Berlin/Moskwa (dpa/SN). Zwjazkowa kanclerka Angela Merkel (CDU) a ruski prezident Wladimir Putin staj wčera aktualnu krizu mjez Ruskej a Ukrainu po telefonje rozjimałoj. W rozmołwje Putin němsku kanclerku prošeše na ukrainske knježerstwo wliw wukonjeć, zo by so „dalšich njepřemyslenych kročelow wzdało“, ruska powěsćernja Tass rozprawja. K tomu rysowaše Putin situaciju jako „prowokatiwne akcije“ ukrainskeje strony kaž tež jako „hrube ranjenje mjezynarodneho prawa přez jeje wójnske łódźe“ a jako „wotpohladne ignorowanje prawidłow měrniweje pasaže přez teritorialne wodźizny ruskeje federacije“. Poziciju kanclerki Tass žanu njepodawa. Minjeny kónc tydźenja bě ruska mórska straža ukrainskej marinje přejězd přez Kerčsku mórsku wužinu zapowědźiła a tři ukrainske łódźe sćazała. Na to ukrainski prezident Petro Porošenko připowědźi, zo płaći wot jutřišeje srjedy 30 dnjow wójnske prawo. Parlament je naprawu wčera z wulkej wjetšinu schwalił. Dyrbjało-li so połoženje zaso změrować, móže Porošenko wójnske prawo „kóždy čas“ zaso zběhnyć, kaž rjekny.

Zwenkau (dpa/SN). W zwisku ze znješkódnjenjom bomby z Druheje swětoweje wójny w městačku Zwenkau južnje Lipska dyrbješe dźensa 6 000 ludźi swoje bydlenje wopušćić. Wot naprawy nimo toho potrjechene běchu pěstowarnja, šula a chorownja, kaž policija rano zdźěli. Kónčina we wobkruhu jednoho kilometra wokoło strašneje namakanki je zaraćena. Wšitke dróhi do Zwenkauwa su zawrjene. Pěškam a jězdźidłam stej přistup a přijězd do města zakazanej. Wot ranja su wobydlerjam nuzowe kwartěry přistupne. Bombu chcychu w připołdnišich hodźinach znješkódnić.

Hižo wčera popołdnju dyrbješe ně­hdźe 600 ludźi we wokolinje sto metrow wokoło bomby swoje bydlenje wopušćić. Blisku chorownju su minjenu nóc ewakuowali. Bombu běchu wčera dopołdnja namakali, jako wuzběhnychu twarsku jamu­ za nowy jednoswójbny dom. Fachowcy­ za znješkódnjenje municije z Drježdźan zwěsćichu, zo dyrbja bombu na městnje znješkódnić. Za potrjechenych su wobydlerski telefon zarjadowali.

Štyri měsacy njewinowata w jastwje sedźała je žona w staće USA Georgia, dokelž bě policija cokorowu watu za drogi měła. Při kontroli běchu zastojnicy titu ze zdźěla roztłóčenej módrej cokorowej watu našli, kotruž mějachu za metamfetamin. Dokelž bě prěni drogowy test k tomu hišće pozitiwny, zajachu žonu jako dealerku drogi crystal meth. Hakle měsacy pozdźišo sej w laborje namakanku bliže wobhladachu a zwěsćichu, zo je to wata. Žona skorži nětko přećiwo policistam a zhotowjerjej drogoweho testa.

Z „přećelnymi chłostankami“ chcedźa tež lětsa zaso wopytowarjow hodownych wikow w Annabergu-Buchholzu na to skedźbnić, hdyž wopak parkuja. Na lisćiku při awće chcedźa wopytowarjow prosyć lěpje na wobchadne tafle dźiwać, kotrež parkowanje na wšelkich městnach poprawom zakazuja. Pjenježnu pokutu chcedźa sej jenož potom žadać, hdyž wopytowarjo zakaz wospjet ignoruja.

Vatikan (B/SN). Bamž Franciskus je znowa přesnadne přihoty na mandźelstwo w katolskej cyrkwi kritizował. Někotre „pozdatne přihoty“ za zrały rozsud njedosahaja. Dźe tu wo sakrament a nic wo někajku formalitu. Cyłe žiwjenje wjerći so wokoło lubosće. „Z lubosću njesměš so hrajkać!“, praji swjaty wótc.

Myto spožčili

Berlin (B/SN). Myto za „ciwilnu kuražu“ přećiwo prawicarskemu radikalizmej, antisemitizmej a rasizmej spožčichu Janinje Levy z Hamburga. Jednaćelka kreatiwneje agentury bě w aprylu zakročiła, jako buštaj młodaj mužej z kipu na hłowje w Berlinje wot młodeho Syričana z pasom nadběhowanaj a z antisemitiskimi wudmami hanjenaj. Z 3 000 eurami dotěrowane myto dósta Levy 29. oktobra w Berlinje na zarjadowanju Carity.

Wobwinuja měšnika

Varanasi (B/SN). W indiskim měsće Varanasi (zwjazkowy stat Uttar Pradesh) su 18. nowembra katolskeho měšnika Vincenta Pereiru radikalni hinduistiscy nacionalisća wosrjedź nyšpora w modlerskim centrumje atakowali. Policija měšnika zaja, dokelž měni, zo je ze swojej modlitwu a wustupowanjom tumulty hindu-přiwisnikow prowokował.