Tesla smě dalši lěs pušćić
Twarc elektroawtow z USA trjeba płoninu za twornju južnje Berlina
Grünheide (dpa/SN). Ameriski twarc elektroawtow Tesla smě za swoju planowanu fabriku w Grünheide juhowuchodnje Berlina dalše 82,3 hektary lěsa trjebić. Krajny wobswětowy zarjad Braniborskeje je jemu po informacijach wobswětoweho ministerstwa wčera dočasnu dowolnosć sposrědkował. Tesla trjeba płoninu po swójskim podaću jako składźišćo.
Dočasny započatk pušćenja wotpowěduje zakonjej za škit před emisijemi. Kaž z derje informowanych kruhow wuchadźa, je Tesla trěbnu płoninu wo 17 hektarow redukował. Při prěnim pušćenju běchu hižo 92 hektarow lěsa wotstronili. Tesla chce w swojej prěnjej europskej tworni přichodnje kóždolětnje 500 000 elektroawtow twarić. Šef předewzaća Elon Musk chce w Grünheide zdobom najwjetšu baterijowu fabriku swěta natwarić. Dotal nima Tesla hišće doskónčnu twarsku dowolnosć a je z dźělnymi přizwolenjemi na swójski riziko twarić započał. Přirodoškitarjo boja so negatiwnych sćěhow za wobswět.
To a tamne (01.12.20)
Njemało wustróžiła je so šoferka wosoboweho awta, jako na awtodróze A 2 pola Bielefelda naraz cuza wobruč prědnje wokno jeje awta přerazy a na pódlanskim sedle ležo wosta. 32lětna so njezrani, policija zdźěli. Wona móžeše po zražce awto na nabóčnej čarje wotstajić a zastojnikow wołać. Dotal njewědźa, štó je koleso awta abo připowěšaka zhubił, dokelž je zawinowar dale jěł. Policija pyta za swědkami. Škodu trochuja na 8 000 eurow.
Z hodownymi filmami zabawjeja pinguinow w Londonskim akwariju Sea Life. „Je wulkotnje widźeć, kak jara so pinguinam filmy lubja“ rěka w zdźělence akwarija, kiž dyrbi lockdowna koronawirusa dla tuchwilu zawrjeny wostać. Wopytowarjo su zwěrjatam přewšo wažne. Fachowcy su přeswědčeni, zo pinguiny ludźi runje tak intensiwnje a wćipnje wobkedźbuja kaž nawopak.
Sto lět znowazałoženja
Drježdźany (B/SN). Drježdźansko-Mišnjanske biskopstwo je najstarše na wuchodźe Němskeje. Jeho dieceza přihotuje dostojny jubilej pod motom „100 dobrych přičinow“. Předwčerawšim, na předwječoru prěnjeho adwenta, je biskop Heinrich Timmerevers z liturgiskim nyšporom w Lipšćanskej propstowskej cyrkwi swj. Trojicy jubilej swjatočnje zahajił. Symbolisce chcedźa jubilejne lěto přewodźeć z łódźu, kotraž často cyrkej symbolizuje. „Wona wjedźe swojich wěriwych přez najwjetše wichory časa a bjerje nam strach“, je biskop Timmerevers přeswědčeny. Wosebity dźeń biskopstwa budźe klětu 20. junija při Łobju w Drježdźanach.
Wita wuprajenja bamža
Erfurt (B/SN). Erfurtski moralteologa Josef Römelt wita wuprajenja bamža Franciskusa k homoseksualnym žiwjenskim zhromadnosćam. „Bamž tłóči w katolskej cyrkwi na nowe zrozumjenje, kotrež tež runosplažnosć lubosće w swojej hłubokej čłowjeskosći respektuje a do towaršnosće integruje. Při tym wabi wón zdobom za diferencowane zrozumjenje žiwjenskich formow.“
Přećiwo znjewužiwanju
Mjeńšinam chribjet skrućeja
Berlin (SN/JaW). Zwjazkowy sejm Němskeje namołwja němske knježerstwo namjety europskeje wobydlerskeje iniciatiwy Minority SafePack (MSPI) Federalistiskeje unije europskich narodnych mjeńšin (FUEN) bórze pruwować a so za to zasadźeć, zo ju w Europskim parlamenće tematizuja a namjety MSPI zwoprawdźa. To su zapósłancy pjatk w Berlinje schwalili. Při tym su próstwu frakcijow CDU/CSU a SPD jednohłósnje přiwzali. W njej žadaja sej mjez druhim, zo so knježerstwo „při kóždejžkuli přiměrjenej składnosći za škit a spěchowanje narodnych mjeńšin w zmysle MSPI na europskej runinje kaž tež za iniciatiwu zasadźa“. Dale ma knježerstwo „financne srědki w dosahacej měrje přewostajić, zo by so škit mjeńšin z europskej naležnosću stał“. Próstwu frakcije Zelenych, kotraž wobsahowaše tež žadanje „mjeńšinowe prawa w prawniskich ramikach Europskeje unije zakótwić ... a adekwatny plan sankcijow zdźěłać“, bu wotpokazany.
Kraje so kritice wobaraja
Lipsk (dpa/SN). Předsyda frakcije CDU/CSU w zwjazkowym sejmje Ralph Brinkhaus (CDU) žněje ze swojim žadanjom za sylnišim wobdźělenjom krajow w koronakrizy přiběrajcy kritiku. Tak je durinska financna ministerka Heike Taubert (SPD) na to pokazała, zo je swobodny stat hižo 700 milionow eurow jako direktnu pomoc wot pandemije potrjechenym přewostajił. Sakski financny minister Hartmut Vorjohann (CDU) kritizowaše, zo nastawa zaćišć, zo so kraje na pomocy scyła njewobdźěleja. „To tak njetrjechi.“
Natwarja strowotniske składy
Berlin (dpa/SN). Jako konsekwencu z koronakrizy chce Zwjazk na 19 městnach Němskeje narodnu strowotnisku rezerwu z wažnymi maćiznami kaž nahubnikami a škitnej drastu natwarić. Tole je minister za strowotnistwo Jens Spahn (CDU) připowědźił. „Pandemija nas wuči, zo dyrbimy na nju lěpje přihotowani być“, rjekny Spahn powěsćerni dpa.
Taksije wojuja wo eksistencu
Něhdźe 1 500 ludźi z Němskeje a Pólskeje je minjenu sobotu ...
Dźěłodawarjo: Ničo k rozdźělenju
Test za wšěch
Wo wusměrjenju AfD so wadźili
Kalkar (dpa/SN). Z naležnym apelom na wadźacych čłonow je předsyda AfD Tino Chrupalla 11. zwjazkowy zjězd strony zakónčił. „Mazane draby płokamy doma a nic w zjawnosći“ rjekny wón wčera w Kalkaru nad delnim Rynom. Na dwaj dnjej trajacym zjězdźe běchu so wo tym zwadźili, kak agresiwnje směli čłonojo AfD zjawnje wustupować.
Co-předsyda Jörg Meuthen bě debatu wo tym ze swojej zahajenskej narěču nastorčił. Kritikarjo jemu na to wumjetowachu, zo je stronje ze swojeje narěču zeškodźał a zo chcył ju pačić. Tole Meuthen jako „zaměrne ideologiske zawjerćenje“ raznje wotpokaza. „Sym sej jednotu a disciplinu wužadał. To zdawa so mi woprawdźe nuznje trěbne“, Meuthen rjekny. AfD ma ćežke wólbne lěto před sobu a je w nahladnosći wolerjow na runje hišće sydom procentow spadnyła. „Wojuju z cyłeje wutroby za wuspěch strony. Tutón wuspěch pak zdobudźemy sej jenož ze serioznym wustupowanjom.“ AfD dyrbjała „strona byrgarskeho rozuma“ być, Meuthen delegatam rjekny.
Laschet za nowe koncepty
Dalše wobmjezowanja koronawirusa dla w potrjechenych wokrjesach
Drježdźany/Berlin (dpa/SN). Sakska přiwótřa hladajo na dale wysoke ličby infekcijow wot jutřišeho swoje naprawy přećiwo koronawirusej. K tomu słuša tež wobmjezowanje swobody pohibowanja, je-li sydom dnjowska incidenca w běhu pjeć dnjow ličbu 200 překročiła. Tole je ministerski prezident Michael Kretschmer (CDU) w Drježdźanach připowědźił. Potom smědźa ludźo w potrjechenych wokrjesach jenož hišće z wažnych přičin bydlenje wopušćić, potajkim na dźěło, k nakupowanju abo do pěstowarnje a šule. Sydom dnjowska incidenca wotbłyšćuje ličbu nowych infekcijow na 100 000 wobydlerjow w běhu tydźenja.
