Berlin (dpa/K/SN). Prezident Ifo Hans-Werner Sinn ma za to, zo němske hospodarstwo klětu nahladnje přibudźe, widźi pak tež ćeže. Wuzamknyć njedatej so na přikład sylniši spad chinskeje ekonomije a nowa kriza w europasmje. Francoska a juhoeuropske kraje trěbne strukturne reformy přeco zaso wotstorkuja, ze skutkownej podpěru Europskeje centralneje banki. „Politiske njewažomnosće w Europje su přewulke. W tym tči poprawne riziko“, Sinn wuswětla. „Europa z eurom njefunguje. Francoska a juhoeuropske kraje su w chroniskej krizy, wjeducej k masowej bjezdźěłnosći a politiskemu zradikalizowanju, štož wohroža hro­madźedźerženje Europy.“ W Němskej přidatne wudawki 21 miliardow eurow za ćěkancow konjunkturu pohonja.

Hamburg/Berlin (dpa/SN). Mnozy němscy poskićerjo płuna njejsu po aktualnej studiji spadnjene płaćizny za wobstaranje płuna na swětowych wikach swojim kupcam dale dali a mějachu tak lětsa 1,3 miliardy eurow dobytka. Tole zwěsća přepytowanje Hamburgskeho energijoweho fachowca Steffena Bukolda. Zwjazkowa frakcija Zelenych bě studiju do nadawka dała. Přerězna domjacnosć njemóžeše tak w přerězku 132 eurow na lěto zalutować. Za klětu připowědźeja zastaraćeljo trochu niše płaćizny, jenož něhdźe pjećina poskićerjow pak so na tym wobdźěli. Přetrjebarjam jeno zwostawa, tarify dokładnje přirunować a, je-li trjeba, poskićerja měnjeć, radźi Bukold. W kóždym regionje móžeš mjez něhdźe 65 poskićerjemi wolić. Rozdźěle płaći­znow wučinjeja při tym hač do často dźesać procentow při samsnych wukonach.

Blisko Łaza je zajac do awta skočił a so tak njezbožownje na prědnim dźělu awta zatłusnył, zo skutkowaše nachwilnje kaž galionska figura. Ani šofer ani policija njezamó jeho wućahnyć. 32lětny wodźer dyrbješe ze swojim awtom do porjedźernje, hdźež zajaca skónčnje fachowsce „wutwarichu“. Po zdźělenju policije njetrjebaše zajac ćerpjeć a bě prawdźepodobnje při zražce nablaku mortwy.

Jako wěrnaj pomocnikaj wopokazaštaj so policistaj-karabinieraj w sewjeroitalskej prowincy Brescia. Jako lepištaj chudu rentnarku, kak w nakupowanišću za swoje­ wnučki słódkosće kradnje, zapłaćištaj spontanje nastatu škodu a zadźěwaštaj tak skóržbje. Wudawki 27 eurow sej wobsadka policajskeho rewěra pozdźišo dźěleše. Wulkomyslnosć poli­cistow hódnoćeše jeju komandant jako přikładne zadźerženje.

Wopomnja zaso Lessinga

Kamjenc (SN). Město Kamjenc chce tež klětu kulturne žiwjenje z akcentami we wopomnjeću Gottholda Ephraima Lessinga wobohaćić, zdźěla tamniši Lessingowy muzej. K narodninam basnika 22. januara zahaja program, kotryž wopřijima jědnaće zarjadowanjow. Předwidźane su přednoški, čitanja, dźiwadłowe předstajenja kaž tež literarno-hudźbny wječor z huslerjom Kolju Lessingom a israelskim lyrikarjom Elazarom Benyoetzom. Hesło koncerta je „Štož nimaš před wočomaj, njemóžeš za sobu wostajić“. Lessing přežiwi čas dźěćatstwa w Kamjencu, prjedy hač poda so 1741 na wjerchowsku šulu do Mišna. Wón je němskemu narodnemu dźiwadłu puć rubał.

Wabja za turizm regiona