Bamž: Teror měri so na nabožiny
Rom (dpa/SN). Terorowej nadpadaj we Wienje a Nizzy njesmětej po słowach bamža Franciskusa zhromadne dźěło nabožinow wohrozyć. Na generalnej awdiency wčera we Vatikanje rjekny hłowa katolskeje cyrkwje, zo spomina na „bjezmócne wopory terorizma, kotrehož eskalacija a surowosć so po wšej Europje rozpřestrěwa“. Nadpady maja tež zaměr, „bratrowsku zhromadnosć mjez nabožinami přez namóc a hidu kazyć“, swjaty wótc warnowaše. W Awstriskej a Francoskej běchu pozdatni islamistiscy skućićeljo w běhu něšto dnjow wjacorych ludźi morili abo zranili.
Awdiencu, kotraž wotmě so druheje žołmy koronapandemije dla po dlěšim času bjez putnikow w knihowni japoštołskeho palasta, wusyłachu w interneće. Franciskus rjekny, zo trěbne wěstotne naprawy wobžaruje. 83lětny słuša hižo swojeje wysokeje staroby k skupinje ludźi, kotraž je wot wirusoweje chorosće wosebje wohrožena. Při awdiency, na kotrejž so tež druzy zastupnicy cyrkwje wobdźělichu, njewužiwaše bamž žadyn nahubnik. Minjeny čas běchu we Vatikanje wjacore pady korony zwěsćili.
Wótry wołojnik (05.11.20)
To a tamne (05.11.20)
Hobersku nopawu su pěstowarske dźěći w Danskej njedaloko němskeje mjezy našli. Tole dokumentuja wobrazy, kotrež je přirodoškitny centrum Tønnisgård w interneće wozjewił. Při tym jedna so wo eksotiske zwěrjo, kotrež bě wichor na přibrjóh připławił. Po wozjewjenych fotach je mortwa nopawa něhdźe dwaj metraj wulka. Dźěći běchu ju při přechodźowanju namakali a zhromadnje z kubłarkami přirodny centrum informowali.
Samlutki k Baltiskemu morju jěć chcył je sydomlětny hólc z Macherna pola Lipska. Za jězbu bě sej samo hižo jězdźenku kupił. W ćahu pak napadny žonje, kotraž policiju informowaše. Zastojnicy zalězechu w Lipsku do ćaha a pućowace dźěćo namakachu. Woni wzachu pachoła sobu na stražu, hdźež jeho přewšo zbožowny nan wotewza. Čehodla bě hólčec ćeknył, njeje znate.
Dźeń a wjace prawicarjow
Drježdźany (dpa/SN). W Sakskej je telko prawicarskich ekstremistow kaž wot lěta 1993 wjace nic. To staj sakski nutřkowny minister Roland Wöller (CDU) a prezident krajneho zarjada za wustawoškit Dirk-Martin Christian wčera w najnowšej rozprawje wustawoškita zwěsćiłoj. Rozprawa informuje wo přećiwo wustawje měrjacych so aktiwitach. Najwjetše wohroženje je dale prawicarski ekstremizm, rjekny Roland Wöller. Ličba prawicarskich ekstremistow w Sakskej je loni wo 600 na 3 400 rozrostła.
Wjace pjenjez rjedźerjam
Frankfurt n. M. (dpa/SN). W tarifowej zwadźe za rjedźerjow twarjenjow su so dźěłodawarjo a dźěłarnistwa minjenu nóc dojednali. Něhdźe 700 000 rjedźerjow dóstanje wot přichodneho lěta wjace mzdy, kaž dźěłarnistwo Twar-ratarstwo-wobswět zdźěli. Minimalna mzda ma hač do lěta 2023 na dwanaće eurow wob hodźinu rozrosć; tuchwilu płaća w branši 10,80 eurow. Na zawjedźenje hodowneho pjenjeza njemóžachu so dojednać.
USA zrěčenje wopušćili
Na Berlinskim lětanišću BER wotstronichu dźěłaćerjo dźensa ...
W Madźarskej nuzowy staw wukazany
Kontrowersna debata w sejmje wo naprawach
Wólby w USA njerozsudźene – Trump sylny
Washington (dpa/SN). Republikanski mějićel zastojnstwa Donald Trump je při wólbach prezidenta w USA wažny zwjazkowy stat Texas za sebje zdobył. Po tym puću je sej hłosy 38 wólbnych ludźi zaručił, kaž powěsćernja AP dźensa rano zdźěli. Dobyće Trumpa w Texasu běchu powšitkownje wočakowali. Bjez hłosow na wobydlerjach najbohatšeho kraja by za njeho nimale njemóžne było, prezidentske wólby dobyć. Za to trjeba znajmjeńša 270 hłosow wólbnych muži. W Texasu bě wón hižo lěta 2016 jasnje před tehdyšej kandidatku demokratow Hillary Clinton dobył.
Na wčerawšim wólbnym dnju běštaj wobaj kandidataj, Trump kaž tež jeho demokratiski kontrahent Joe Biden, optimistiskaj, zo wólby dobudźetaj. Trump rěčeše dźensa rano wo „wulkim dobyću“ a wumjetowaše swojemu politiskemu přećiwnikej, zo chcył tón „wólby kradnyć“. Biden rjekny: „Wěrimy, zo smy po dobrym puću, tute wólby dobyć.“ Demokrat prošeše swojich přiwisnikow wo sćerpnosć, dokelž móhło wuličenje hłosow hišće trać. „Wólby njejsu nimo, doniž njeje posledni hłós wuličeny.“
