Za „lěpšu“ Čěsku
To a tamne (30.10.20)
W spanskim wobleku nakupować hić je nawoda jedneje z Duisburgskich kupnicow zakazał. Wón bě so nad žonu mjerzał, kotraž dopołdnja w spanskim wobleku zhromadnje ze swojej dźowku, kiž bě runja tak zdrasćena, nakupowaše. Po tym zo bě žonje přećelnje prosył, wobchod wopušćić, powěsny při durjach taflu ze zakazom. Nakupy tajkeho razu su „z hygieniskich přičin njeakceptabelne“.
Na awtodróhu zabłudźił je so młody psyk njedaloko sewjerorynsko-westfalskeho Herforda. Do toho bě kolesowar do štyri měsacy stareho Jack Russella zajěł. Wustróžany pos ćekny na A 2 a běhaše bjez orientacije tam a sem a wohrožowaše wobchad. Šoferojo awtow informowachu policiju. Připadnje přitomna škitarka zwěrjatow přewostaji zastojnikam sak a transportnu kistu. Mjeztym je „Paul“ zaso pola swojeho wobsedźerja.
Zaso protesty w Pólskej
Waršawa (dpa/SN). We wjacorych pólskich městach su wčera zaso tysacy ludźi přećiwo přiwótřenemu prawu na wotehnaće na dróhu šli. Bě to mjeztym sedmy dźeń protestow, po tym zo bě wustawowe sudnistwo noworjadowanje wopodstatniło. Po tym njesmědźa žony dźěćo tež potom wotehnać, hdyž je wone w maćernym žiwoće ćežko zbrašene. W třećim najwjetšim měsće Łódźi zhromadźi so 20 000 přewažnje młodych ludźi. Knježacu stronu PiS kritizowachu na plakatach z jaknymi wudmami.
EU wuradźuje wo pandemiji
Brüssel (dpa/SN). Statni a knježerstwowi šefojo Europskeje unije su dźensa wo zhromadnym postupowanju přećiwo druhej žołmje koronapandemije wuradźowali. Na widejowej konferency dźěše předewšěm wo zhromadnu strategiju šćěpjenja a wo wuslědźenje kontaktnych wosobow. Zwjazkowa kanclerka Angela Merkel (CDU) bě so ze swojimi kolegami před tydźenjomaj dojednała, w pandemiji přichodnje wušo hromadźe dźěłać.
Nowe zakazy w Francoskej
Zastupjerjo zarjadowanskeje branše su wčera w Berlinje ...
Testy optimalnje zasadźeć
Drježdźany (dpa/SN). Z jednej milionu eurow spěchuje Sakska slědźenski projekt za optimalne zasadźenje koronatestow. „Dźakowano digitalnemu rozrisanju smy najlěpše wužiwanje testow namakali a to je wažny wobstatk našeje strategije k wobmjezowanju pandemije“, rjekny minister za wědomosć Sebastian Gemkow (CDU) wčera w Drježdźanach. Wuslědki slědźenjow nochcedźa jenož na aktualnu pandemiju nałožować, ale tež při přichodnych infekcijach zasadźeć.
Zaměstnić chcedźa předewzaće w Zhorjelskim Center of Advanced Systems Understanding (CASUS), jednym z na interdisciplinarne zhromadne dźěło wšelakich wědomostnych wobłukow wusměrjenym wotrjedźe Helmholtzoweho centruma w Drježdźanach-Rossendorfje. Wuslědźić chcedźa na zakładźe aktualnych datow móžne scenarije, kak móhło so w Němskej problemam při testowanju na infekcije zadźěwać a kak móhli so móžnosće optimalnje zasadźeć. K tomu słuša zwěsćenje kapacitow wšědnych přepytowanjow a zmysłapołne rozdźělenje testowanskich centrumow. Prěnje wuslědki maja klětu nazymu předležeć.
Kretschmer gratuluje Kamjenicy
Drježdźany/Kamjenica (dpa/SN). Sakski ministerski prezident Michael Kretschmer (CDU) je Kamjenicy k wuzwolenju za Europsku kulturnu stolicu 2025 gratulował a městu wobšěrnu podpěru krajneho knježerstwa přilubił. Wone chcyło tomu přinošować, „zo stanje so 2025 z cyle wosebitym lětom, z wuprudźenjom, impulsom za Kamjenicu, Saksku, Němsku a wšu Europsku uniju“, rjekny Kretschmer wčera we widejowym poselstwje po oficialnym wozjewjenju jury na dobro sakskeho města.
Europska fachowa jury bě wčera namjetowała, Kamjenicu za Europsku kulturnu stolicu powołać. Z tym bě so sakske město přećiwo Hannoverej, Hildesheimej, Magdeburgej a Nürnbergej přesadźiło, kotrež na lisćinje tohorunja móžnych kandidatow stejachu. Hižo minjeny december běchu Drježdźany, Gera a Žitawa wurisanje wopušćić dyrbjeli.
„Kajke to dźěło, kajki to angažement, kelko kreatiwity a mudrych idejow běchu za to trěbne“, Kretschmer praji. „Wy sće jury přeswědčili, to je wulkotne.“
Hosćencarjo naprawy šwikaja
Dalše raznje wobmjezowanja koronawirusa dla wukazane
Berlin (dpa/SN). Razne naprawy přećiwo koronawirusej, kotrež bě konferenca ministerskich prezidentow Němskeje zhromadnje ze zwjazkowej kanclerku Angelu Merkel (CDU) wobzamknyła, su mjez hotelownikami a hosćencarjemi wulke njezrozumjenje zbudźili. „Předewzaćeljo hotelownistwa a gastronomije chabłaja mjez hněwom a zadwělowanosću“, rjekny hłowny jednaćel zwjazka Swójbnych předewzaćow Albrecht von Hagen powěsćerni dpa. Zwjazk němskich hotelownikow a hosćencarjow warnowaše, zo hrozy tysacam předewzaćam bjez wobšěrneje pjenježneje pomocy insolwenca. Hłowna jednaćelka zwjazka Ingrid Hartges so starosća, zo dyrbi wulki dźěl zawodow zawrěć. Wona je sej wěsta, zo třećina wšěch 245 000 zawodow přichodnu zymu njepřetraje. Mnozy su rozsudźeni, přećiwo wukazanemu zawrjenju hosćencow a hotelow sudnisce skoržić. Wiceprezident zwjazkoweho sejma Wolfgang Kubicki (FDP) jich podpěruje: „Namołwjam wšěch potrjechenych, prawniske srědki přećiwo tutym naprawam nałožować.“
Spodźiwna terapija
Wčera wukazane naprawy Zwjazka a zwjazkowych krajow dopokazuja, zo njewědźa sej zamołwići politikarjo w boju přećiwo koronawirusej poprawom žaneje žiweje rady wjace. Nětko chłostaja runje tych, kotřiž mějachu raznych zakazow dla hižo wot nalěća najbóle ćerpjeć: hotelownikow a hosćencarjow. Smy so nimale hižo na to zwučili, zo nas z nahubnikom posłužuja, zo steja blida z wulkim wotstawkom a zo dyrbimy swoje daty zawostajić. Mjeztym su tež fachowcy zwěsćili, zo njejsu hosćency wuchadźišćo nowych infekcijow. Kina a dźiwadła su tak a tak lědma hišće dźěłać móhli.
Kak by było, by-li knježerstwo sprawnje přiznało, zo přičiny nowych natyknjenjow z koronawirusom prosće njeznaje. Město toho nam napowědaja, zo budźe po měsac trajacej „terapiji“ wšitko zaso w porjadku. A politikar SPD Lauterbach chce nam policiju do domu pósłać, hdyž so k swójbnemu swjedźenju zetkamy. Hórje wjace njeńdźe. Marko Wjeńka
Najwyši staw
To a tamne (29.10.20)
Na wšě 6,7 kilogramow ćežke a 57 centimetrow wulke dźěćo je so Choćebuskej Carla-Thiemowej chorowni narodźiło, štož je tam dotalny rekord. Šeflěkar žónskeje kliniki rjekny nowinarjam, zo njeje tajke něšto w swojich 25 słužbnych lětach na porodowej staciji hišće dožiwił. Lěkarjo běchu ćěšenka w 37. tydźenju samodruhosće wurězali. Po krótkim zastaranju na intensiwnej staciji je hólc mjeztym pola swojeje maćerje.
Lubosć k tunjakej (Thunfisch) w tyzach je muža w Awstriskej pohnuła, we wobchodach kradnyć. Policija namaka wjace hač sto tyzow tunjaka w awće muža, po tym zo bě detektiwka jeho lepiła. Zastojnikam muž rozłoži, zo tunjaka přewšo lubuje zo měješe strach, zo njemóže konserwy koronakrizy dla wjace kupić. Po zwěsćenju policije bě 50lětny w dźewjeć wobchodach takle „nakupował“.
