Berlin (B/SN). W němskej zwjazkowej CDU konstituowana dźěłowa skupina „přesćěhanje křesćanow“ je dźěl fachoweho wuběrka za wonkownu, wěstotnu a wuwićowu politiku kaž tež za čłowjeske prawa strony. Gremijej z 25 ludźimi přisłušeja zastupjerjo zwjazkoweje a krajneje CDU a eksperća na polu diskriminacije. Wón ma informować wo situaciji wohroženych a přesćěhanych křesćanow.

Partnerske cyrkwje wopytali

Hannover (B/SN). Delegacija rady Ewangelskeje cyrkwje w Němskej je so w Brazilskej a Argentinskej wo partnerskich cyrkwjach informowała. Fenomen rosćaceje sekularizacije na swěće dožiwjeja tež cyrkwje Južneje Ameriki, rjekny ewan­gelska biskopka za wukraj Petra Bosse-Huber w Hannoveru. Delegaciju nawjedowaše sakski biskop Jochen Bohl.

Znamjo ekumeny

W zwučowanskim lěhwje za wubědźowanje zwěrjećeje „Miss Germany“ je tuchwilu 20 dejkow we wuchodofriziskim Leerje. Tam přihotuja so na mjezyna­rodne wurisanje, kotrež budźe zajutřišim w Oldenburgu. Dejki smědźa telko syna žrać, kelkož chcedźa, zo bychu dostojnje wupadali. Nimo toho je wšědnje myja, šrofuja a samo frizěruja.

Na teren němskeje tajneje słužby BND w Berlinje su so w nocy třo mužojo zabłudźili, kotřiž pytachu z pomocu nawigaciskeho nastroja najkrótši puć k přichodnej staciji podzemskeje železnicy. Nětko pruwuja, kak móžeše so tole stać, wšako je kompleks kruće wobstražowany a z wysokim płotom wobdaty.

Znamjo solidarity pokazali

Wojerecy (SN/ch). Po pospytanym zapalerskim nadpadźe na nuzowe přebywanišćo požadarjow azyla we Wojerecach je wčera něhdźe 35 ludźi namołwu wobydlerskeho zwjazkarstwa „Wojerecy pomhaja z wutrobu“ na Beethovenowu sćěho­wało. Z plakatami „Žadyn čłowjek njeje ilegalny“ a „Ćěkancy su witani“ pokazachu woni před nuzowym přebywanišćom znamjo čłowjeskosće a solidarity. „Tule knježa ciwilna kuraža, sobuzačuće a smil­nosć“, praji farar Jörg Michel wobdźělnikam, mjez kotrymiž bě něhdźe dźesać wobydlerjow domu. Tam je 26 požadarjow azyla zaměstnjene. Namołwu sćěhowało je tež Zwjazkarstwo za čłowjeskosć a tolerancu Kamjenc.

Planuja dwaceći premjerow