Dźěćacy pjenjez so klětu wo měsačnje dwaj euraj zwyši. Tak za prěnje a druhe dźěćo stajnje 192 eurow měsačneho dźěćaceho pjenjeza wupłaća, za třeće dźěćo 198. Za štwórte dźěćo so dźěćacy pjenjez na 223 eurow měsačnje zwyši. Suma so awtomatisce změni a wot januara 2017 wupłaći. Woprawnjeni njetrjebaja so wo to starać.

Dźěćaca přiražka so wo dźesać eurow na najwjace 170 eurow wob měsac zwyši. Přiražku móža starši a samokubłacy pod wěstymi wuměnjenjemi za swoje mjenje hač 25 lět stare dźěćo dóstać. K tomu na přikład słuša, zo je njezmandźelene, zo w domjacnosći staršeju bydli a zo starši za nje dźěćacy pjenjez dóstawaja. Za to pak je wosebita próstwa trěbna, zdźěla swójbna kasa w Kamjenicy.

Zhromadnje z hižo zwoprawdźenym zwyšenjom bydlenskeho pjenjeza a ze zwyšenjom dźěćaceje přiražki su wuhlady za swójby ze snadnymi dochodami wjetše, zo njejsu přichodnje hižo na pjenjezy dźěłoweje agentury pokazane.

Falowace informacije pola 150 zmandźelenjow su měšćanske zarjadnistwo w saksko-anhaltskim Zörbigu k njewšědnej kročeli pohnuli. Město prosy pory,­ pobrachowace daty z pomocu mandźelskeho wopisma dodać, na přikład datum­ wěrowanja. Daty běchu so skóncowaneho kompjutera dla zhubili. Potrjechene poriki, mjeztym wjele lět zman­dźelene, su rady pomhali, kaž nowiny rozprawjeja. Měšćanosta je wězo wšitkim wobkrućił, zo su mandźelstwa płaćiwe.

Sydom tonow muki, 9 000 zhniłych jejow a 7 000 praskotakow su mužojo španiskeho městačka Ibi na pobrjohu Costa Blanca wčera při tradicionalnej „bitwje“ přetrjebali a chaos zawostajili. Tradicija z 19. lětstotka złožuje so na historiski podawk, jako běchu z muku, jejemi a barbu pomórani zběžkarjo jedyn dźeń dołho móc w Ibiju přewzali.

Berlin (B/SN). Zwjazk spěchuje plano­wane saněrowanje a přetwar Berlinskeje katedrale swj. Jadwigi z cyłkownje dwanaće milionami eurow. W budgeće zwjazkoweho twarskeho ministra je za to klětu jedyn milion eurow předwidźany, za lěto 2018 šěsć a za 2019 pjeć milio­now eurow. Arcybiskopstwo Berlin trochuje kóšty cyłkowneho projekta na 60 milionow eurow, 43 milionow eurow planuja za biskopsku cyrkej a 17 milionow eurow za susodny Bernharda Lichtenbergowy dom.

Friedel nowy wiceoficial