Erfurt (dpa/SN). Předsydka durinskeho dźěłarnistwa policije (GdP) Mandy Koch je zludana na postupowanje přećiwnikow politiki koronapandemije dla, kaž njedawno w Greizu, reagowała. Je nje­znjesliwe, zo su tam zdźěla tež dźěći ­pódla a zo je cyle wědomje instrumen­talizuja, rjekny Koch powěsćerni dpa. „Ja nje­bych ze swojim dźěsćom nihdy do ­tajkeje situacije šła.“ Na demonstraciji přećiwo naprawam korony dla we wuchododurinskim Greizu su minjeny kónc tydźenja 14 zastojnikow policije zranili, kotraž tam z městnami sylzopłun zasadźi. Mandy Koch bě jako dźěłarnica na městnje, zo móhła sej sama wobraz wo zasadźenju tworić. Wona widźeše, kak demonstranća bleše na zastojnikow mjetachu a praskotaki wužiwachu. Dwaj policistaj njeběštaj po zasadźenju wjace kmanaj słužbu wukonjeć, zranjenu zastojnicu dyrbjachu w chorowni zastarać.

„Kolegojo su tam wulkim napjatosćam wustajeni“, rjekny Koch. Na demonstra­cijach wobdźěleja so swójby z dźěćimi pobo­ku prawicarskich ekstremistow. Po­licisća dyrbja wotwažować, dokelž nje­móža přećiwo dźěćom płun zasadźić.

Berlin (dpa/SN). W tuchwilnej korona­krizy su strowotniscy ministrojo Zwjazka a zwjazkowych krajow dźensa wo cyło­zwjazkowych wolóženjach za třeći króć šćěpjenych wuradźowali. Zwjazkowy minister za strowotnistwo Karl Lauterbach (SPD) bě so za to wuprajił, zo móhł při płaćiwych prawidłach 2Gplus we wobchodach přidatnje předpisany test za tych wotpadnyć, kotřiž su hižo „boosterowani“. Někotre zwjazkowe kraje hižo tak postupuja. Tež strowotniska fachowča FDP Christine Aschenberg-Dugnus ma tajke wolóženja za móžne. „Wězo nima nichtó z třećej sykawu žadyn stoprocentowski škit. Ale samo, jeli so natyknje, njetrjeba so ćežkeje chorosće bojeć“, wona­ rjekny. Rada fachowcow zwjazkoweho knježerstwa je so dźensa tohorunja prěni króć schadźowała. Gremijej přisłušeja tež wirologojo a zastupnicy intensiwnych medicinarjow Roberta Kochoweho instituta.

Wčera wječor běchu zaso tysacy ludźi po cyłej Němskej přećiwo naprawam knježerstwa w boju přećiwo korona­wirusej protestowali. Při tym dóńdźe k masiwnym zasadźenjam policije.

Mobilny błyskač z rumpodichom a sobjacym zapřahom wupyšili su njeznaći w eifelskej gmejnje Hürtgenwald. Figura rumpodicha sedźi na nastroju, zapřah steji před nim. Błyskač funguje takrjec jako­ sanje. Štó za originelnej mysličku tči, dotal njewědźa. Minjeny tydźeń běchu dalšej błyskačej z čapku rumpodicha porjeńšili. Zamołwići wšak na to skedźbnjeja, zo błyskače tež z hodownej deko­raciju dale funguja.

Jědojteho hada w hodownym štomje našła je swójba w Južnej Africe. Telewizijny sćelak eNCA pokazuje widejo, w kotrymž jědojta boomslang na štomje mjez hodownymi kulemi swoju wokolinu pře­slě­dźa. Połdra metra dołheho wuža je profesionalny hońtwjer hadow skónčnje popadnył a w přirodźe wusadźił. W Južnej Africe je runje lěćo, štož mnohe hady ze schowa wabi, tež jědojte.

Nastupny wopyt noweho němskeho zwjazkoweho kanclera w Pólskej

Waršawa (dpa/SN). Při swojim nastupnym wopyće w Pólskej je zwjazkowy kancler Olaf Scholz (SPD) žadanja, wotrunać susodnemu krajej načinjene škody w Druhej swětowej wójnje, wotpokazał, pokazujo na přepokazanki Němskeje do etata Europskeje unije. Tak zwospjetowa wón wčera na zetkanju z ministerskim prezidentom Mateuszom Morawieckim poziciju dotalnych knježerstwow, zo je prašenje wójnskich reparacijow prawnisce wotzamknjene. Němska pak je „dale zwólniwa jara, jara wulke přinoški k financowanju etata Europskeje unije přepokazać“, Scholz wuzběhny. Wón jako prěni kancler wobě temje na te wašnje zwjazuje.

Třeći nastupny wopyt bě po wizitomaj w Parisu a Brüsselu bjez wjetšich konfliktow prěnje woprawdźite wonkopolitiske wužadanje nowemu zwjazkowemu kanclerej. Scholz drje bě swoju jězbu jako „přećelski wopyt“ připowědźił. Přiwšěm bě rěč wo wjacorych konfliktach – přede­wšěm ze stron Pólskeje.