Dźěru zapłatać je ćežko
To a tamne (20.12.16)
Dźiwje swinjo je so w Badensko-Württembergskej do fitnesoweho studija zadobyło a bu při tym samo filmowane. Kaž policija zdźěli, bě mějićel studija we Walldorfje minjenu nóc awtomatiski signal dóstał, zo je so něchtó do objekta zadobył, a alarmowaše policiju. Ta twarjenje wobstupi a je bjez wuspěcha přepyta. Nahrawanja kamery pokazachu přičinu: Dźiwje swinjo bě zachodne durje rozbiło a so hač do předrasćernje a k dušam dóstało. Jako spyta twochnyć, přełama hišće škleńčane durje. Snadnje zranjene wone dom skónčnje zaso wopušći.
Na wšě 57 lět přepozdźe je 72lětna New- Yorkčanka wupožčenu knihu wróćiła. „Nochcych kradnyć. Bě to młodźinska lochkomyslnosć“, rjekny wona nowinarjam. Knihu „Vom Winde verweht“ dyrbješe žona 18. nowembra 1959 w Brooklyn Public Library zaso wotedać. Po směrnicach knihownje by nětko tysac dolarow pokuty płaćić dyrbjała. Kniharnja pak bě z 50 dolarami spokojom.
Wólbnicy prezidenta wolili
Washington (dpa/SN). Po prezidentskich wólbach 8. nowembra w USA je 538 wólbnikow dźensa swój hłós wotedało. Wobydlerjo kraja wola prezidenta jenož indirektnje a běchu w nowembru wólbnikow wuzwolili. Republikan Donald Trump bě sej w nowembrje 306 wólbnikow zdobył, jeho kontrahentka Hillary Clinton 232. Kongres chce wuslědk dźensnišeho wothłosowanja 6. januara wozjewić. Noweho prezidenta zapokazaja 20. januara.
Lětadło nuzowje přizemiło
Jakutsk (dpa/SN). Při nuzowym přizemjenju wojerskeho lětadła na wuchodźe Ruskeje su so dźensa wjacori pasažěrojo zranili. Informacije wo smjertnych woporach běchu spočatnje iritacije zbudźili. „Wšitcy pasažěrojo su přežiwili“, zdźěli zakitowanske ministerstwo w Moskwje. 16 zranjenych pak je w kritiskim stawje. W mašinje typa IL-18 bě 32 wojakow a sydom čłonow wobsadki. Přičina nuzoweho přizjemjenja na lětanišću Kansk w Krasnojarskej kónčinje móhł techniski defekt być.
Jadrowe zrěčenje
Čěski prezident Miloš Zeman (srjedźa) a sakski ministerski ...
Město Aleppo dale ewakuuja
Trjebaja wjace městnow
Rada NATO-Ruska so schadźowała
Brüssel (dpa/K/SN). Po wjele měsacow trajacej dospołnej ćišinje je so dźensa w belgiskej stolicy zaso Rada NATO-Ruska schadźowała. Zastupnicy wojerskeje aliancy zapada tematizowachu tam njedosahace napinanja Ruskeje, zakónčić ukrainski konflikt. Ruska ze swojeje strony wupraji chutne wobmyslenja spochi sylnišeho brónjenja dla w baltiskich statach Litawskej, Estiskej a Letiskej kaž tež w Pólskej.
To a tamne (19.12.16)
Spódnje cholowčki kralowny Victorije njejsu na awkciji žanoho kupca našli. Při přesadźowanju w juhozapadojendźelskim Wiltshiru njebě sobotu nichtó zwólniwy postajenu płaćiznu wudać, kaž rěčnica awkciskeho domu zdźěli. W prospekće bě rubjana spódnja drasta za něhdźe 5 000 eurow jako „w dobrym stawje ze snadnymi zabarbjenjemi“ zapisana. Queen Victoria knježeše wot lěta 1837 do 1901 we Wulkej Britaniskej a Irskej. Na minjenych awkcijach bě jeje spódnja drasta wjace hač 10 000 eurow wunjesła.
Z pistolu w myjerni awtow druhemu hrozył je muž w Kaiserslauternje. Tón bě so wčera ze swojim awtom do rynka čakacych tłóčił. Jedyn z čakacych šoferow jeho tohodla narěča. Na to wućahny „doprědkatłóčak“ pistolu a měrješe so z njej skrótka na 45lětneho, prjedy hač so ze swojim awtom njezminy.
Obama připowědźa wjećbu
Washington (dpa/SN). Po pozdatnych nadpadach ruskich hackerow za čas wólbneho boja w USA je prezident Barack Obama tak raznje kaž hišće nihdy wjećbu připowědźił. „Hdyž wukrajne knježerstwo spyta, wólbny bój manipulować, dyrbja USA jednać“, rjekny Obama sćelakej National Public Radio. „Tole činimy, hdyž mamy to za trěbne.“ We wólbnym boju buchu interne mejlki demokratiskeje kandidatki Hillary Clinton znate. Tole je jej chětro zeškodźało. Pječa su ruscy hackerojo za to zamołwići.
Wo ćěkancach debatowali
Berlin (dpa/SN). Zwjazkowy sejm je po wčerawšim wotsunjenju afghaniskich požadarjow azyla do jich domizny wo škiće tutych ćěkancow debatował. Zeleni a Lěwica žadachu sej, žane dalše wotsunjenja do Afghanistana njedopušćić, dokelž njeje tam wěstota ludźi zaručena. Wčera bě lětadło ze 34 wotpokazanymi požadarjemi azyla w afghaniskej stolicy Kabulu přizemiło. W dźělach kraja howrja wojowanja mjez talibanami a jednotkami knježerstwa. Zwjazkowe knježerstwo pak ma někotre kónčiny kraja za dosć wěste.
Japanska a Ruska zhromadnje
