Přistawny mosćik přepodaty
To a tamne (08.12.16)
Z pastwy ćeknjena kruwa je na zwjazkowej dróze B 96 pola Njeswačidła wčera wječor wobchadne njezbožo zawiniła a so na to zminyła. Wohnjowi wobornicy wjacore hodźiny bjez wuspěcha za prawdźepodobnje zranjenym skoćećom pytachu, ale njenańdźechu je. 61lětny muž bě z awtom do kruwy zrazył, kotraž z dalšim howjadom srjedź puća steješe. Na awće nasta škoda wjacorych tysac eurow. Šofer wuńdźe ze stróželemi.
110 hodownych štomikow, 130 swěčkowych rjećazow a 16 000 hodownych kulow pyša dom swójby Jeromin w delnjosakskim Rintelnje. Po cyłym domje su bohaće pyšene plastikowe štomy nastajene, jeničce spanska stwa je wuwzata. Zo by k adwentej wšitko hotowe było, započinaja z natwarom hižo w oktobru. Wšitko zaso wottwarić a zrumować traje potom dwaj tydźenjej.
Wójsko sej město zdobywa
Aleppo (dpa/K/SN). Syriske wójsko je po wudawanju aktiwistow dźensa cyłe stare město Aleppa zdobyło. Rebelojo su so z njeho cofnyli, dokelž bě jim wobkruženje hrozyło. Ale tež hewak so woni dale a mjenje spjećuja. Hižo wčera běchu jednotki wójska a jeho zwjazkarjow strategisce wažnu štwórć Al-Shaar wobsadźili. Po měnjenju wobkedźbowarjow traja wojowanja jenož hišće něšto dnjow.
Zemjerženje sej wopory žadało
Jakarta (dpa/SN). Ćežke zemjerženje je w indoneskej prowincy Aceh, kotraž bě hižo raz z woporom přirodneje katastrofy, wulke škody zawiniło. Znajmjeńša 97 ludźi je po dotalnych informacijach žiwjenje přisadźiło, wójsko kraja zdźěli. Dźesatki chěžow so sypnychu. Wočakuja, zo hišće tójšto wobydlerjow pod rozwalinami leži. Rženje měješe sylnosć 6,4. Aceh bě hižo lěta 2004 najhórje potrjechena kónčina, jako po zemjerženju tsunami kraj zapusći. 180 000 ludźi tehdy zahiny.
Grjekscy žurnalisća stawkuja
Architekt Klaus Roloff, prezidentka Filmoweje uniwersity Konrad Wolf w ...
Šulerjam wjace přicpěwać
Berlin (dpa/SN). Zwjazk wučerjow Němskeje žada sej po wozjewjenju najnowšeho mjezynarodneho přepytowanja Pisa, w šulach k principej wukonliwosće so wróćić. „Sym sej wěsty, zo smy w Němskej naroki znižili, runočasnje su znamki dźeń a lěpše. Tutu mizeru dyrbimy přewinyć“, rjekny předsyda zwjazka Josef Kraus dźensa w rańšim magacinje telewizije ZDF. „Dyrbimy šulerjam we wučbje zaso wjace přicpěwać.“
Josef Kraus na to skedźbni, zo je ličba šulskich wotchadnikow z přerězkom 1,0 minjene lěta widźomnje rozrostła. Dobre znamki pak su po jeho słowach častodosć jeno „šek bjez hódnoty“, dokelž njejsu z trěbnej wědu podkładźene. „To šulerjam w žiwjenju dale njepomha.“
Němska bě so po najnowšim přirunowanju šulerskich wukonow „Pisa 2015“ pohubjeńšiła. 15lětni mějachu w přirodowědnych předmjetach a w matematice špatniše wuslědki hač loni. Porno tomu su so w čitanju snadnje polěpšili.
Směrnicy za wólbny bój
CDU na zjězdźe zasadny program schwaliła a prawo na azyl přiwótřiła
Essen (dpa/SN). Na kóncu swojeho zjězda je CDU směrnicy za klětuše wólby Němskeho zwjazkoweho sejma schwaliła a razniše azylowe prawo wobzamknyła.
Na spočatku stronskeho zjězda běchu delegaća zwjazkowu kanclerku Angelu Merkel k dźewjatym wólbam předsydy wosłabili. Z runje 89,5 procentami nažnja wona najšpatniši wólbny wuslědk za čas swojeho kanclerstwa. Do toho je wona tysac delegatow naležnje wo podpěru we wólbnym boju prosyła. Při wólbach před dwěmaj lětomaj dósta kanclerka 96,7 procentow.
Wuzwolili su tež předsydstwo a prezidij strony. Sakski ministerski prezident Stanisław Tilich njeje hižo kruty čłon prezidija. Jeho naslěduje nutřkowny minister Thomas de Maizière. Tilich pak wostanje poradźowacy čłon prezidija. Jako ministerski prezident ma wón krute městno w tutym wodźacym gremiju.
To a tamne (07.12.16)
Europa nima tuchwilu wusahowace wodźace wosobiny. Wo tym je bamž Franciskus přeswědčeny. Politikarjo kaž němski powójnski kancler Konrad Adenauer, francoski wonkowny minister Robert Schuman a italski knježerstwowy šef Alcide De Gasperi běchu swój čas „sprawnje“ za Europu dźěłali, rjekny pontifeks w rozmołwje z belgiskimi nowinarjemi, kotruž Vatikan dźensa wozjewi. „Europa trjeba nawodow, kotřiž puć pokazuja.“
Wosrjedź rubježneho nadpada do womory padnył je skućićel w Düsseldorfje. 40lětny bě spytał z nožom w ruce wobchod za žiwidła wurubić. Jako so 24lětny kasěrar spjećowaše jemu pjenjezy dać, dóńdźe k bijeńcy. Při tym rubježnik nadobo do womory padny. „Měšeńca drogow, alkohola a stresa drje bě za njeho přewjele“, rěka w rozprawje policije, kotraž jeho krótko na to zaja.
Dom ćěkancow wopytał
Drježdźany (B/SN). Prezident Diakonije Němskeje Ulrich Lilie je nadźijepołny, zo zwjazkowa republika wužadanja připućowacych ćěkancow zmištruje. „Smy jedyn z najbohatšich krajow swěta. Z toho wurosće winowatosć dźělenja“, rjekny Lilie tydźenja w sakskej stolicy. Wopytał bě wón přebywanišćo za dźěći-ćěkancow bjez staršich w Rodewischu a Drježdźansku poradźowarnju migrantow Cabana. Chcyše tak hódnoćić angažement za ćěkancow a wosebje čestnohamtskim pomocnikam rjap sylnić. Prezident Diakonije naspomni tež protesty a namocne ataki na migrantow a jich přebywanišća. „Dźe wo to, zo sylnimy předewšěm sprawny angažement“, Ulrich Lilie podšmórny.
Maja katolsku uniwersitu
Rom (B/SN). W irakskim měsće Erbil su katolsku uniwersitu wotewrěli. Wona je wšěm studowacym přistupna, předewšěm pak ma zajim młodych křesćanow budźić. Wot časa nadběhow teroristiskeje organizacije Islamski stat pytaja tysacy křesćanskich ćěkancow w Erbilu škit.
Wusypanje popjeła zakazane
Stajnje na aktualnym stawje
Praha (SN/JaW). Zastupnicy Mjeńšinoweje rady Němskeje a Domowiny – jednaćel třěšneho zwjazka Bjarnat Cyž, Clemens Škoda jako zamołwity referent Domowiny za kulturu a wukraj kaž tež sekretarka Mjeńšinoweje rady Němskeje Judith Wałdźic – zetkachu so wčera ze zastupjerjemi sekretariata Mjeńšinoweje rady Čěskeje w Praze. Rěčeli su tam přewažnje wo naležnosćach, kotrež móhli być tema zetkanja z čěskej mjeńšinowej radu. Tak chcetej sej wobě stronje zbližić struktury a dźěławosć cyłkow, zdźěli jednaćel Domowiny na naprašowanje.
Koncerny wotškódnić
Karlsruhe (dpa/SN). Energijowe koncerny Němskeje maja w zwisku z dočasnym wotpinjenjom jadrowych milinarnjow prawo na „přiměrjene wotškódnjenje“. Tole je Zwjazkowe wustawowe sudnistwo w Karlsruhe dźensa rozsudźiło. Skoržili běchu koncerny EON, RWE a Vattenfall. Zakonjedawar ma hač do lěta 2018 wotpowědne rjadowanja zdźěłać. Dokładny wobjim wotrunanja njeje znaty. Fachowcy trochuja jón na 19 miliardow eurow.
Ruska a China z wetom
New York (dpa/K/SN). Ruska je rezoluciju Bjezstrašnostneje rady UNO nastupajo tydźenski přiměr w syriskim měsće Aleppo blokowała. Kaž ruski wulkopósłanc Witalij Čurkin je tež China swoje weto zapodała. Wot Egyptowskeje, Španiskeje a Nowoseelandskeje předpołožena rezolucija bě sej žadała kónc wojowanjow w Aleppje a pomoc nuzu tradacej ludnosći. Při wobtřělenju pólneho lacareta w Aleppje je jedna z ruskich lěkarkow zahinyła, dwě pomocnicy buštej zranjenej.
Valls ma naslědnika
