Rozhlad změje nowe wobličo
Budyšin (SN/CoR). Lěto po tym zo je linguistka Sara Mičkec redakciju Rozhlada přewzała, chce wona wot klětušeho wuhotowanje serbskeho kulturneho časopisa změnić.
„Njeńdźe wo to, zwučene wobličo dospołnje na hłowu stajić a čitarjow wottrašić. Sym z wuhotowarku Aileen Burkhart, kotraž bě so hižo wo nowy layout Serbskich Nowin starała, wuradźowała. Zwěsćichmoj někotre dostatki, kotrež je wona z nowym naćiskom wurunała“, powěda šefredaktorka Rozhlada. Konkretnje potrjechja změny na přikład družinu a wulkosć pisma, rozrjadowanje stron kaž tež zasadźenje wobrazow.
Z nowym layoutom su zdobom techniske wuměnjenja za to date, zo hodźi so časopis přichodnje tež jako e-paper internetnje abonować. Na te wašnje budu wšitke přinoški inkluziwnje wobrazowy material tež online čitajomne. „Wobličo Rozhlada so jenož njewomłodźi, ale wotpowědujemy tež zwučenosćam tych, kotřiž medije radšo w digitalnej formje wužiwaja“, praji Sara Mičkec.
Nowosć w Njeswačidle
Wosebite serbske pohladnicy
Słuchoknihu z basnjemi swojeho bratra předstajił
Budyšin (CS/SN). Wopyt serbskeho dźiwadźelnika Michała Lorenca wčera w Budyskim klubje wuchowarjow rěče bě hižo třeći swojeho razu. Kaž wón sam rjekny, bě to jeho prěni zjawny wustup po dlěšej přestawce chorosće dla. Lorenc předstaji w Ludowym nakładnistwje Domowina wušłu słuchoknihu swojeho bratra Kita Lorenca, kotruž bě sam w studiju nahrawał. Projekt słuchoknihi móžachu mjez druhim tohodla zwoprawdźić, dokelž njebě Michał Lorenc honorar brał, kaž wón rjekny. LND dźě njemóže za přewažnje němskorěčne projekty srědki Załožby za serbski lud wužiwać. Na słuchoknize bě Lorenc po swójskich informacijach cyłe lěto dźěłał. Album wopřijima dwě cejdejce w němskej a jednu w serbskej rěči. Najwjetši dźěl basnjow na njej je w hornjo-, někotre pak su tež w delnjoserbšćinje zwěčnjene. Cyłkownje wobsahuje słuchokniha 54 serbskich a 120 němskich literarnych tekstow.
Paternoster 7je wušoł
Sydom klankow w drasće wšitkich dźěćetkow Slepjanskeje wosady je ...
Płomjo so tež we Wojerecach pali
Nałožkowy rjad dale wjedźeny
Slepo (JoS/SN). Přewšo mnohostronski bě prěni adwent w Slepjanskim regionje. W tamnišej cyrkwi su po starodawnym wašnju dźěćetko wužohnowali, na Trjebinskim Šusterec statoku mějachu dźěći při paslenju swoje wjeselo, w Serbskim kulturnym centrumje pokazuja zaso přehladku dźěćetkowych klankow z cyłeje wosady, a Slepjanski folklorny ansambl kaž tež dźěćacy a młodźinski ansambl pokročowaštej wčera popołdnju ze swojim rjadom „Nałožki, drasta a tradicije w adwenće“. 180 wopytowarjow w Slepjanskim kulturnym centrumje zhoni tójšto noweho ze swojeje serbskeje zašłosće, znajmjeńša nastupajo hudźbu a dźiwadło. Za to znosychu wuhotowarjo programa tójšto materiala, kotryž běchu zdźěla w priwatnych archiwach našli.
Najebać kontrowersy w dialogu wostać
Něhdźe 25 ludźi sćěhowaše sobotu přeprošenje na mjeztym štwórtu zhromadnu konferencu Braniborskeje techniskeje uniwersity (BTU) Choćebuz-Zły Komorow a Serbskeho instituta (SI), kotraž wěnowaše so „spomóžnemu (serbskemu) žiwjenju“. Załožba Rosy Luxemburg bě ju financnje spěchowała.
Choćebuz (FaJ/SN). Su aspekty spomóžneho serbskeho žiwjenja, kotrež móhli fungować jako směrnicy regionalneho wuwića Łužicy? Kotre potenciale ma serbska kultura, wuwiće tudyšych identitow podpěrować? A kotre konflikty to haća? Tele prašenja stejachu w srjedźišću zarjadowanja.
Moderacija a chór wosebje překwapiłoj
Delnjoserbska schadowanka překwapi zawčerawšim přitomnych z přewšo pisanym programom. Tak wustupichu najwšelakoriše hudźbne ćělesa, rejowanska skupina, sćelak RBB kaž tež studenća Lipšćanskeje uniwersity.
