Budyšin (SN/MkWj). Zapósłanc CDU w Sakskim krajnym sejmje Marko Šiman wobydlerjow z naležnym apelom prosy, wšitko činić, zo by so dalšemu rozšěrjenju koronawirusa zadźěwało. Hladajo na połoženje w Hornjej Łužicy a w Budyskim wokrjesu je bytostne, zo wostanje strowotniski system dale dźěłakmany, rjekny Šiman na telefoniskej nowinarskej rozmołwje w Budyšinje. „Wostanjemy-li wšitcy disciplinowani, móžemy chorosć přewinyć.“ Wosebje wažne su zapósłancej tež zawody, kotrež dyrbja schorjenych abo w karantenje přebywacych přistajenych narunać. Dźěło poradźowarnjow, častodosć jenički zwisk wosamoćenych ludźi, měło dale pjenježnje podpěrane być.

Berlin (dpa/SN). Dobroćelske zwjazki warnuja před socialnymi konfliktami a njesprawnosćemi w zwisku z planowanym šćěpjenjom přećiwo koronawirusej. „Ručež změjemy dowoleny serum, dožiwimy debatu wo jeho rozdźělenju“, rjekny hłowny jednaćel Paritetiskeho dobroćelskeho zwjazka Ulrich Schneider Berlinskim nowinarjam. Najprjedy pak šćěpja strowotniske rizikowe skupiny a medicinski personal, potom tych, kotrychž w hospodarstwje trjebaja abo kotřiž su za system wažni, Schneider po­twjerdźi. Štóž njeje z towaršnostneho abo hospodarskeho wida tak wažny, dyrbi so „zady nastupić“. To wězo ke konfliktam powjedźe, jednaćel dobroćelskeho zwjazka warnuje. Runje tak njesměło so stać, zo bohaći rynk čakacych wobeńdu, z tym zo sej šćěpiwo za wjele pjenjez we wukraju kupja. „Stat njesměł sej jeho rozdźělenje z rukow wzać dać a to mocam wičneho hospodarstwa přewostajić“, sej Schneider žada. Hewak maja ći z najwjetšimi móžnosćemi najlěpši přistup. Tak by dwuklasowa towaršnosć nastała.

Zwjazkowe kraje chcyli wobmjezowanja koronawirusa dla přiwótřić

Berlin (dpa/SN). Politikarjo Zwjazka a krajow žadaja sej razniše wobmjezowanja za kónčiny z wosebje wulkimi ličbami koronainfekcijow. Bayerski kabinet bě hižo wčera nowe naprawy wobzamknył. Mjeztym wo tym debatuja, hač njedyrbjeli so ministerscy prezidenća hišće do hód znowa zetkać. Dotal maja woni dalšu konferencu hakle 4. januara planowanu. Bayerski ministerski prezident Markus Söder (CSU) bě konferencu ministerskich prezidentow nastorčił. Tajka budźe „prawdźepodobnje“ trěbna, dokelž měli so wšitcy hišće raz wo tym rozmołwjeć, što so hody a silwester stanje. Konfe­rencu zwołać žada sej tež strowotniski ­fachowc SPD Karl Lauterbach. Wón měni, zo měli wšitke wobchody po hodźoch „znajmjeńša dwaj tydźenjej“ zawrjene wostać.

Ze suwadłom měškow w swójbnym drive-inje je swj. Mikławš w Allgäuju dary rozdźělał. 38 swójbow bě so za wčerawšu akciju při gratowni wohnjoweje wobory w Rettenbergu w Hornim Allgäuju přizjewiło a zamołwitym dary do toho přiwjezło. Wšitko wotmě so bjez kontakta: Kóžde awto měješe 15 mjeńšin chwile, sej po měšk darow při suwadle dojěć. Loni bě Mikławš na nawjes přijěł. Tónkróć dyrbjachu so korony dla z nuzowej wariantu spokojić abo akciju wupadnyć dać.

Pječwa dla biłoj staj so mužej w kupnicy žiwidłow w badensko-württembergskim Rheinfeldenje. 56lětny bě 22lětneho ­napominał, zo njesmě pječwo z rukomaj z regala brać. Tón jeho na to křiwdźeše. Połoženje so tak přiwótři, zo so wobaj na kóncu plistowaštaj a do so biještaj. Policija přepytuje nětko přećiwo woběmaj ranjenja ćěła dla.