To a tamne (18.12.17)
Zasadźenje policije zawinili su šulerjo w badensko-württembergskim Lörrachu. Chcychu we wučbje sudniske jednanje přewšo originalnje napodobnić. Za to su rjadowniskemu towaršej ruce sputali. Za naručne puta, kotrež bě sobušulerka minjeny pjatk bjez wědy staršeju wot doma sobu přinjesła, pak pobrachowaše wotpowědny klučik. Dokelž tež policija žadyn tajki njeměješe, wona puta zniči.
32 razow je so motorski w Ludwigsburgu wotpohladnje błyskać dał – doniž jeho njelepichu. Po informacijach města bě 17lětny hač do 43 km/h přespěšny. Tři měsacy je přeco zaso nimo samsneho błyskača jěł, myslo sej, zo motorskeho lepić njemóža. Pječa měješe wjeselo při tym. Město a policija pak stej jeho popadnyłoj. Dyrbi nětko pokutu 7 000 eurow płaćić, změje 36 dypkow w Flensburgu a 15 měsacow zakaz jězdźenja.
Trjebamy prawniski zakład za wšitke mjeńšiny
Wot 1990 je Domowina čłon Federalistiskeje unije europskich narodnych mjeńšin FUEN. Wot wšeho spoačatka pódla je bywši jednaćel Domowiny Bjarnat Cyž. Tuchwilu angažuje so wón čestnohamtsce w zwjazku jako wiceprezident. Tež jemu zaleži jara wjele na tym, zo ma wobydlerska iniciatiwa FUEN Minority SafePack, na kotrejž wšak je sam aktiwnje sobu skutkował, tež wuspěch. Serbske Nowiny su so z Bjarnatom Cyžom wo iniciatiwje FUEN rozmołwjeli.
Sće iniciatiwu hižo podpisał?
Bj. Cyž: Haj, hižo na kongresu Federalistiskeje unije europskich narodnych mjeńšin w meji w rumunskim Cluju-Napoce sym iniciatiwu podpisał.
Serbja w Němskej maja přirunujo z druhimi mjeńšinami w Europje hižo dosć dobry mjeńšinowy škit. Čehodla měli woni wobydlersku iniciatiwu FUEN podpěrać?
Bj. Cyž: Mamy wšu přičinu wobydlersku iniciatiwu Minority SafePack sobu podpěrać, dokelž trjebamy za wšitke awtochtone mjeńšiny w Europje zhromadny prawniski zakład, kotryž zaruča zachowanje rěče a kultury jako najwažniši fundament narodneje identity kóždeho přisłušnika jedneje mjeńšiny.
Trjeba je jednać
Do rozsuda SPD znowa ataka
Berlin (dpa/SN). SPD je dźensa na zažnym popołdnju rozsudźiła, hač so do sonděrowanjow z uniju poda. Stronske předsydstwo je wo tym wuradźowało, wuslědk pak bu hakle po kóncu redakciskeho časa za tele wudaće znaty. Socialdemokraća dyrbjachu so dźensa rozsudźić, a to najebać nowe ataki z CSU. Tak mjenowaše šef jeje skupiny w zwjazkowym sejmje Alexander Dobrindt wobydlerske zawěsćenje „lěwicarske, ideologiske, zastarske“ žadanje SPD.
Dale žanoho přibliženja
Brüssel (dpa/SN). W zwadźe wo azylowej politice njeje na wjerškowym zetkanju Europskeje unije w Brüsselu dale žaneho přibliženja. Hač do junija 2018 pak chcedźa 28 čłonskich krajow temu dale wobdźěłać, kaž zwjazkowa kanclerka Angela Merkel rjekny. Přezjedni distancowachu so wobdźělnicy wot rozsuda prezidenta USA Donalda Trumpa, Jerusalem jako stolicu Isreala připóznać. Jako wulki postup swjećachu woni start noweje wojerskeje kooperacije z mjenom Pesco.
Putin znowa kandiduje
Kumštne „lodowcy“ w bywšim Helmuta Justowym stadionje w ...
Za zawěsćenje mjezow w Libyskej
Brüssel (dpa/SN). Visegrádska skupina statow EU je w migraciskej politice 35 milionow eurow k zawěsćenju mjezow připrajiła. To su premierojo Madźarskeje, Pólskeje, Čěskeje a Słowakskeje wčera w Brüsselu připowědźili, hdźež zetkachu so z šefom komisije EU Jeanom-Claudeom Junckerom a italskim ministerskim prezidentom Paolom Gentilonijom. Italska nawjeduje projekt k zawěsćenju mjezow w zhromadnym dźěle z Libyskej, kotraž ma ćěkancy z Afriki wróćo dźeržeć.
Kraje Visegrádskeje skupiny wotpokazuja politiku EU winowatostneho rozdźělowanja ćěkancow. Nowa kročel ma być znamjo zwólniwosće ke kooperaciji. „Činimy to, dokelž wěrimy do přezjednosće w Europskej uniji“, rjekny madźarski ministerski prezident Viktor Orbán.
Za Junckera je to dopokaz, zo Visegradska štwórtka cyle pódla je, dźe-li wo solidaritu z Italskej a druhimi. Gentiloni přizna, zo diferency z Visegrádskimi krajemi tež po jich připowědźi dale wobsteja.
To a tamne (15.12.17)
Kruwy na pastwje napřećo jeho domskemu běchu bayerskemu předewzaćelej w Holzkirchenje přewjele. Zwonjenja bimbawkow, smjerda a strowotneho stracha muchow na pastwje dla je muž wotnajerku a gmejnu jako mějićelku łuki na krajnym sudnistwje Mnichow II wobskoržił, so tohole wzdać. Wón a jeho mandźelska hary bimbawkow dla njemóžetaj w nocy spać a mataj depresije. Sudnistwo je skoržbu wotpokazało.
Swojej inicialej „SB“ je chirurg a specialist za transplantaciju jatrow we Wulkej Britaniskej do jatrow dwěju pacientow zapalił. 53lětny lěkar swoju winu za tónle skutk před sudnistwom w Birminghamje přizna. Bóle grawěrowace wumjetowanje zranjenja ćěła pak wotpokaza, kaž britiske medije rozprawjachu. Wotkryli su inicialej jednoho pacienta, hdyž je druhi chirurg pozdźišo dalšu operaciju wotměł, bě w sćelaku BBC zhonić.
Nowy měznik docpěła
FUEN zhladuje optimistisce na cil milion podpismow
Flensburg/Budyšin (SN/JaW). Wobydlersku iniciatiwu Federalistiskeje unije europskich narodnych mjeńšin FUEN Minority SafePack k skrućenju mjeńšinowych prawow na europskej runinje je mjeztym wjac hač 350 000 ludźi podpisało. Wo tym informuje FUEN w nowinskej zdźělence. To je 250 000 wjac hišće kónc minjeneho měsaca. „Kampanja je z tym nowy měznik docpěła“, wozjewi předsyda FUEN Loránt Vincze w nowinskej zdźělence.
Unija zwólniwa sonděrować
Berlin (dpa/SN). Unija CDU/CSU je zwólniwa z SPD wutworjenje noweho zwjazkoweho knježerstwa sonděrować, wona pak wobsteji na wulkej koaliciji. To bě wčera wječor po rozmołwje čołow tychle třoch stron zhonić. Předsydstwo socialdemokratow chce jutře wo tym rozsudźić. Ćišć na předsydu SPD Martina Schulza přeběra, dokelž lěwicarjo w stronje jednanja jeničce wo wulkej koaliciji wotpokazuja.
May zesłabjena na wjeršku EU
Brüssel (dpa/SN). Poražka britiskeje premierki Theresy May wčera w parlamenće kraja wobćežuje ju na dwudnjowym wjerškowym zetkanju Europskeje unije dźensa a jutře w Brüsselu. Opozicija a někotři zapósłancy knježerstwowych Toryjow su přesadźili, zo dyrbi May zrěčenja wo wustupje kraja z EU parlamentej předpołožić. Statni a knježerstwowi šefojo EU pytaja wotmołwu na palace problemy, mjez druhim tež nastupajo brexit.
Pence wopyt přestorčił
