To a tamne (14.12.16)
Z karu je 14lětny spytał 114 kilogramow praskotakow do Berlina pašować. Na němsko-pólskej mjezy w Frankfruće nad Wódru pak zastojnicy jeho z dźewjeć kistami ilegalneje pyrotechniki lepichu. Z regionalnym ćahom bě so młodostny wčera z něhdźe 8 600 praskotakami na puć do Berlinskeho měšćanskeho dźěla Wedding nastajił. Skedźbliwa wodźerka taksija, kotraž bě jeho na ćah dowjezła, pak zawoła policiju.
Znata rjekowka Wonder Woman njeje hižo dlěje pósłanča UNO. Comicowa figura chcyše so poprawom za zesylnjenje žonow w towaršnosći a boju wo runostajenje angažować. To pak zbudźi protest, dokelž njezastupuje figura feministiske zaměry. Zjednoćene narody su tuž nětko zhromadne dźěło z Wonder Woman zakónčili, zdźěli nakładnistwo, w kotrymž comic wuńdźe.
Zběrka dokumentow wušła
Berlin (B/SN). K prašenjam swójby wuda Němska biskopska konferenca njedawno zběrku dokumentow swětoweje synody. W njej namakamy tež prědowanja bamža Franciskusa a zakónčacy dokument synody. Nimo toho su tu podate rěčne přinoški němskich wobdźělnikow na synodźe a wuslědki wuradźowanja dźěłoweje skupiny. Brošurka hodźi so internetnje pod www.dbk.de skazać.
Konflikt mjez ÖRK a Israelom
Mnohe domjacnosće chude
Berlin (dpa/K/SN). W Němskej je dale a wjace domjacnosćow kaž tež ludźi zadołženych. Tole wuchadźa z rozprawy zwjazkoweho knježerstwa wo chudobje, z kotrejež nowina Bild cituje. Loni je 2,05 milionow domjacnosćow zadołženych było, dwě lěće do toho 1,97 mio. Potrjechenych bě tuž loni 4,17 mio. ludźi. Jako přičinu přirosta zadołženja rozprawa mjenuje, zo ma spochi wjace ludźi přemało dochodow. Tónle trend traje mjeztym hižo něhdźe dźesać lět.
Hollande w němskej stolicy
Berlin (dpa/K/SN). Francoski prezident François Hollande je dźensa němsku stolicu wopytał. Při zhromadnym wobjedźe z kanclerku Angelu Merkel dźěše wo europske a mjezynarodne naležnosće. Po nowinarskej konferency wobdźělištaj so wonaj na němsko-francoskej konferency wo digitalizaciji hospodarstwa we woběmaj krajomaj. Wo zhromadnym dźěle we wobłuku digitalizowanja je wjace hač 300 načolnych ekspertow z předewzaćow wuradźowało.
Połoženje katastrofalne
Cyle swojorazna atmosfera knježi tele dny w juhochorwatskim ...
Trumpnoweho ministra powołał
Washington/Moskwa (dpa/SN). Jedne z najwažnišich personalnych prašenjow přichodneho knježerstwa USA zda so rozrisane być. Jednaćel mócneho wolijoweho koncerna ExxonMobil, Rex Tillerson, ma so w knježerstwje Donalda Trumpa z nowym wonkownym ministrom kraja stać. Trump je so jasnje za 64lětneho předewzaćela rozsudźił, wón dźensa sam we wosobnskej zdźělence rjekny. Nowina New York Times a sćelak CNN běštaj hižo wčera wo tym spekulowałoj, powołujo so na wokolinu Trumpa.
Z Turkowskej rěčeć abo nic?
Brüssel (dpa/K/SN). Za europske naležnosće přisłušni ministrojo krajow Europskeje unije su po dwaj dnjej trajacych wuradźowanjach w belgiskej stolicy wo přistupje Turkowskeje k zhromadźenstwu stejišćo wozjewili.
Z pohódnoćenja jasnje wuchadźa, zo je EU w tymle nastupanju pačena. Tak sej Awstriska doraznje žada, politiskeho wuwića w Turkowskej pod prezidentom Recepom Tayyipom Erdoğanom dla rozmołwy přetorhnyć, štož Nižozemska a Bołharska podpěrujetej. Porno tomu bě němski wonkowny minister Frank-Walter Steinmeier (SPD) před tym warnował. Hladać ma so na cyłkownu situaciju. We wóčku dźě dyrbja tež měć cypernski konflikt a zajimy turkowskeje opozicije.
Prašenje kónca rozmołwow by za Franka-Waltera Steinmeiera potom rozrisane było, by-li Turkowska smjertne chłostanje zaso zawjedła. To by „absolutnje čerwjena linija była“, němski wonkowny minister zwurazni.
Mnohe prašenja a starosće
Kanadiske předewzaće Bombardier chce so znowa wusměrić
Budyšin/Zhorjelc (SN/BŠe). Špatne powěsće kanadiskeho koncerna Bombardier přiběraja. Mjez druhim je předewzaće připowědźiło so strategisce znowa wusměrić chcyć, zo by swoju poziciju na wikach železnicoweje techniki bóle skrućiło. Tak chce tež swoje wobchodnistwo w Němskej znowa nastajić. Wažny zaměr při tym je, wudźěłki standardizować a stejnišća specializować. Eficientniše dźěło ma přichodnje zaručene być.
Tydźenja je předsydstwowa rada Bombardiera rozsudźiła, zo přewozmje Michael Fohrer nawod jednaćelstwa. Třeći króć su tuž lětsa hižo noweho předsydu wuzwolili. Germar Wacker bě zastojnstwo jenož poł lěta wukonjał.
To a tamne (13.12.16)
Bjez woprawdźiteje šansy bě paduch přećiwo policajskemu psej na awtodróze A 12 pola Frankfurta nad Wódru. Kaž zwjazkowa policija zdźěli, chcyše wona dźensa rano transporter kontrolować. Šofer pak jědźeše dale. Njedaloko wotjězda Müllrose wón zasta, skoči z awta a ćěkaše pěši dale. Policajski pos Ivo pak bě spěšniši hač 24lětny paduch a jeho na polu zadźerža. Zastojnicy móžachu muža zajeć. Po wšěm zdaću bě wón transporter w nocy w Berlinje pokradnył.
Přihotujo 80. narodniny bamža Franciskusa přichodnu sobotu je Vatikan we wjacorych rěčach e-mailowe konta zarjadował, zo móhli jemu ludźo gratulować. Pod móža to w němskej rěči činić. Tež łaćonsku, jendźelsku a pólsku adresu su zarjadowali, kaž Vatikan zdźěla. Bamž sam wšak změje po rańšej Božej mši w Romje skerje „normalny dźěłowy dźeń“.
Socialdemokraća dobyli
Bukarest (dpa/K/SN). Parlamentne wólby w Rumunskej su socialdemokraća jasnje dobyli. Po wuličenju dobreju dweju třećin hłosow nažnja strona PSD něhdźe 47 procentow. Z přerozdźělenjom zbytka hłosow móhła wona w parlamenće samo absolutnu wjetšinu docpěć. Předsyda PSD Liviu Dragnea ma za to, zo wutworja koaliciske knježerstwo mjez jeho stronu a liberalnej stronu ALDE. Druhe městno při wólbach wobsadźi srjedźo-prawicowa strona PNL z 20 procentami.
Bombu wosrjedź města našli
Köln (dpa/SN). Něšto tysac ludźi dyrbješe dźensa dopołdnja nutřkowne město porynskeho Kölna wopušćić, po tym zo běchu rano při twarskich dźěłach njedaloko hłowneho dwórnišća 500 kilogramow ćežku amerisku lětadłowu bombu z Druheje swětoweje wójny namakali. Potrjechene běchu Kölnske wiki, centrala sćelaka RTL, wotnožki měšćanskeho zarjadnistwa a wjacore bydlenske domy. Dopołdnja njebě hišće znate, hdy móža fachowcy započeć, bombu znješkódnić.
Zrěčenje mjez EU a Kubu
