Drježdźany/Berlin (dpa/K/SN). Skutkowanje jako prezident Zwjazkoweje rady wunjese sakskemu ministerskemu prezidentej Stanisławej Tilichej (CDU) lětsa přewšo bohaty program pućowanjow do wukraja. „K dobremu zwukej słuša, zo w tejle funkciji wopytaš Francosku a Pólsku, ale tež beneluxske staty“, zwurazni wón tele dny napřećo powěsćerni dpa. Kruće předwidźanej stej dale wiziće Singapura kaž tohorunja Južneje Koreje.
Nahi muž na balkonje bydlenja w Bad Hersfeldźe je starosćiweho wobydlerja pohnuł policiju wołać. Zastojnikam wón rozprawješe, zo je naheho muža wuhladał, kiž bě zymy dla hižo cyle čerwjeny. Na jeho wołanje wšak njebě reagował. Hač bě so mylnje wuzamknył abo hač bě to něchtó druhi činił, swědka tohorunja zajimowaše. Policisća móžachu problem spěšnje rozrisać: Muž na balkonje bě wulka klanka z wukładneho wokna, kotruž běše wobsedźer tam wotstajił.
Nimale cyłu tonu palenca su paduši w badensko-württembergskim Lahru spakosćili. Po tym zo běchu wčera wječor běrow spediciskeje firmy přeborkali, zadobychu so do składu, hdźež bě paleta z 834 kilogramami palenca za transport spřihotowana. Tu paduši wězo rady sobu wzachu. „Runje hakle běchu hody. To drje je něchtó hižo zaso něšto k piću trjebał“, rěka w policajskej rozprawje.
Wěstotny koncept za karnewal
Choćebuz (dpa/ch/SN). Po nadpadach cwólbow muži na žony w Kölnje ma so tež wěstotny koncept za karnewalowy centrum Choćebuz zdźěłać. Wěstotne naprawy so w dorěčenju z policiju a ze zarjadowarjom, karnewalowym zwjazkom Łužica, wobstajnje aktualizuja, zdźěli wčera rěčnik města. Karnewal w Choćebuzu z dźesaćitysacami přihladowarjemi je najwjetši wuchodoněmski póstniski spektakl. Zarjadowar je namołwjeny, wjetšu ličbu swójskich dohladowarjow přewostajić. Tež policija a wohnjowa wobora budźetej prezentnej.
Smalerjo dochody wunjesli
Wildbad Kreuth/Berlin/Praha (dpa/K/SN). Tradicionelnje na Třoch kralow je bayerska CSU dźensa we Wildbach Kreuthu do klawsury šła, zo by so zaměrnje na nowe lěto nastajiła. Schadźowanje lubi napjatosć, kontrowersnych pozicijow křesćanskeju stron-sotrow nastupajo maksimalnu ličbu přiwzaća ćěkancow dla. Šef CSU Horst Seehofer rěči naležnje za jeje wobmjezowanje, šefina CDU a kanclerka Angela Merkel porno tomu zasadnje žanu tajku nochce, twjerdźo: „Zdokonjamy to.“ Zo by swoju wěc přesadźiła, wobdźěli so wona wosobinsce na klawsurje, piše dpa. To da horce diskusije wočakować.