Kónc za jenakosplažne mandźelstwa
Žane změny dawka za diesel
Nimale 60 jatych dočasnje domoj
Podstupim (dpa/SN). Braniborska justica je lětsa hižo 59 jatych we wobłuku hodowneje amnestije dočasnje domoj pušćiła. Mjez nimi je 34 jatych, kotřiž běchu k jastwu zasudźeni, kaž justicne ministerstwo na naprašowanje powěsćernje dpa zdźěli. W 25 padach běchu jeći w tak mjenowanej narunanskej jatbje, dokelž njeběchu wot sudnistwa napołoženu chłostanku zapłaćili.
Jeći móža wo amnestiju prosyć, hdyž so čas postajeneje jatby mjez nowembrom a spočatkom januara kónči. Wažne wuměnjenje pak je, zo so jeći w jastwje porjadnje zadźerža. W ćežkich padach kaž mordarstwach abo splažnych njeskutkach je amnestija wuzamknjena.
Loni běchu 95 jatych do hód z jastwa pušćili, ministerstwo zdźěla. Za wobhnadźenje tajkeho razu bě so braniborski justicny minister Helmut Markow (Lěwica) wosobinsce zasadźił. Minister ma rozsudźić, hdyž běchu jatych w druhich zwjazkowych krajach zasudźili, woni pak nětko w braniborskich jastwach sedźa. Jednu próstwu je wón wotpokazał.
To a tamne (21.12.15)
Po fatalnym zaměnjenju dobyćerki wólbow Miss-Universe w Las Vegasu je prezident Kolumbiskeje Juan Manuel Santos na 2. městno wuzwolenu Ariadnu Gutiérrez wosobinsce tróštował. Jej běchu na kóncu wubědźowanja hižo krónu a šerpu dobyćerki přepodali, jako moderator misnjenje spózna a zdźěli, zo je němska Philippinjanka Pia Alonzo Wurtzbach nowa Miss-Universe. Kolumbiske nowiny přewšo rozhorjene na panu reaguja.
Wóń kisykała je w hornjobayerskim Waldkraiburgu zasadźenje wohnjoweje wobory zawiniła. Kaž policija zdźěli, bě so muž na schodźe wjaceswójbneho domu płunoweho smjerda dla nastróžił a zastojnikow wołał. Wone pak njemóžachu runje tak kaž wobornicy ničo zwěsćić, wšako tam scyła z płunom njetepja. Skónčnje přičinu nańdźechu: Jedna z wobydlerkow bě krótko do toho kisykał wariła.
Łužica (21.12.15)
Wjele kupcow z Pólskeje
Frankfurt n. W. (dpa/ch/SN). Braniborske wikowanje je wot štwórteho adwentneho kónca tydźenja profitowało, rozprawja powěsćernja dpa. Předewšěm nakupowanskej centeraj w Choćebuzu a Podstupimje stej wjele ludźi přiwabiłoj. Do namjeznych městow, kaž do Frankfurta nad Wódru, je nimo toho wjele kupcow z Pólskeje přijěło. Štwórty adwentny kónc tydźenja zhladowachu předawarjo, přirunujo z předchadźacymi, na najwjetši wobrot. Wjetši dźěl wikowarjow je wobrot lońšeho lěta docpěł. Jeničce tekstilne a črijowe wobchody skorža pobrachowacych kupcow dla. Přičina su miłe temperatury.
Přichod lětanišća njewěsty
Marko Suchy so rozžohnuje
Ćěkancy ze Syriskeje su dźensa do swojeho noweho kwartěra w ...
Wonkowne hranicy Europskeje unije škitać
Seehofer pojědźe k Putinej
Šiman: Móžnosće spěchowanjabóle wužiwać
Budyšin (SN/MkWj). Łužiske towarstwa, tež serbske, dyrbjeli spěchowanske móžnosće za mjezy přesahowace projekty z pólskimi a čěskimi partnerami bóle wužiwać. Tole žada sej serbski zapósłanc CDU w Sakskim krajnym sejmje Marko Šiman. Kaž wón dźensa na nowinarskej rozmołwje w Budyšinje rozłoži, je swobodny stat w tym zwisku region rozšěrił, w kotrymž so tajke projekty we wobłuku spěchowanskeho projekta Cil 3 spěchuja. Wot najnowšeho słušatej tež něhdyši Kamjenski wokrjes a město Wojerecy do tohole regiona. Jeno za saksko-čěske projekty přewostaja swobodny stat z europskich srědkow hač do lěta 2020 na wšě 160 milionow eurow, za saksko-pólske projekty 70 milionow. Spěchowanje próstwy wobdźěłuje Sakska natwarna banka.
Šiman na to skedźbni, zo by sej hišće wjace mjezy přesahowacych projektow přał. „Tak wuwiwaja so kontakty a partnerstwa a tak tež dobre mjezsobne susodstwo“, wón wuzběhny. W kóždym padźe je partnerske zrěčenje mjez němskim a čěskim/pólskim wobdźělnikom trěbne.
