Takrjec nimoducy je šofer taksija w Berlinje palace policajske awto hašał, prjedy hač móžachu płomjenja wjetšu škodu načinić. Policisća běchu mustwowy bus w měšćanskim dźělu Neukölln wotstajili a dźěchu na zasadźenje w tamnišim parku. Swědcy wobkedźbowachu, kak je muž spytał awto zapalić. Na to wuhladachu taksijoweho šofera, kiž připadnje nimo jědźeše a z hašakom płomjenja spěšnje podusy. A jědźeše dale, bjez toho zo by dźak policistow wočaknył.

Falšowanu jězbnu dowolnosć wotedał je muž na policajskim rewěrje w Nürnbergu. 45lětny dyrbješe swoje papjery wotedać, dokelž bě přespěšnje jěł. Zastojnicy zwěsćichu, zo bě dowolnosć falšowana. Muž twjerdźeše, zo njeje nihdy žanu hinašu měł. To uniformowani wězo njewěrjachu: Nětko hrozy jemu jednanje jězdźenja bjez dowolnosće a falšowanja dla.

Žadaja sej wjele lět jastwa

Choćebuz (dpa/ch/SN). Znjewužiwanja zbrašeneho młodostneho w błótowskim Lubnjowje dla je sej Choćebuske statne rěčnistwo chłostanje z jastwom dźewjeć a poł lěta žadało, zdźěli wčera krajne sudnistwo. Wobskorženy muž je na spočatku procesa w oktobru přiznał, zo bě 14lětneho duchownje zbrašeneho měsacy dołho seksualnje znjewužiwał. W lěću 2014 chowaše wón młodostneho nimo toho wjacore tydźenje pola sebje doma w Lubnjowje, hdźež policija hólca skónčnje namaka. Muž je nimo toho znjewužiwanja swojeho bywšeho staraćelskeho syna dla wobskorženy. Tele wumjetowanje pak wotpokazuje.

Zakónča wustajeńcu

Vatikan (B/SN). Bamž Franciskus je ćěkancow na Pětrowym naměsće we Vatikanje postrowił. Wón apelowaše, při wšěch ćežach a wobstejnosćach zmužitosć njespušćić. „Njedajće sej wzać nadźiju do Boha a žiwjensku radosć, prudźacej z nazhonjenja Bójskeje miłosće.“

Křesćenjo přesćěhani

Kelkheim (B/SN). Po podaćach křesćanskeho pomocneho skutka Open doors je tuchwilu po cyłym swěće něhdźe 100 milionow křesćanow swojeje wěry dla přesćěhanych, rjekny nawoda skutka, Markus Rode na předstajenju Indeksa přesćěhanja na swěće w lěće 2016 w Kelkheimje. Statistika pokazuje na 50 krajow, w kotrychž su křesćenjo w swojej nabožinskej swobodźe najbóle wobmjezowani. Wona tež na to skedźbnja, zo je so ličba morjenych křesćanow wěry dla wot lěta 2013 nimale podwojiła. W 35 z podatych 50 krajow je islamski ekstremizm „hłowne ćěridło“ přesćěhanja. Po Indeksu swětoweho přesćěhanja steji na prěnim městnje komunistiska Sewjerna Koreja. Druhe městno zaběra Irak, třeće Eritrea.

Słuži „Mein Kampf“ jasnosći?

Skupina zastupjerjow iniciatiwneje skupiny za legitimowane zastupnistwo Serbow – Serbski sejm bě wčera na rozmołwje ze statnej ministerku za wědomosć a wuměłstwo dr. Evu-Mariju Stange (SPD) w sakskej stolicy.

Drježdźany (AW/SN). Sakska statna ministerka za wědomosć a wuměłstwo dr. Eva-Maria Stange (SPD) je swoju podpěru přilubiła, zo by mjez a ze Serbami k zjawnemu a fairnemu dialogej dóšło. W tym zwisku měło tež wo demokratisce legitimowane ludowe zastupnistwo hić. Tole zwurazni dr. Stange po jara konstruktiwnej rozmołwje ze skupinu zastupjerjow iniciatiwneje skupiny Serbski sejm wčera popołdnju w Drježdźanach.