Brüssel/Berlin (dpa/SN). Wólby Europskeho parlamenta su zahajene. Jako prěni móžachu Nižozemjenjo a Britojo dźensa swój hłós wotedać. Wot 5 hodź. bě prěni wólbny lokal na nižozemskim wulkolětanišću Schiphol přistupny. We Wulkej Britaniskej běchu wólbne lokale wot 8 hodź. wotewrjene. Wulkobritaničenjo so na wólbach wobdźěleja, dokelž njeje so knježerstwu w Londonje poradźiło, swoje z Brüsselom wujednane zrěčenje wo wustupje kraja z EU w parlamenće sčasom zwoprawdźić.

W Nižozemskej napjeće wočakuja, kak nowa hwězda prawicarskeje sceny Thierry Baudet ze swojim Forumom za demokratiju FvD wotrěznje. Strona, kotraž njeje při minjenych wólbach Europskeho parlamenta ani hišće eksistowała, chcyła referendum wo nižozemskim čłonstwje w Europskej uniji přesadźić.

Europske wólby traja štyri dny: Jutře wola w Irskej a Čěskej. Francoska wothłosuje zhromadnje z někotrymi druhimi krajemi sobotu, Němska runje tak kaž najwjace krajow EU njedźelu.

Naćisk zakonja wo třělenju wjelkow zbudźa rozdźělne reakcije

Berlin (dpa/SN). Po kopjacych so nadpadach wjelkow na wužitny skót ma přichodnje jednorišo być, rubježne zwěrjata třěleć. Zwjazkowe knježerstwo je wčera wotpowědny naćisk zakonja ministerki za wobswět Svenje Schulze (SPD) schwaliło. Tak budźe móžno wjelki třěleć, byrnjež jasne njebyło, kotre zwěrjo dokładnje je na přikład stadło wowcow nadpadnyło. Hońtwjerjo móža wjelki potom tak dołho třěleć, doniž žanych nadpadow wjace njeje, samo hdyž po tym puću cyłu wjelču črjódu wutupja. Zamołwite zarjady pak dyrbja to dowolić. Při tym je časowych a rumnostnych mjezow. Zwjazkowa ratarska ministerka Julia Klöckner (CDU) je mjeztym připowědźiła, zo nima naprawy za dosahace.

Plany předwidźa, zo maja přichodnje hižo „chutne škody“ k wotwobaranju wjelkow dosahać. Škody njetrjebaja wjace „chětro wulke“ być. Wjelki picować a přiwabić ma wuraznje zakazane być, zo njebychu so na čłowjeka zwučili. Měšeńcy wjelka a psa, tak mjenowane hybridy, maja so třěleć.

Diskusija wo wjelkach našu towaršnosć hižo dołho pači. Ja stejach dotal stajnje něhdźe srjedźa: Na jednym boku bě mi zakusanych wowcow a potrjechenych wowčerjow žel. Na tamnym boku njemóžach sej při najlěpšej woli předstajić, zo je něchtó kmany, wjelka, kotryž je stadło wowcow nadpadnył, takrjec zaso spóznać a jako skućićela identifikować, zo móhli jeho jako problemoweho wjelka zatřělić. Štož pak zwjazkowe knježerstwo nětko planuje, je drje trochu přehnate: Třěleć, doniž so žana wjelča wopuš wjace njehiba? Cyłe wjelče črjódy wutupić, zo njemóhli wjace žane wowcy zakusać? Sym wćipny, štó je našich politikarjow w Berlinje w tymle prašenju poradźował. Nimo toho sym přeswědčeny, zo zakoń w tej formje njepřeń­dźe. Wjelk je tež po europskim prawje přeco hišće kruće škitane zwěrjo. Na tym tež zwjazkowe knježerstwo ze swojimi militantnymi a krawnymi předstawami ničo njezměni. Marko Wjeńka

Praha (dpa/SN). Prezident čěskeho zličbowanskeho zarjada Miloslav Kala ma ćeže, słužbnu jězbu do južnoameriskeho Peruwa rozkłasć. Reporter čěskeho rozhłosa bě najwyšeho dohladowarja financow na wopyće w ruinowym měsće Machu Picchu lepił. „Čehodla mje fotografujeće?“, so Kala we wideju sćelaka praša. Kalu přewodźeše pjeć čłonow parlamentariskeho zličbowanskeho pruwowanskeho wuběrka. Na programje wopyta steješe mjez druhim zetkanje z měšćanostu turistiskeho města Cusco.

Wón wumjetowanja „raznje wotpokazuje“, zo bě jězba do Peruwa brojenje dawkowych pjenjez. Kaž zličbowanski zarjad w prěnjej reakciji zdźěla, delegacija bě města Inkow na swobodnym dnju wopytała. Kala nima sej „ničo wumjetować. Hladajo na naročny program wopyta w Peruwje nimam žaneje přičiny, so za něšto zamołwić.“ Čěski zličbowanski zarjad ma wot lěta 1993 styki ze samsnym zarjadom w Peruwje. Po informacijach rozhłosa bě čěski stat lět kaž tež hotel za tydźeń trajacu jězbu zapłaćił. Zličbowanski zarjad ma nadawk, wudawki zarjadnistwow kontrolować.