Pruwowanja maja być
Berlin (dpa/SN). Najebać krizu coronawirusa dla maja so kónčne pruwowanja w šulach Němskeje přewjesć. Na to su so kultusowi ministrojo zwjazkowych krajow wčera na widejowej konferency dorozumili. „Wokomiknje kraje zwěsćeja, zo njetrjebaja pruwowanja wupadnyć“, rěka w zhromadnym wobzamknjenju. Minjene dny běchu iritacije nastali, po tym zo bě schleswigsko-holsteinska kubłanska ministerka Karin Prien (CDU) připowědźiła wšitke pruwowanja wotprajić.
Spahn: Koncept z krizy
Berlin (dpa/SN). Němski zwjazkowy minister za strowotnistwo Jens Spahn (CDU) chce koncept za mjenje masiwne wobmjezowanje wšědneho žiwjenja ludźi coronawirusa dla zdźěłać. „Prašenje, kak móžemy krizowy modus zaso wopušćić, je z kóždym dnjom wažniše“, rjekny Spahn nowinarjam. Hač k jutram chcył wón na tele prašenje wotmołwić, kaž přilubi. Při tym dźe jemu wo „swědomitu runowahu mjez swójskej zamołwitosću a statnej kontrolu“. Wosebje wažne je, starych a chronisce chorych škitać.
EU wuradźuje wo połoženju
EU: Němska dyrbi bój přećiwo rasizmej zesylnić
Berlin/Brüssel (SN). Antidiskriminowanski běrow zwjazkoweho knježerstwa wita najnowšu rozprawu Europskeje komisije přećiwo rasizmej a njetolerancy (ECRI) a podpěruje w nim zakótwjene poručenja. Tak sej tam mjez druhim žadaja, bój přećiwo prawicarskemu ekstremizmej a rasizmej zesylnić, přećiwo hidźe w interneće efektiwnišo postupować a antidiskriminowanski běrow z přidatnymi kompetencami wuhotować. ECRI, gremij Europskeje rady, bě w swojej mjeztym šestej rozprawje połoženje w Němskej nastupajo rasizm, antisemitizm, njetolerancu a nastajenje napřećo homoseksualnym přepytował.
Rozprawa ECRI podšmórnje, zo dyrbjała Němska raznišo přećiwo rasizmej a diskriminaciji postupować, rjekny komisariski nawoda mjenowaneho běrowa Bernhard Franke w Berlinje. „Je derje, zo ECRI jasnje wuzběhuje, kak wažne su skutkowne prawo za runostajenje a sylne běrowy Zwjazka a krajow přećiwo diskriminaciji, chcemy-li so problemej wšědneho rasizma chutnje stajeć.“
Dale a wjace natyknjenych
Berlin (dpa/SN). Ličba z coronawirusom natyknjenych w Němskej je so w běhu wčerawšeho dnja wo 4 995 na nětko 36 508 powjetšiła. Kaž Roberta Kochowy institut zdźěla, je mjeztym 198 ludźi na chorosć zemrěło. Uniwersita Johnsa Hopkinsa w USA rěči porno tomu wo 37 323 natyknjenych a 206 zemrětych.
Wot coronawirusa wosebje potrjechena Španiska wobmjezowanja wosobinskeje swobody ludźi dale přiwótřa. Tam ma 47 milionow wobydlerjow hač do 11. apryla w dalokej měrje doma wostać, kaž parlament wčera wobzamkny. Najebać wšitke naprawy so tam wirus dale rozšěrja. Ličba natyknjenych je wčera wo 8 000 na 48 000 rozrostła. Dotal su 3 400 smjertnych woporow zličili. W Italskej ličba nowych infekcijow hižo něšto dnjow snadnje woteběra. Runočasnje pak wosta ličba smjertnych woporow z 683 w běhu dnja dale wulka. Wčera su 3 500 nowoschorjenjow registrowali. W USA je ličba smjertnych woporow coronawirusa dla na 1 030 přiběrała. Po oficialnych informacijach je so tam 68 500 ludźi z wirusom natyknyło.
Wěrnosć skerje struchła
Dźesać mortwych w starowni
Würzburg (dpa/SN). We Würzburgskej Starowni swj. Mikławša je mjeztym dźesać wobydlerjow na coronawirus zemrěło. Dom je jedne z ćežišćow smjertnych padow w zwisku z wirusom w Bayerskej. Ze 149 wobydlerjow domu su 29 pozitiwnje na wirus testowali, kaž Würzburgski wyši měšćanosta Christian Schuchardt (CDU) zdźěli. Schuchardt je zdobom předsyda załožboweje rady Würzburgskeho Wobydlerskeho spitala, ke kotremuž starownja słuša. Mjez 86 sobudźěłaćerjemi je so 33 natyknyło. Wčera su hišće raz wšitkich wobydlerjow a sobudźěłaćerjow testowali, štož je pola dementnych ludźi wosebite wužadanje. Zemrěći w starowni swj. Mikławša běchu bjez wuwzaća seniorojo we wysokej starobje ze zdźěla ćežkimi schorjenjemi.
Nawoda Würzburgskeho strowotniskeho zarjada Joachim Löw skedźbni na problematiku testow. Te njejsu wěste, dokelž móže infekcija w inkubaciskim času tež po tesće hišće wudyrić.
W Bayerskej je dotal 41 ludźi po infekciji z wirusom žiwjenje přisadźiło, rjekny statny sekretar Gerhard Eck (CSU) na nowinarskej konferency.
To a tamne (26.03.20)
Nuznikowu papjeru z awta spakosćił je njeznaty w Kielu. Do toho bě wokno w měšćanskim dźělu Gaarden parkowaceho jězdźidła rozbił a šěsć paketow papjery a dwaj šrubowakaj w cyłkownej hódnoće 80 eurow pokradnył. Hač bě w časach corony dosć požadana hajzlowa papjera přičina zadobywanja abo skerje připadna namakanka, njemóže policija rjec. Škoda na awće wučinja 300 eurow.
Por sportowych čriji ze spočatka 90tych lět, kotrež běchu swój čas jako dar za přistajenych kompjuteroweho koncerna Apple zhotowić dali, je w USA při přesadźowanju nimale 10 000 dolarow (9 200 eurow) wunjesł. Na běłych črijach wulkosće 40 stej mjeno koncerna a jeho symbol připrawjenej. Tójšto ludźi je so za črije zajimowało, kaž awkciski dom w Dallasu zdźěla. Po dwaceći poskitkach hamor skónčnje pola 9 687 dolarow padny.
Ličba natyknjenych přiběra
Po wšěm swěće wjace infekcijow z coronawirusom a wjace mortwych
Washington/Berlin (dpa/SN). W Italskej je w běhu dnja wjace hač 700 ludźi na sćěhi coronawirusa zemrěło. Tak je snadna škrička nadźije na spěšne a widźomne wosłabjenje epidemije najprjedy raz wuhasnyła. Italski ciwilny škit zliči dotal 6 820 smjertnych woporow, štož bě wčera 743 wjace hač dźeń do toho. Dny do toho bě jasnje mjenje mortwych było. Ličba tych, kotrychž su w kraju pozitiwnje testowali, je na wjace hač 69 000 rozrostła.
Napjate wostawa połoženje tež dale w Španiskej, hdźež je mjeztym 3 000 ludźi mjenowaneje infekcije dla zemrěło. Epicentrum je stolica Madrid, tež Katalonska je jara potrjechena.
Ličba wobkrućenych natyknjenjow w Němskej je po informacijach Roberta Kochoweho instituta wčera w běhu dnja wo 4 191 na nětko 31 554 přiběrała. Mjeztym je 149 ludźi zemrěło.
Pruwowanski chaos je tema
Berlin (dpa/SN). Kultusowi ministrojo zwjazkowych krajow su dźensa popoł-dnju wo dalšich krokach nastupajo kónčne pruwowanja w časach coronakrizy wuradźowali. Za to chcychu widejowu konferencu přewjesć, zo bychu wo tuchwilnym chaosu rěčeli: Hessenska a Porynsko-Pfalca chcetej pruwowanje přewjesć, dalše zwjazkowe kraje chcedźa je přestorčić a někotre, kaž Schleswigsko-Holsteinska, dospołnje wupadnyć dać. Zwjazkowa staršiska rada žada sej jednotne rjadowanje po cyłej Němskej.
Hoberski konjunkturny paket
Washington (dpa/SN). W USA chcedźa z hoberskim konjunkturnym paketom přećiwo negatiwnym wuskutkam coronawirusoweje epidemije postupować. Na to so su demokraća a republikanojo dojednali. Paket ma wobjim dweju bilionow dolarow, kaž zdźělichu. Pjenjezy chcedźa ludźom zdźěla direktnje wupłaćić, za chorownje nałožić abo za polěpšenje zawěsćenja přećiwo bjezdźěłnosći zasadźić. Předewzaćam budźe z nowymi kreditami pomhane krizu přewinyć.
Maas namołwja k solidariće
Pacientaj z Italskeje w kritiskim stawje
Lipsk/Drježdźany (dpa/SN). Wo wobeju, w nocy na wutoru z Italskeje přiwjezeneju pacientow so nětko w Lipšćanskim uniwersitnym klinikumje intensiwno-lěkarsce staraja. „Wonaj staj w kritiskim stawje“, zdźěli rěčnik kliniki Markus Bien wčera powěsćerni dpa. Nimo mjenowaneju pacientow z Italskeje nima chorownja tuchwilu žanych dalšich na coronawirus schorjenych, kotrychž dyrbjeli z dychanskimi nastrojemi zastarać.
W běhu wčerawšeho dnja su dalšich pacientow z Italskeje z lětadłom do Sakskeje přiwjezli, a to tež do Lipšćanskeho centruma za chorosće wutroby a do tamnišeje Heliosoweje kliniki, hdźež maja interdisciplinarnje wjedźeny wotrjad za intensiwnu medicinu, informuje rěčnik wuwučowanskeje chorownje Stefan Möslein. Wobě chorowni stej so minjene dny na přichad italskich pacientow přihotowałoj. Lěkować pacientow z Italskeje je po słowach rěčnika Mösleina „solidariski akt“.
Tež Drježdźanski uniwersitny klinikum so tuchwilu na to hotuje dweju pacientow z Italskeje přiwzać, kaž tamniši nowinarski wotrjad zdźěla. Dotal pak njewědźa, hdy jeju přiwjezu.
Pomocnicy njesmědźa wjace přijěć
Drježdźany (dpa/SN). Zo by dalše rozšěrjenje coronawirusa w Němskej wobmjezowało, je zwjazkowe nutřkowne ministerstwo wukrajnym sezonowym dźěłaćerjam zakazało, do Němskeje přijěć. Wukaz płaći wot dźensa w 17 hodź. Naprawa je nuznje trěbna, zo bychu so „infekciske rjećazy“ wirusa přetorhnyli.
Hišće wčera bě sakski minister za hospodarstwo Martin Dulig předewzaćam namjetował, sobudźěłaćerjow ze susodneje Čěskeje a Pólskeje w hotelach zaměstnić, po tym zo běštej krajej jim wšědne dojězdźowanje do Němskeje zakazałoj. Tak móhli tomu zadźěwać, zo zawody w Němskej dźěłowe mocy zhubja.
Čěska bě póndźelu připowědźiła, wot jutřišeho mjezu tež za powołanskich dojězdźowarjow zawrěć. Tući móhli pak doma wostać, pak sej na wjacore tydźenje kwartěr w Němskej pytać, zwurazni nutřkowny minister Jan Hamáček. Zo ludźo postajenja nastupajo karantenu dodźerža, chcedźa „jara kruće“ kontrolować. Po trochowanjach z Prahi dźěła něhdźe 37 000 čěskich dojězdźowarjow w Němskej.
