Ruska so wobdźěli

srjeda, 16. decembera 2015 spisane wot:
Moskwa/New York (dpa/SN). Ruski wonkowny minister Sergej Lawrow wobdźěli so pjatk na konferency wo Syriskej w New Yorku. Diplomat zastupuje Rusku na jednanjach wo politiskim rozrisanju kon­flikta, zdźěli rěčnica ministerstwa Marija Sacharowa dźensa w Moskwje. „Nadźijomnje dorozumja so tam wo spočatku jednanjow mjez syriskim knježerstwom a opoziciju. Bohužel proces chětro chromi“, wona­ rjekny. Ruski prezident Wladimir Putin bě po rozmołwach z wonkownym ministrom USA Johnom Kerryjom wčera wječor w Moskwje wobdźělenje Ruskeje na zetkanju w New Yorku přikazał. Na konferency chcedźa so tež wonkowni ministrojo­ z wjace hač dwanaće statow, mjez druhim z Němskeje wobdźělić.

Wjace pjenjez załožbje

srjeda, 16. decembera 2015 spisane wot:
Podstupim (dpa/SN). Po sakskim je tež braniborske knježerstwo zwyšenju srědkow za financowanje Załožby za serbski lud přihłosowało. Tole zdźěli Podstupimska statna kenclija wčera po wuradźo­wanju kabineta. Rozsud je dalši wažny kamušk při zawěsćenju serbskeje rěče a kultury, rjekny braniborska ministerka za wědomosć a kulturu Sabine Kunst (SPD). Wot klětušeho ma załožba dóstać 18,6 milionow eurow město dotal 17 milionow. Połojcu sumy přewostaji jej Zwjazk, třećinu Sakska a 3,1 milion eurow Braniborska. Załožba za serbski lud podpěruje z pjenjezami mjez druhim serbske institucije a towarstwa.

Prěnju wójnsku akciju přewjedli

srjeda, 16. decembera 2015 spisane wot:

Airbus Zwjazkoweje wobory dwě lětadle w powětře natankował

Berlin (dpa/K/SN). Wotpowědnje wobzamknjenju zwjazkoweho sejma, Francosku na jeje próstwu podpěrać w boju přećiwo teroristiskej milicy Islamski stat, je lětadło Zwjazkoweje wobory­ prěni raz zasahnyło. Je to konsekwenca z terorowych nadpadow na Paris. Zwjazkowa wobora je nětkole započała zwoprawdźeć wot Němskeje přilubjenu podpěru z powětra w boju přećiwo teroristiskej­ milicy Islamski stat (IS). Tankowe lětadło je dźensa w nocy dwě bojowej mašinje mjezynarodneje koalicije přećiwo IS w powětře z čerstwym ćěriwom zastarało. Tole zdźěli rěčnik zasadźenskeho komanda Zwjazkoweje wobory powěsćerni dpa. Airbus Zwjazkoweje wobory typa A 310 je wšo hromadźe pjeć hodźin w powětře swój nadawk wukonjał. Kotreje narodnosće stej wonej lětadle byłoj, kotrejž je tankowar Zwjazkoweje wobory zastarał, rěčnik zasadźenskeho komanda njepraji. Na nalětach přećiwo pozicijam a zepěranišćam IS wobdźěleja so nimo francoskich tež ameriske, britiske a někotre arabske lětadła.

Wostanje, kaž je

srjeda, 16. decembera 2015 spisane wot:
Drježdźany (SN/MiR). „Šulu demokra­tizować a politiske kubłanje sylnić“ žada sej frakcija Lěwicy w Sakskim krajnym sejmje. Na swojim dźensnišim wuradźowanju je parlament pisomnje za­podatu próstwu frakcije wo změnu do­- talnych rjadowanjow rozjimało. Po jeje próstwje ma so wukaz politiskeho wabjenja z 11. februara 1999 na šulach zběhnyć a zawěsćić, zo móža šule k wólbnym terminam časowje blisko zarjadować informaciske a diskusijne koła. Sakska statna ministerka za kultus Brunhild Kurth (CDU) w swojej wotmołwje zwěsći, zo „wobmjezuje so wabjenski wukaz jenož na dowólbnu dobu (dwanaće tydźenjow do wotpowědneho wólbneho termina), zo by so kaznja neutrality na šulach dodźeržała“.

Wótra kritika wjesnjanostam

srjeda, 16. decembera 2015 spisane wot:

Wětošow (SN/JaW). Łužiska alianca (ŁA) je iniciatiwu wjacorych łužiskich wjesnjanostow wo podpěru při strukturnej změnje we Łužicy chětro kritizowała. Předsyda ŁA Hanzo Wylem-Kell někotrym z podpisarjow zdobom wumjetuje, zo płaćiwe wobzamknjenja gmejnskich radow wědomje ranja. Tole wuchadźa z lista ŁA, kotryž našej redakciji předleži.

To a tamne (16.12.15)

srjeda, 16. decembera 2015 spisane wot:

Skupina dźěći a jich kubłarki chcychu sej z Berlina do braniborskeho Himmel­pforta dojěć. Bus pak zdaše so za jězbu njekmany być. Sobudźěłaćerjo wobchadneje słužby zwěsćichu, zo njejsu wobswětlenje kaž tež kolesa jězdźidła w porjadku. 44lětny mějićel a 57lětny šofer mataj nětko pokutu płaćić­ a dóstanjetaj nimo toho dypki w Flensburgu. Byrnjež dwě hodźinje pozdźišo, dojědźe sej 39 dźěći a jědnaće kubłarkow k rumpodichej w Himmel­pforće, a to z busom druheho pućowanskeho předewzaća.

Z třělbu w ruce je sej 39lětny muž w saksko-anhaltskim Weißenfelsu časopis „kupił“. Jako wón pytny, zo nima dosć pjenjez sobu, měrješe so z brónju na předawarja, wužada sej nowinu a ćekny. Policija pak jeho bórze na to zaja a sćaza třělbu. Přećiwo mužej přepytuja nětko hroženja a njewobkedźbowanja brónjoweho zakonja dla.

Łužica (16.12.15)

srjeda, 16. decembera 2015 spisane wot:

Kritizuja pruwowanje

Podstupim (dpa/ch/SN). Zeleni w Braniborskim krajnym sejmje su pruwowanje wobswětoznjesliwosće za planowanu pólsku brunicowu jamu Gubin/Brody jako „špatne a njedosahace“ kritizowali. Zapósłancaj Heide Schinowsky a Benjamin Raschke staj čerwjeno-čerwjene knježerstwo wčera namołwjałoj, w zmysle kraja hnydom do jednanja zapřimnyć. Přepy­to­wanja wobswětoznjesliwosće poćahowachu so dotal předewšěm na pólski statny teritorij, piše dpa. Tak njehodźa so mjezu překročace sćěhi za wobswět hódnoćić.

Jednaćelka rozžohnowana

Zasłužbowy křiž spožčił

wutora, 15. decembera 2015 spisane wot:

Drježdźany (B/SN). Za wusahowacy angažement spožči ministerski prezident Sakskeje Stanisław Tilich (CDU) tydźenja dwanaće ludźom Zwjazkowy zasłužbowy křiž. „Woni z tym, štož činja, wosebje mosty mjez ludźimi twarja. Jich angažement twori zhromadnosć, kotruž naša towaršnosć trjeba“, rjekny Tilich na přepodaću wuznamjenjenja w Drježdźanach. Počesćeny bu tež Michael Kühn z Zwickauwa za swój lětdźesatki trajacy angažement za zachowanje tamnišeje Marijineje cyrkwje. Dalše wuznamjenjenje dósta teologa Hubertus Comak, kiž nawjeduje wot lěta 1999 Caritas w Zhorjelskej diecezy a so wosebje za ludźi z demencu zasadźuje.

Ćěkancam w nuzy pomhać

Drježdźany/ Lipsk/Magdeburg/Jena (B/SN). Katolske zwjazki studentow w Drježdźanach, Lipsku, Magdeburgu a Jenje su swojich sobustawow namołwjeli, křesćanskim ćěkancam pomhać, so w Němskej integrować. Studenća a něhdyši studenća planuja kmótřistwa, zo móhli po­trjechenych z najwažnišim zastarać, jich na zarjady a při pytanju dźěła přewodźeć, jich němčinu wučić a jim scyła styki wudźeržujo něšto nadźije spožčić.

Klub „Błótowska železnica“ pokaza swoju zběrku modelowych železnicow tež přichodny kónc tydźenja w Choćebuskej měšćanskej hali. Hižo 3. adwent je so wona wo wulki zajim dźěći a dorosćenych starała, a budźe wot 18. do 20. decembra wospjet widźeć dźesać wšelakich připrawow modeloweje železnicy kaž tež hóstna Rainera Rätzscha w měritku 1:87. Hłowna atrakcija přehladki je zasněžena krajina z parnymi lokomotiwami z 1930tych lět. Foto: Michael Helbig

CDU zjězd wujednanja přewjedła

wutora, 15. decembera 2015 spisane wot:

Karlsruhe (dpa/K/SN). Hdyž bě ministerski prezident swobodneho stata a předsydy bayerskeje CSU Horst Seehofer kanclerku Angelu Merkel jeje politiki napřećo ćěkancam dotal přimał a sej ultimatiwnje maksimalnu hranicu jich při­wzaća žadał, wustupowaše wón na zakónčacym dnju stronskeho zjězda CDU tónkróć poměrnišo, přiwšěm za wob­mje- zowanje, piše dpa. Seehofer mjez druhim rjekny, zo dyrbi tón, kiž chce pola nas žiwy być, z nami hromadźe žiwy być a nic přećiwo nam. Jedne ze zakładnych wuměnjenjow za to je, němčinu nawuknyć. Delegaća zjězda běchu wčera kurs kanclerki podpěrali, zo „to zdokonjamy“. Wobzamknjeny nawodny namjet wobsahuje jeničce hišće pasus, zo ma so ličba ćěkancow „čujomnje“ pomjeńšić.

Serbska debata

nowostki LND