Pegida šćuwa
Por eurow wjac a tola mjenje
Buntenbach: Dźělenje mjez horjeka a deleka so powjetšiło
Berlin/Halle (dpa/K/SN). Přijimarjam Hartza IV drje w nowym lěće pjeć eurow připołoža, přiwšěm woni z teje pozdatneje dobroty quasi ničo njezměja. Nawopak – z wobličenjow dźěłarniskeho zwjazka DGB, kotrež ma powěsćernja dpa k dispoziciji, wuchadźa, zo změja potrjecheni nahladnje mjenje hač na spočatku płaćenja Hartza IV.
Sadźba za samostejacych zwyši so 1. januara z nětkole 399 eurow na 404 eura. Bydlitej-li w jednej domjacnosći dwě dorosćenej wosobje jako mandźelskaj abo partneraj, dóstanje kóžda z njeju 364 eurow město dotalnych 360. Tele zwyšenje njemóže wšak zabarbić, zo maja přijimarjo Hartza IV resp. socialneje pomocy dźensa faktisce mjenje za žiwjenje hač za čas zazběha Hartza IV spočatk lěta 2005. To je spóznać na přirunanju DGB mjez wuwićom sadźbow Hartza IV a wuwićom předewšěm płaćiznow cyrobiznow. Tak su so sadźby bjezdźěłnostneho pjenjeza wot lěta 2005 do 2015 wo 15,7 procentow zwyšili, zežiwadła pak wo 24,4 proc. podróšili. Na přikład je to pječwo potrjechiło. Naposledk mějachu wosebje za milinu wjac pjenjez nałožić.
Kwotu zwyšić
To a tamne (30.12.15)
Čerwjene naměsto w Moskwje wostanje lětsa silwester zawrjene. Wotměć chcedźa tam telewizijne live-wusyłanje, za kotrež předawaja jeničce specielne zastupne lisćiki. To zdźěli wěstotny šef města Aleksej Majorow. Moskowčenjo měli so na swjedźenje w měšćanskich parkach wuwinyć. Na Čerwjenym naměsće hewak hač do 100 000 ludźi nowe lěto wita.
Z helikopterami su pomocnicy něhdźe 60 psow w sewjernej Awstralskej před krokodilemi wuchowali. Reptilije běchu so z wulkej wodu do přepławjeneje wsy Daly River dóstali a sej hižo wjacore psy hrabnyli. 400 wobydlerjow wsy dowjezechu pomocnicy do 200 km zdaleneho Darwina. Hač su woni tež druhe zwěrjata wumóžili, njeje znate. Sobudźěłaćerjo zarjada za škit zwěrjatow su poł tony picy do Daly Rivera transportowali, zo bychu tam zwostaty domjacy skót zastarali.
Łužica (30.12.15)
Nadpady přiběraja
Gubin (dpa/ch/SN). Njedźelu wječor běchu njeznaći škleńcy woknow w Gubinskimaj bydlenjomaj rozbili, hdźež bydla ćěkancy z Afriki a Syriskeje. Policija hišće žane slědy nima, byrnjež so swědkow prašała a slědy zawěsćiła. Statny škit přepytuje. Braniborske nutřkowne ministerstwo je wot januara do oktobra 45 politisce motiwowanych nadpadow na domy požadarjow azyla registrowało. W předchadźacymaj lětomaj bě jich w samsnym času 16 a dźesać. „Je to starosće zbudźace wuwiće a jasna tendenca“, praji rěčnik ministerstwa. Braniborska je lětsa 30 000 ćěkancow přiwzała. 13 politisce motiwowanych njeskutkow móžachu dotal wujasnić.
Busowe zastanišćo zničene
Jednotu křesćanow spěchować
Schwäbisch Gmünd (B/SN). „Ekumena martrarjow“ je najbóle přeswědčiwe swědčenje ewangelija. Tole zwurazni prezident Bamžowskeje rady k spěchowanju jednoty křesćanow, kardinal Kurt Koch, na kongresu „Přesćěhanje křesćanow dźensa“ w Schwäbisch Gmündźe. 650 ekspertow so tam wobdźěli. Po słowach Kocha „su martrarjo najwuznamniši dopokaz, zo hodźi so šćěpjenje přewinyć. Jich krej je tež symjo dospołneje ekumeniskeje jednoty křesćanow.“ A kardinal doda, zo njerozeznawaja přesćěharjo křesćanow mjez lutherskimi, druhimi ewangelskimi wěriwymi a katolikami.
Ličbu ćěkancow wobmjezować
Spěchuja projekty přez mjezu
Drježdźany (SN). Swobodny stat Sakska spěchuje tež klětu zaso mjezu překročace projekty. Za to je dohromady 580 000 eurow k dispoziciji, kaž statna kenclija zdźěli. 200 000 eurow z toho ma swobodny stat předwidźane za třinarodne projekty z Pólskej a Čěskej. Próstwarjo móža hač do 24 000 eurow dóstać.
Lětsa je Sakska dohromady 178 projektow za spěchowanja mjezy překročace a interregionalne zhromadne dźěło z 361 500 eurami podpěrała. Mjez druhim běchu to sportowe a kulturne zarjadowanja, zetkawanja dźěći a šulerjow kaž tež rěčne projekty w pěstowarnjach a zakładnych šulach. „Hižo dlěje hač 20 lět spěchuje swobodny stat towarstwa, załožby a komuny, kotrež mjezy překročace projekty přewjeduja“, rjekny minister za europske naležnosće a šef Drježdźanskeje statneje kenclije Fritz Jaeckel (CDU). „Angažement wosebje mnohich čestnohamtsce skutkowacych při tajkich iniciatiwach je za Saksku jara wažny. Poćahi k susodnym krajam so tak wožiwjeja a wuměna nazhonjenjow so podpěruje.
Wot dźensnišeho su wone zaso na předań: silwesterske praskotaki w ...
Starosća so sankcijow dla
Wadźa so wo integraciji
Žadanje CSU a CDU ćěkancam napřećo zbudźa raznu kritiku
Berlin (dpa/K/SN). Žadanje CDU a CSU, migranća dyrbja so integrować, zbudźa kritiku opozicije kaž tež koaliciskeho partnera SPD. Dowěrnica zwjazkoweho knježerstwa za integraciju Aydan Özoğuz (SPD) widźi w planach unije pospyt, naškarać předsudki napřećo ćěkancam. „Samozrozumliwje dyrbi so pola nas kóždy prawidłow a zakonjow dźeržeć. Štóž pak žadanja za wuznawanjom staja, dyrbi tež rjec, kak chce je zwoprawdźić“, Özoğuz potwjerdźa.
Organizacija za čłowjeske prawa Pro Asyl ma počinanje unije za populistiski manewer. Tak by CSU chcyła, zo bychu migranća, kotřiž dlěje wostanu, winowaći byli wobdźěleć so na kursach němčiny a wuznać so k zakładnym hódnotam, hewak jim hroža, pjenjezy přikrótšić. Swoju zwólniwosć k integraciji dyrbjeli wuraznje wobkrućić, steji w papjerje za klawsuru krajneje skupiny CSU zwjazkoweho sejma. CDU je so tohorunja za to wuprajiła, zawjesć zawjazowace dojednanje wo integraciji.
