Z nakusanej kołbasu je policija mužej dopokazała, zo bě so w februaru do kupnicy zadobył. 33lětny bě do wobchoda w srjedźofrankskim Ansbachu zalězł, kaž policija zdźěli. Tam spakosći cigarety w hódnoće 300 eurow a načini nimo toho tójšto škody. Kriminalna policija namaka na nakusanej kołbasy slědy DNA. Te móžeše nětko 33lětnemu přirjadować, kiž hižo druheho delikta dla w přepytowanskej jatbje sedźi.
Z kofejom a wosuškom je policija w badensko-württembergskim Ludwigsburgu starušku zastarała. Wona bě z ćahom přijěła, zo by přiwuznych k hodam wopytała – tola dźeń přezahe. Policija dowjeze žonu k přiwuznym, dokelž njebě nichtó po nju přijěł. Dokelž pak woni hišće doma njeběchu, hospodowachu rentnarku na rewěrje, doniž ju tam dźowka njewotewza.
Poskića dźěło nawróćerjam
Choćebuz (dpa/ch/SN). Někotryžkuli Łužičan, kiž hižo lěta na zapadźe jako pinčnik abo hladar starych dźěła, by sej rady zaso doma pjenjezy zasłužił. Za nich organizuja Choćebuska rjemjeslniska komora a partnerojo přichodnu póndźelu třeći króć dźeń nawróćerjow, hdźež móža něhdźe 4 000 swobodnych dźěłowych městnow poskićić. Runje wokoło hód a silwestra je wjele ludźi doma na wopyće pola swójbnych. Wjetšina z nich je dźěła dla na zapad šła. Dźeń nawróćerjow ma pokazać, zo maja fachowe mocy dobre šansy tež w regionje dźěłać, zdźěla rjemjeslniska komora.
Splesć wědomosć a hospodarstwo
Drježdźany (B/SN). Prezident Němskeje diakonije Ulrich Lilie je połny nadźije zwuraznił, zo zwjazkowa republika wužadanja připućowacych ćěkancow dla zmištruje. „Smy jedyn z najbohatšich krajow swěta. Z toho wurosće winowatosć dźělenja“, rjekny wón tydźenja w Drježdźanach. Lilie bě do toho wopytał přebywarnju za ćěkancow-dźěći bjez staršich w Rodewischu a Drježdźansku poradźowarnju migrantow Cabana. Tam je hódnoćił angažement za ćěkancow a je čestnohamtskim pomocnikam rjap sylnił. „To je hodźina ciwilneje towaršnosće“, rjekny tam prezident. We wobchadźe z ćěkancami, a požadarjemi azyla měli předewšěm zarjadnistwa swoje zastojnske myslenje wotpołožić.
Namołwa k rjećazej swětła
Lipsk (B/SN). Tež klětu chce Lipsk jasnu poziciju přećiwo cuzemu a antiazylowemu nastajenju zabrać. Zwjazk zastupjerjow z politiki, towarstwow a cyrkwjow přeproša 11. januara 2016 k symboliskemu rjećazej swětła, kaž zdźěli to něhdyši farar Tomašoweje cyrkwje Christian Wolff. Wobdźělnicy měli so zasadźeć za čłowjekahódne přijeće ćěkancow a za zhromadne žiwjenje bjez namocy.
Flajer iniciatiwneje skupiny za legitimowane zastupnistwo Serbow – Serbski sejm „Je načasu, naše samopostajowanje zwoprawdźić“ je w hornjo- a delnjoserbšćinje kaž tež w němčinje wušoł.
Njebjelčicy (AW/SN). Nowy lětak iniciatiwneje skupiny předleži. Info łopješko chcedźa iniciatiwnicy Serbskim Nowinam, Nowemu Casnikej a dalšim printmedijam spočatk januara připołožić. Tak ma so do serbskich a němskich domjacnosćow w Hornjej a Delnjej Łužicy dóstać. Tole je skupina wčera w Njebjelčicach wobzamknyła. Trojorěčny flajer změja serbske towarstwa a kulturne institucije hižo dźensa w běhu dnja w swojich póstowych kašćikach. Zdobom wupołoža jón w Budyskim Serbskim domje. Tak móža so zajimcy z naležnosću Serbskeho sejma hłubšo zaběrać. „Z flajerom zjawnosći w krótkej a přeswědčiwej formje zaměr demokratisce legitimowaneho ludoweho zastupnistwa Serbow derje wujasnjamy“, praji rěčnik iniciatiwy dr. Měrćin Wałda.
Berlin/Njeswačidło (SN/at). Z listom nastupajo zmištrowanje zaměstnjenja nawala ćěkancow bě so 49 wyšich měšćanostow, měšćanostow a wjesnjanostow Budyskeho wokrjesa spočatk nowembra na zwjazkowu kanclerku Angelu Merkel (CDU) wobroćiło. Na to su čłonow iniciatiwneje skupiny, Kinsporskeho měšćanostu Heika Driesnacka (CDU), Kamjenskeho wyšeho měšćanostu Rolanda Dantza (njestronjan), Njeswačanskeho wjesnjanostu Gerda Schustera (CDU) a předsydu zarjadniskeho zwjazka „Při Klóšterskej wodźe“ Měrka Domašku do kanclerskeho zarjada přeprosyli.
Rozmołwa wotmě so wčera w koordinowanskim stabje za migracisku politiku, we wobłuku zamołwitosće ministra w kanclerskim zarjedźe Petera Altmaiera (CDU). Kaž Njeswačanski wjesnjanosta Gerd Schuster na naprašowanje zdźěli, bě to dźěłowa rozmołwa. Wo jeje wobsahu pak nochcyše so komunalny politikar wuprajić. „Smy sej stejišća wuměnjeli, wšako běchmy z přeprošenja do Berlina přewšo zwjeseleni“, Schuster rjekny.
Berlin/Washington/Moskwa (dpa/K/SN). Dźiwajo na njesměrny nawal ćěkancow ze Syriskeje chce zwjazkowy zarjad za migraciju a ćěkancow bórze z tym započeć, kóždy tajki pad separatnje pruwować. „Smy na to přihotowani“, praji rěčnik instancy powěsćerni dpa. Po jeho słowach njejsu zwjazkowemu zarjadej powěsće wo tym, zo je teroristiska milica Islamski stat (IS) blankopasy do rukow dóstała, ničo nowe. „Dokelž su nam w mnohich padach jich serijowe čisła znate, zamóžemy wot IS wustajene pasy bjeze wšeho spóznać“, wón zwurazni. Milica IS bě we wjacorych syriskich a irakskich městach zarjadnistwo přewzała a sej tam pasy přiswojiła.