Hišće w přirodźe wšitko wotpočuje. Naje­bać to su fachowcy hižo rostliny a zwěrjata lěta postajili. Štom lěta 2021 ma łaćonske mjeno ilex aquifolium. Serbja mjenuja jón wótrolist, Němcy Stechpalme. „Aqui rěka wótre a folium lisćo, tohodla wótrolist“, rozłožuje fachowc lěsnistwa Guido Budar. „Wosebitosć je, zo tón swoje zelene łopjena tež w zymje zdźerži.“ We Łužicy tajki štom skerje njenańdźemy. Typiski je wótrolist w srjedźnej Europje, hdźež su zymy miłe a hdźež włóžna klima knježi. W Němskej pak rosće wón w porynskich kónčinach kaž tohorunja při Sewjernym a Baltiskim morju. Swoje krute městno ma wótrolist w křesćanstwje. „Bołmončku su Jězusa z palmami w Jerusalemje witali. Spominajo na to swjećimy bołmončku, a to z bołminu. W južnych kónčinach Němskeje su pak hižo w srjedźowěku tež hałzy wótrolista za to wužiwali, dokelž běše štom stajnje hižo spočatk nalěća abo w jara pózdnjej zymje połny lisća a bě tuž palmje najpodobniši“, wě Guido Budar.

1 kwasna wosoba, 2 dalša kwasna wosoba, 3 Würfel serbsce, 4 jědź ­na štabiku, 5 nic knjenje, 6 jězor w Ruskej, 7 běły kóń, 8 Drechsler serbsce, 9 serbski kuzłar

Přihoty za prěni onlinowy jolka-swjedźeń z połnej paru běža. Wčera staj w Chrósćicach Bogdan a Jakub Brězan (wot lěwa) swinjo rězałoj a kołbasy za tak mjenowane jolka-pakćiki dźěłałoj. Jolku wusyłaja jutře wot 18 hodź. pod www.edudip.com/de/webinar/jolka-wjesny-klub-nuknica/670614. Zo by so swjedźeń zešlachćił, su jón firmownicy z wokoliny z pjenježnymi darami spěchowali, mjez druhim tež Rafael Vcelich z Koslowa, kiž lětuši wohnjostroj podpěruje. Foto: Feliks Haza

Rjany to wulětny cil w zymje, hdyž je wšitko rjenje ze sněhom wodźěte, kaž aktualne foto dopokazuje. Najsewjerniši dypk ­Čěskeje republiki njedaloko Steinigtwolmsdorfa pak wabi w kóždym počasu a tuž tež cyle wěsće po zakónčenju wšitkich wukazow a wobmjezowanjow korony dla. Nadźija, zo móžemy sej tam bórze zaso raz wulećeć, je tuž wulka. Foto: SN/Hanka Šěnec