednanje za jednanskim blidom znjemóžnja, kaž dźěłodawarjo zdźěleja. „Z tajkim přehnatym postupowanjom fronty dale sprostnu.“
To a tamne (31.01.18)
Wužiwar drogow je so ze skóržbu blamował a dyrbi sej nětko wusměšowanja w interneće lubić dać. 43lětny bě so pola policije w Rostocku přizjewił a rjekł, zo jemu dealer město marihuany jenož jednoru trawu předawa. A wón bě dealerej za „drogi“ swój drohotny časnik přewostajił. Tón wšak je nětko fuk. Nimo toho ma muž skóržbu ranjenja zakonja wo wopojnych jědach dla na starosći. „Tak hłupy tola nichtó być njemóže“, rěka jedna z reakcijow na Twitteru.
Čehodla sej lochko činić, hdyž tež ćežko dźe: Mjez stabami železnych wrotow tčacy wostał je pjany w Mnichowje, jako chcyše do dwora. Wohnjowa wobora jeho wuswobodźi, po tym zo běchu wobydlerjo rano zahe wołanje muža słyšeli. Lochce zdrasćeny bě tón hižo chětro přemjerznjeny. Na kóncu so wukopa, zo njeběchu wrota ani zamknjene.
Hač do wječora so dojednać
Berlin (dpa/SN). Generalny sekretar SPD Lars Klingbeil je optimistiski, zo so unija a SPD w dźensnišich rozmołwach hač do wječora w prašenju přićehnjenja swójbnych w Němskej přebywacych ćěkancow dojednatej. Kaž pak wón rozhłosownikam rjekny, „sedźa strony z jara wšelakimi pozicijemi za jednanskim blidom“. W sonděrowanskich jednanjach běchu so na to dojednali, přićehnjenje swójbnych na tysac ludźi wob měsac wobmjezować. SPD chcyła ličbu we wosebje krutych padach powjetšić.
Žane pospyty ze zwěrjatami
Berlin (dpa/SN). Awtotwarc Volkswagen chcył so po rozprawach wo dwělomnych pospytach ze zwěrjatami w zwisku z wotpłunom dieselowych awtow pospytow přichodnje wzdać. „Tajke něšto njesmě so wjace stać“, rjekny generalny społnomócnjeny VW Thomas Steg nowinarjam. Awtotwarc chcył podawki w USA přepytować dać, hdźež běchu wopicy zasadźili, kotrež dyrbjachu wotpłun wěsty čas zadychać. Zwjazkowy justicny minister Heiko Maas (SPD) mjenowaše to „šokowace informacije“.
Posedźenje přestorčene
