Łužica (13.01.16)
Třilětny po wohenju zemrěł
Zhorjelc (dpa/ch/SN). Dlěje hač tydźeń po rozbuchnjenju w Zhorjelskim wjaceswójbnym domje je třilětny hólčec na sćěhi swojich ćežkich zranjenjow zemrěł. Kaž policija wčera zdźěli, je staw dalšich ćežkozranjenych njezměnjeny. Přičiny rozbuchnjenja dnja 3. januara fachowcy hišće přepytuja. W fokusu steji 42lětny swójbny nan, kiž je tohorunja mjez ćežkozranjenymi. Pječa chcyše wón z propanowym płunom tepić, při čimž rozbuch zawini, informuje policajski rěčnik. Dwanaće ludźi so při wohenju zrani. Swójbny dom je tuchwilu njewobydlomny.
Młodźina zaso hudźi
Za přesćěhanych so modlili
Rom (B/SN). Syriska steješe w srjedźišću katolskeho „dnja modlenja za přesćěhanych křesćanow“ 26. decembra. Druhi dźeń hód su na wšěch Božich mšach wosebje spominali na bratrow a sotry wěry, kiž su po cyłym swěće wopory wumjezowanja a potłóčowanja. To zdźěli katolska Němska biskopska konferenca w Bonnje. 26. decembra je tež swjedźeń swjateho Šćěpana, prěnjeho martrarja křesćanstwa. Dźeń modlenja je dźěl lěta 2003 załoženeje iniciatiwy „Solidarita z přesćěhanymi a wobćežowanymi křesćanami w našim času“, z kotrejž skedźbnjeja biskopja kóžde lěto zjawnosć na diskriminaciju a přesćěhanje křesćanow po cyłym swěće.
Studijne městna za ćěkancow
Drježdźany (B/SN). Ewangelska wysoka šula Drježdźany skići wot lěća 2016 wosebite studijne městna ćěkancam w azylowym statusu. Dźesać městnow je za bachelorski studij socialne dźěło a elementarna pedagogika, wozjewi wysoka šula. Wona chce wukubłać fachowcow, „kotřiž skutkuja pozdźišo jako posrědkowarjo mjez kulturami a móža so na wysokim fachowym niwowje zanurić do integraciskeho skutkowanja“.
Wopory čakaja na wotrunanje
Chcedźa swój wliw zesylnić
Iniciatiwna skupina za legitimowne zastupnistwo Serbow – Serbski sejm chce so z towarstwom stać, zo móhła skutkownišo politiske hibanje wuwiwać.
Njebjelčicy (AW/SN). Iniciatiwna skupina Serbski sejm chce w blišim času załožić zapisane towarstwo. To je skupina wčera w Njebjelčicach wobzamknyła. Towarstwo móže jako juristiska wosoba wjetši wliw wukonjeć, wšelake prawa lěpje wužiwać a zdobom skutkownišo politiske hibanje wuwiwać. Prawiznik dóstanje nětko nadawk, zdźěłać trěbny statut k załoženju cyłka.
Wuběrk trěbny
Budyšin (SN/at). Dźěłowy kruh za serbske naležnosće jako gremij Budyskeho wokrjesneho sejmika ma za njewobeńdźomne, rozjimać potrjebu kwalifikowanja swojeje dźěławosće ze statusom serbskeho wuběrka. Na to skedźbnja wokrjesna społnomócnjena za serbske naležnosće Regina Krawcowa do jutřišeho wuradźowanja gremija, na kotrymž wobdźěli so krajny rada Michael Harig (CDU).
„Dźe jasnje wo to, zo bychu zastupjerjo wokrjesnych radźićelow, regionalne rěčnicy Domowiny na teritoriju Budyskeho wokrjesa kaž tež wěcywustojnaj wobydlerjej w serbskich naležnosćach wjace wliwa na krajnoradny zarjad přez wokrjesny sejmik wukonjeli“, rjekny społnomócnjena našemu wječornikej. Wona dale zwurazni, „zo serbske temy kóždy za sebje wobhladować hižo njedosaha. Je načasu, wobšěrniše sobupostajowanje zwoprawdźić.“
Napřećo prócowanju steji wuprajenje krajneho rady z 9. oktobra 2014 w SN: „Mamy rozmyslować wo tym, hač dźěłowy kruh dale wobsteji, abo chcemy to hinak organizować. Separatny wuběrk nimam za prawy.“
W Lipsku wulke škody načinili
Dulig ma hibanja zamołwite za zhrubjenje towaršnosće
Lipsk (dpa/K/SN). Prawicarscy ekstremisća su na prěnjej róčnicy hibanja Pegidy w Lipsku wulke krawale načinili. Ně- hdźe 250 hooliganow je w měšćanskim dźělu Connewitz randalěrowało, znatym swojeje lěwo-awtonomneje sceny dla. Zawostajili su spalene awta, mnohe rozbite wukładne wokna, wurubjene wobchody, spowalane wotpadkowe kontejnery a dalše zapusćenja. Při swojim namócnym wustupowanju su tež rakety pušćeli a barikady twarić započeli. Policija rěči wo 250 zakuklencach, prawdźepodobnych hooliganach kopańcy z Lipska a Halle. Zo bychu situaciju pod kontrolu dóstali, wobkružichu zastojnicy krawalnikow a registrowachu wot 211 podhladnych personalije. Zwěsćenych bu 57 chłostanskich deliktow, kaž naškaranje ćežkeho njeměra, zranjenje zakonja wo zhromadźowanju abo zranjenje zakonja wo brónjach a rozbuchlinach.
