Bołharka mjez wuměłcami
Wutrobne smjeće Swjetanki Kiriloweje- Schnorrbusch je hižo zdaloka słyšeć, hdyž so wopytowarjo po Miłočanskej skale rozhladuja. „Chcych sej hižo dlěje Hornju Łužicu wotkryć. Z wobdźělenjom na lětušej mjezynarodnej dźěłarničce mam skónčnje składnosć za to“, praji mi 1956 rodźena rězbarka.
Erika Jahnowa muzej nastorčiła
Dešno (SN/at). Domizniski muzej w Dešnje wobsteji mjeztym 35 lět. To chcedźa sobotu ze swojimi wopytowarjemi woswjećić. Muzejownicy a jich angažowani pomocnicy njestarachu so jenož wo wotměnjawy program, kotryž wjelelětnej tradiciji kulturnišća wotpowěduje. Woni budu swojim hosćom wězo tež poboku. Za muzejowu nawodnicu Babettu Zenkerowu je sobotny swjedźeń witana składnosć, zo by po dlěšej tworićelskej njepřitomnosći a nawróće do wšědneho muzejoweho dnja jubilejne zarjadowanje sobu přihotowała. Za wosebje wažne Babette Zenkerowa při tym ma, hódnoćić Eriku Jahnowu. Wona bě nastork dała a sama na čestnohamtskej runinje to zeskutkowniła, na čož móžeštej nětčiša nawodnica a jeje team nawjazać a Dešnjanske muzealne zarjadnišćo na to wuwić, štož dźensa je.
Wo hudźbne přinoški staraja so Serbska reja, hercy z Düppela ze srjedźowěkowskej muziku a spěwytwórc Bernd Pittkunings. Rjane dožiwjenje budźe wopytowarjam zawěsće drastowa přehladka z eksponatami ze srjedźowěka hač k twórbam Serbski modern.
Wuměłski projekt namołwja
Kedźbliwy wobchad čłowjeka z přirodu filmowali
Trajne předewzaća steja w srjedźišću filmowych projektow towarstwa Sukuma Arts. Dwaj dnjej je nětko team z režiserom Thomasom Frickom w Njebjelčicach nahrawał.
Njebjelčicy (SN/MiR). „Nas zajimuja wosoby, kotrež z přeswědčenja, ze zmužitosću a widom do přichoda sej trěbny pohlad za mjezy zwaža“, rozłožuje Anne Schuster z Drježdźanskeho towarstwa Sukuma Arts, „chcemy zhonić wotmołwy ze wsow a městow na globalne prašenja. A tajke, toho smy sej wěsći, namakamy w Njebjelčanskej gmejnje.“ Pod hesłom „Change by design not by desaster“ staji sej towarstwo lětsa stawizny wo hibanju w hospodarstwje do fokusa. „Při tym nas wosebje zajimuje, kak w gmejnach nimo zarjadnistwa puće kroča, kotrež su njewšědne.“ Z połdradnjowskeho nahrawanskeho materiala ma nastać třiminutowski pask, kotryž chcedźa w interneće pokazać a filmowym festiwalam za nominowanje poskićić. Zakład filmoweho projekta „Stories of Change“, kiž bu hižo wjackróć wuznamjenjeny a do kotrehož tež projekt Njebjelčicy słuša, je 17 zaměrow wo trajnosći, kotrež bě UNO w lěće 2015 wobzamknyła.
Jubilej twjerdeje hudźby při skale
Nuknica (wj/SN). Dwacety raz wotmě so minjeny kónc tydźenja festiwal Nukstock při Nukničanskej skale. Towarstwo Baraka je sej k tomu zaso hudźbne skupiny z tu- a wukraja přeprosyło. Najdlěši puć měještej cyłkaj Night Viper ze Šwedskeje a Cist z Ruskeje. Prěni mjenowany bě po měnjenju mnohich lětsa wuměłski wjeršk swjedźenja. Přijomne wjedro přiwabi něhdźe 700 fanow a słucharjow twjerdeje hudźby. Wulki dźěl z nich bě skerje z Hornjeje Łužicy, ale na stanowanskej łuce běchu tež awta na přikład z Hamburgskim čisłom widźeć.
Swjedźeń prěni raz samostatnje
Budyšin (CS/SN). Tójšto lět wotměwaše so Budyski klankodźiwadłowy swjedźeń paralelnje k swjedźenjej Stareje wodarnje. Tón pak Tilo Rosjat po 25 lětach w tej formje hižo organizować nochcyše. Město toho wotměje so přichodny kónc tydźenja nowy staroměšćanski festiwal.
Klankodźiwadźelnik Ekkehart Heute a Stefan Lehmann z Kamjentneho domu, organizatoraj klankodźiwadłoweho swjedźenja, chcyštaj pak jón znowa posledni kónc tydźenja w awgusće přewjesć. Rozsud wopokaza so minjenu sobotu a njedźelu jako prawy. Přetož wopytowarjo přichadźachu kaž zwučene na teren pod Karasekowej wěžu. Wulcy a mali lubowarjo klankodźiwadła móžachu so wot kašpora a jeho přećelow wobkuzłać dać. Hosćićel Ekkehart Heute předstaji znate Budyske powědki w cyle nowym šaće. Wón so wjeseleše, zo klankodźiwadło tež dźensa hišće młodu generaciju fascinuje, byrnjež elektroniska konkurenca wulka była.
„Krjudowana Łužica“
Kóždemu swoju šansu
Chór Budyšin na Čornoboze spěwał
Benedikt Dyrlich: „Běch w NDR a w Serbach bjez šansy“
Budyšin (SN/JaW). „Doma we wućekach 1“ je prěni dźěl noweje knihi basnika, spisowaćela, publicista a žurnalista Benedikta Dyrlicha, kotruž je wčera wječor w Budyskej Smolerjec kniharni zajimowanemu publikumej předstajił.
Lektor Pětr Thiemann wuzběhny publikaciju jako „wosebitu knihu“. Jednaćelka Ludoweho nakładnistwa Domowina, kotrež knihu wuda, Marka Maćijowa dźakowaše so Dyrlichej předewšěm za to, zo „je zmužitosć měł zjawnosć do swojeho žiwjenja hladać dać“. Zdobom zwurazni jednaćelka LND wjeselo nad tym, zo je prěni dźěl awtobiografije po dlěšim času přihota wušoł. Nimo toho móžeše wozjewić, zo předleži nowostka paralelnje tež hižo jako e-book, kotryž móža sej zajimcy kupić a na mobilnych nastrojach abo kompjuteru čitać.
