„Jednanska strategija k skrućenju prawow Serbowkow a Serbow“ rěkaše tema poslednjeje serbopolitiskeje debaty nachilaceje wólbneje doby w Sakskim krajnym sejmje. Wo pozicijach zapodawarki wotpowědneho namjeta, frakcije Lěwicy, su Serbske Nowiny 4. julija rozprawjeli. Wotbłyšćujemy dźensa přinoški dalšich zapósłancow nimo AfD, kotraž njebě so słowa jimała.
Wjace hač tysac kilometrow z awtom po puću byli su štyrjo młodostni w starobje mjez dźesać a 14 lětami w Awstralskej. Policija móžeše skupinu ćeknjenych skónčnje w zwjazkowym staće New South Wales dosahnyć. Dźěći běchu w domjacym Rockhamptonje z awtom jednoho z nanow wotjěli a samo rozžohnowanski list zawostajili. Na dyrdomdejsku jězbu wzachu pjenjezy a material za wudźenje sobu. Motiw młodostnych za wulět njeje hišće doskónčnje znaty.
Awto na awtodróze ćišćeć dyrbjał je šofer na A 4 mjez Hornim Wujězdom a wotpočnišćom Hornja Łužica, po tym zo bě jemu sobotu dopołdnja bencin wušoł. Sta šoferow dyrbješe so na jednočarowej dróze awtodróhoweho twarnišća za 43lětnym „nastupić“. Při tym nasta dźesać kilometrow dołhe haćenje, kotrež so hakle po dobrej hodźinje zaso rozpušći.
Ankara (dpa/SN). Prěnje ruske raketywotwobaranske systemy su po puću do Turkowskeje, zdźěli dźensa zakitowanske ministerstwo w Ankarje. Konflikt mjez USA a Turkowskej so tak dale přiwótřa. Knježerstwo USA je so masiwnje přećiwo zasadźenju ruskeho raketoweho systema w powětrowym rumje NATO wuprajiło a ze sankcijemi hrozyło. Hižo loni běchu sankcije zajeća ameriskeho duchowneho w Turkowskej dla hospodarstwu kraja jara zeškodźeli.
Njewjedra zachadźeli
Trier (dpa/SN). Njewjedro ze sylnym dešćom a krupami je wčera wječor wohnjowych wobornikow w porynsko-pfalcskim Trieru zaběrało. Tam zličichu w nocy na wšě 220 zasadźenjow. Na zbožo so nichtó zranił njeje. Njewjedro pak je so masiwnje na wobchad, wosebje železniski wuskutkowało. Tež w Delnjej Sakskej mějachu wobornicy njewjedra dla ruce połnej dźěła, při čimž běštej měsće Papenburg a Haren wosebje potrjechenej.
Zhromadnje telefonowałoj
Düsseldorf (dpa/SN). Bywši intendant Zapadoněmskeho rozhłosa (WDR) Fritz Pleitgen ma swobodu měnjenja w medijach za wohroženu. „Homogene rozprawnistwo, kaž smy je pola temow nastupajo Grjeksku, stawk lokomotiwnikow, Rusku, brexit abo Trumpa dožiwili a hišće dožiwjamy, je poněčimna smjerć demokratije“, měni 81lětny Pleitgen dźensa w nowinje Handelsblatt. Wón wobkedźbuje to w mnohich wažnych prašenjach. „Wšitcy pochoduja do samsneho směra, častodosć w přezjednosći z knježacym měnjenjom w politice. To je jara strašne. Něhdy mějachmy wjace zwady wo směr, na přikład w politice wuchodej napřećo. Tehdy běchu fronty w kraju jasne.“
Mnohotnosć měnjenjow zachować, je nic naposledk nadawk zjawnoprawniskeho rozhłosa. Tón ma z priwilegom popłatka móžnosć, najebać razne změny w medijowej branši swoju funkciju spjelnić. „Z ryzy připowědźenjemi lutowanja njeje to dawno wotbyte“, Pleitgen praji. Wažny je program. Wo tym dyrbja bóle rěčeć a so wadźić a nic jenož wo pjenjezy. Zo sćelaki ze srědkami rozhłosoweho popłatka swědomiće wobchadźeja, je Pleitgenej samozrozumliwosć.
Swój bydlenski mobil mylnje zapalił je 76lětny w durinskim Kammerforsće. Do toho bě z płunowym palakom njerodź wotpalił. Płomjenja pak přeskočichu na třěchu, pod kotrejž campingowy mobil steješe. Muž drje hišće spyta z awtom pod třěchu wujěć, njemóžeše pak je wjace wuchować. Bydlenski mobil a třěcha stej dospołnje zničenej. Wěcna škoda wučinja šwarne 50 000 eurow.
Štóž na horu Zugspitze pućuje a chce w Knorr-hěće přenocować, dyrbi při zachodźe swój spanski měch najprjedy raz do mikrožołmaka tyknyć. 30 sekundow při 600 wattach ma njewitanym hosćom – šćónam – žiwjensku swěcu hasnyć. Njelube překasancy-drapy běchu minjene lěta stajnje zaso problemy w alpskich přebywanišćach načinjeli. Nětko su mějićeljo hětow skutkownu naprawu našli, a pućowarjo su ju přiwzali.
Teheran (dpa/SN). Iranske rewoluciske gardy su dementowali, zo je w Perskiskim zaliwje ke konfliktej z britiskej łódźu dóšło. „Minjene 24 hodźin njemějachmy w potrjechenej kónčinje žadyn konflikt z wukrajnymi łódźemi, tež z britiskimi nic“, zdźěleja rewoluciske gardy na swojej internetnej stronje. Rěčnik britiskeho knježerstwa je dźensa rano zdźělił, zo běchu so iranske łódźe w zaliwje britiskemu wolijowemu tankowcej do puća stajić chcyli. Britiska fregata pak je tomu zadźěwała.
Mortwi při njewjedrach
Athen (dpa/SN). Sylne njewjedra su sej na sewjeru Grjekskeje minjenu nóc znajmjeńša šěsć smjertnych woporow žadali. Mjez mortwymi su turisća z Čěskeje, Rumunskeje a Ruskeje. Wosebje potrjechena bě mjez dowolnikami woblubowana połkupa Chalkidiki. Tam běchu padace štomy wjacorych ludźi morili. Čěskaj mandźelskaj zemrěštaj, jako wichor jeju bydlenski mobil sobu hrabny. Njewjedra slědowachu na žołmu horcoty z temperaturami hač do 40 stopnjow.
Tež Salzburg dróhi zawěra