Z wudaća: póndźela, 21 awgusta 2017

Wnučkowy trik zwrěšćił

Kamjenc. Bjez wuspěcha wosta minjeny pjatk popołdnju trójny pospyt, staršim ludźom z pomocu tak mjenowaneho wnučkoweho trika pjenjezy wulišćić. Njeznata wobšudnica so telefonisce pola třoch žonow w starobje 80 do 83 lět přizjewi, wudawajo so jako wnučka resp. prawnučka. Wot rentnarkow žadaše sej wona sumy mjez 3 000 a 12 000 eurami za wumysleny nuzny pad. Žana z třoch zazwonjenych pak njeda so zjebać.

Pančicy-Kukow (BW/SN). Kóždolětna zelowa njedźela, po dobrej tradiciji organizowana wo Křesćansko-socialneho kubłanskeho skutka (CSB), je wčera po informacijach zarjadowarja něhdźe 1 300 wopytowarjow do klóšterskeje zahrody w Pančicach-Kukowje přiwabiła. Wjace zajimcow hač tamne lěta bě tónraz z Radworja a Chrósćic kaž tež z wokolnych wsow, zo bychu swojeho bywšeho fararja a dźensnišeho Kamjeničanskeho propsta Clemensa Hrjehorja zetkali. Wón je hromadźe z wyšim krajnym cyrkwinskim radu Dietrichom Bauerom z Drježdźan ekumeniski nyšpor swjećił. W prědowanju zaběraše so Dietrich Bauer z rjanosću stwórby a z rjanosću čłowjeka, kotraž­ so w běhu jeho žiwjenja wuwiwa. Clemens Hrjehor na to jenož kwětki a zela we wołtarnišću pod hołym njebjom njepožohnowa, ale dźěše tohorunja přez rynki kemšerjow a jich zelowe kwěćelki pokrjepi. Na nutrnosći zaspěwachu wě­riwi zhromadnje serbski kěrluš „Budź Kralowna­ nam witana“. Za anga­žement dźakowaše so sobudźěłaćerka CSB Sonja Hejdušcyna, kotraž tohorunja serbske próstwy čitaše, duchownymaj z dopomnjenku.

Poradźeny zazběh

Bórkowy. Wjac hač 5 200 ludźi je sej kónc tydźenja na prěnim „Festiwalu twaroh a lany wolij“ w Bórkowach błótowske wjesne žiwjenje wotkryło. To zdźěli zarja­dowar pool production. Cyłkownje 51 wikowarjow, rjemjeslnikow a zahrodkarjow poskićeše tam regionalne wudźěłki. Tež wuběr kulinariskich chłóšćenkow a přisłušne recepty sej hosćo jara chwalachu.

Styki nachwilnje zastajili

Budyšin. Towarstwo Witaj do Budyšina je kóždežkuli zhromadne dźěło a wuměnu informacijow zwonka běžnych projektow z Budyskim krajnoradnym zarjadom nachwilnje zastajiło. Dołhož zastupowacy krajny rada Udo Wićaz swoje zastojnstwo dale wukonja a za zarjad dźěła, wostawa jenož tale móžnosć. „Wočakujemy a žadamy sej wotstup Uda Wićaza!“, rěka w nowinskej zdźělence towarstwa.

Lěsny woheń hašeć dyrbjeli

Přichod serbskeho kubłanja a slědźenja je tema prěnjeho kulojteho blida iniciatiwy Serbski sejm w němskej rěči, srjedu nawječor w Budyskim Serbskim domje. Milenka Rječcyna je so z kubłanskopolitiskim rěčnikom iniciatiwy dr. Andreasom Klugu rozmołwjała.

Po kubłanskim wjeršku iniciatiwy w januaru budźe to prěnje kulojte blido. Z kotreje přičiny hižo nětko tajke zarjadujeće?

A. Kluge: Tema kubłanje ma dale być centralny dźěl našeho skutkowanja. Wot spočatka lěta je so na tym polu tójšto stało. Chcemy staw wuwića zwěsćić a předstajić dotal zjawnje njeznate fakty.

Kotre to su?

A. Kluge: To chcemy tón wječor wozjewić. Móžu pak rjec, zo přinošuja k wobsahowej diskusiji wo kubłanju. Přemyslowanje wo integraciji wšěch runinow serbskorěčneho kubłanja měło być zakład za wuspěšnu serbsku kubłansku politku, kotruž chcemy z diskusijnym kołom nastorčić.

Što ma być ćežišćo wuradźowanja?

SLA spěwarjow, hudźbnikow a rejwarjow zaměrnje spěchuje

Budyšin (SN/MiR). Serbski ludowy ansambl wabi na wšelake wašnje wo dorost. W centrumje dotalneho spěchowanja steji rejwanje. Perspektiwa pak je, měć tež zaso serbskich profesionalnych spěwarjow a hudźbnikow.

„Při wšěch prócowanjach njeje w zańdźenych lětach k tomu dóšło, zo přiběraja požadanja młodych Serbow, na profesionalnym jewišću SLA skutkować chcyć. Tak mějachmy ze zahajenjom hrajneje doby 2017/2018 wobsadźić městna elewow, po dwěmaj w baleće a chórje. Ani jedyn Serb/jedna Serbowka njeje so přizjewił(a)“, jednaćelka SLA Diana Wagnerec wuswětla, „při tym bychmy profesionelnje skutkowacych Serbow rady přistajili.“ Za swobodne pozicije we wobłuku zarjadnistwa ansambla namakaja porno tomu spěšnje młodych Serbow. Za nowu hrajnu dobu mjenuje Diana Wagnerec tři nowowobsadźene pozicije w sekretariaće, marketingu a knihiwjednistwje.

Budyski wokrjes steji po wozjewjenju wurězkow z Facebookoweje rozmołwy mjez zastupowacym krajnym radu Udom Wićazom (CDU) a neonacijom Marcom Wruckom dale pod ćišćom. Dźensa wječor zeńdu so tohodla předsydźa frakcijow w Budyskim wokrjesnym sejmiku. Minjeny pjatk je ministerski prezident Stanisław Tilich (CDU) napominał naležnosć wujasnić.

Budyšin (SN/at). Předsydźa frakcijow w Budyskim wokrjesnym sejmiku rozmołwu kaž tež wurězki z Facebook-chata mjez Udom Wićazom a neonacijom Marcom Wruckom rozdźělnje posudźuja.

„Z chatom je wón definitiwnje Budyskemu wokrjesej škodźał“, rjekny Gerhard Lemm za frakciju SPD/Zelenych. Krajny rada Michael Harig (CDU) je tohodla frakciskich předsydow dźensa wječor na wosebite schadźowanje přeprosył. Lemm wočakuje, zo Udo Wićaz tam dospołny chat-protokol předpołoži. Wšako je pjatk sam w stejišću na njedospołnosć wo­zjewjenych wurězkow skedźbnił.

Lědy (PBe/SN). Z kupju bydlenskeho a hródźneho domu před 60 lětami na Lědach tworješe Lubnjowski Błótowski muzej zakład za muzealne zarjadnišćo pod hołym njebjom. Chcychu tam serbsku kulturu předstajeć. Planowachu samo cyłu wjes Lědy z wobydlerjemi na muzej pod hołym njebjom přetworić. To by rěkało tam ničo njezměnić. Lědźenjo pak so wobarachu, wšako chcychu sej na přikład­ antenu za telewizor stajić. Dźakowano přikupjenym historiskim twarjenjam z Bórkowow, Zušowa, Dłopjeho a dalšich wsow muzej přiwšěm rosće.

Muzejownicy so jara prócuja wopytowarjam stare rjemjesła zbližić. Sobotu přeprosychu woni na narodninski swjedźeń, a tónle wosebity poskitk hosćo rady přiwzachu. Běchu jara wjeseli, zo mějachu telko składnosćow, sami aktiwni być. „Naše dźěći móža cyle blisko dožiwić, kajke bě dźěćatstwo něhdy na wsy. Nimo hry a zabawy dyrbjachu wone w domjacnosći pomhać“, rjekny Anke Behnke z Freiberga. Muzejowy pedagoga Dirk Ehrhardt bě něšto stow metrow powjaza nadźěłał, zwjetša zhromadnje z dźěćimi a jich staršimi. To bě rjane swójbne dožiwjenje.

Singapur (dpa/K/SN). Namórniski ničak USA je wuchodnje Singapura z tankowcom koliděrował. Pjeć ameriskich namórnikow poćerpje zranjenja. Jich dowjezechu z helikopterom do Singapurskeje chorownje, dźesać dalšich je hišće zhubjenych. Byrnjež prědni dźěl chětro wobškodźeny był a woda so do łódźe zadobywała, je wona ze swójskej mocu dale jěć móhła. Ničak je z raketami wuho­towany, kotrež pak su na zadnim dźělu łódźe nastajane.

Pytaja za atentatnikom

Barcelona (dpa/SN). Po cyłej Europje pytaja za atentatnikom z Barcelony. Tuchwilu njeje žanych pokazkow, zo je wodźer dowozneho awta španiski region Katalonisku wopušćił, rjekny tamniši nutřkowny minister Joaquim Forn. Tola přiwšěm so hižo z europskimi policajskimi jednotkami skontaktuja. 22lětny Marokkočan Younes Abouyaaquoub bě po dotalnych informacijach sam w awće, z kotrymž je do skupiny ludźi zajěł. Při tym bu znajmjeńša 13 ludźi morjenych.

Konwoj milicy zničili