Z wudaća: pjatk, 14 septembera 2018

Pjatk 14. do 16.9.   Wjesny swjedźeń we Wotrowje

   41. błótowski swjedźeń w Lubinje

   Oldtimerowy swjedźeń w Załomju

   Kónc tydźenja za žarowace swójby w Smochčanskim Domje biskopa Bena

Pjatk 14.9. 14:00 Wulět do wjelčeho regiona – zetkanje we wjelčej bróžni na Rěčičanskim Erlichtec dworje

  18:30 Wohnjowoborne wubědźowanja na teritoriju zarjad­niskeho zwjazka Při Klóšterskej wodźe we Wotrowje

  19:00 Molerka Wiebke Herrmann z Drježdźan wotewrje we Wojerowskim wobydlerskim centrumje nowu wustajeńcu swojich wobrazow

  19:00 Perspektiwy strowotniskeho zastaranja – informaciske zarjadowanje w Kamjenskej měšćanskej dźěłarni na Hasy Rosy Luxemburg 13

  20:00 Kabaret „Mjez seksom a 60“ w Kamjenskim měšćanskim dźiwadle

  20:00 Kabaretny wječor „Kak móža poprjančki žiwjenje wuchować“ z dr. Carstenom Lekutatom w Budyskim Kamjentnym domje

Sobotu 15. a 16.9.   25. jěchanski a skakanski turněr w Hórkach

   Dźeń młodźiny biskopstwa Drježdźany-Mišno we Wechselburgu

   Nazymske wiki we Łazu

   Płachtakowanski camp za dźěći a młodostnych při Bjerwałdskim jězoru

Sobotu 15.9.   Hłowna zhromadźizna Serbskeho młodźinskeho towarstwa Pawk

Hašerjo hišće raz mocy měrja

Poslednje wubědźowanje wobornikow na teritoriju zarjadniskeho zwjazka Při Klóšterskej wodźe Pančicy-Kukow je dźensa wot 18.30 hodź. we Wotrowje we wobłuku tamnišeho wjesneho swjedźenja.

Konjacy sport

W Hórkach zarjaduje konjace sportowe towarstwo Při Klóšterskej wodźe Pančicy-Kukow dźensa, jutře a njedźelu wo­spjet wulki jěchanski a skakanski turněr w mnohostronskim jěchanju. Dźensa smědźa so wobdźělnicy hač do 19 hodź. w běrowje při wubědźowanišću přizjewić. Jutře rano we wo­smich započnu so wubědźowanja w dresurje. Po tym budu přezpólne jěchanje, dresura a skakanje. Njedźelu planuja wurisanja znowa wot 8 hodź. Wot 17 hodź. potom smědźa so přihladowarjo na wjeršk kónca tydźenja wjeselić. To mjenujcy wubědźuja so lokalni matadorojo w jězdźenju z konjacymi zapřahami. Dokładny časowy plan pod www.psv-klosterwasser.de

Prěni hrajny dźeń Viktorije

Swój prěni hrajny dźeń maja mužojo-wolejbulisća Viktorije Workecy we wobwodnej lize jutře, sobotu, we Wulkej Dubrawje. Tam nastupja w 14 hodź. přećiwo cyłkej ST 1896 Wulka Dubrawa

Spočatk pytanych słowow je wupokazany. 1 poet, 2 nic wysočina, 3 elektriski prud, 4 drasta Japančanki, 5 stolica Filipinow, 6 skoro, bjezmała, 7 ćišćany produkt, 8 reja, 9 nic podołhojte

25. jěchanski a skakanski turněr wuhotuje konjace sportowe towarstwo Při Klóšterskej wodźe jutře a njedźelu w Hórkach. Tam chcedźa tohorunja 13lětnemu hólcej z Halštrowa pomhać, kiž je na leukemiju schorjeł. Na woběmaj dnjomaj móža so wobdźělnicy, pomocnicy a wopytowarjo jako potencielni darićeljo mozowca registrować dać. Foto: SN/Maćij Bulank

Mjeztym hižo sydom lět so Łazowska gmejna prócuje, bywšu Běłochołmčansku šulu na někajke wašnje zaso wužiwać. Wšitke ideje pak zwrěšćichu. Nětko maja zaso raz nowu nadźiju.

Běły Chołmc (AK/SN). Z dobrej powěsću překwapi Łazowski wjesnjanosta Thomas Leberecht (CDU) čłonow gmejnskeje rady na jich zašłym posedźenju. Wuchodoněmska komunalna zawěsćernja je wudawki za škitnu stražu při Běłochołmčanskej šuli dospołnje přewzała. Po dołhim času je tuž jednanje skónčene, kotrež je gmejnu tójšto čuwow płaćiło.

Njeswačanska gmejnska rada wyši staršiski popłatk wobzamknyła

Njeswačidło (JK/SN). Dokelž bě Njeswačanski wjesnjanosta Gerd Schuster (CDU) po wulkim wjeršku wjesneho jubileja, kiž bě sej tež wot njeho wjele mocow žadał, w zasłuženym dowolu, je jeho zastupjer Norbert Braun (Rjemjesło a přemysło) zašłe posedźenje tamnišeje gmejnskeje rady nawjedował.

Zastupiš-li w Budyšinje do internata Serbskeho gymnazija, zetkaš tam přećelnu a wjesołu žonu połnu elana – Weroniku Bulankowu. Z lubosću stara so wona wo šulerjow, kotřiž chwala sej ju jako swoju „zastupnu mać“, hdyž njemóža wotydźenja domoj jězdźić. Mjeztym hižo 25 lět Weronika Bulankowa z internatnikami spěwa, pasli, moluje a za jich domjacymi nadawkami hlada.

Weronika narodźi so jako třeće dźěćo do Wajdlichec swójby w Kukowje, a hakle w pěstowarni nawukny němsce rěčeć. Wosebje horda je na swoju mać, kotruž bě w starobje hladała. Herta Wajdlichowa chodźeše hač do kónca žiwjenja w serbskej narodnej drasće. Jana Wajdlicha wšak wšitcy na serbskich wsach znajachu. Ze swojej młóćawu bě wón w lěću po puću, zo by małoratarjam žito wu­młóćił. Nažel jeho Weronika z wosom lětami hižo zhubi. Maćeri wona po šuli pomhaše, warješe wobjed a w klóštrje ćelata sobu picowaše. Wuchodźiwši šulu chcyše so rady z wučerku stać, štož pak móžno njebě. Tak studowaše na fachowej šuli w Drježdźanach pedagogiku a sta so z kubłarku w žłobiku.

Pančicy-Kukow (mbr/SN). Wćipne dźěći pěstowarnje w Pančicach-Kukowje, kotrejež nošer je Křesćansko-socialny kubłanski skutk (CSB), su minjene dny wobkedźbowali, što so na jich zahrodźe stawa. Tam nastajichu šef zahrodotwarskeje firmy „Gartenart“ Měrćin Kral a jeho sobudźěłaćerjo na hrajkanišću někotre nowe drjewjane nastroje, po kotrychž móža dźěći krosnować a balansować.

Zawčerawšim móžachu hrajkanišćo pěstowarnje swojemu zaměrej přepodać. Po zhromadnym spěwje su zamołwity za kubłanišća pola CSB Rony Škoda kaž tež Měrćin Kral a nawodnica pěstowarnje Petra Bačcyna banćik přetřihali. Dźěći na to hnydom nowe móžnosće wupruwowachu. Wosebje rězbarjeny krokodil jim wulke wjeselo wobradźa.

Budyšin. Mjeztym hižo 24. raz wotměje so jutře, sobotu, w Budyšinje nazymske chórowe spěwanje. Wot 15 hodź. předstaja so wjacore chóry w awli Schilleroweho gymnazija. Mjez nimi budźe chór Budyšin pod nawodom Michała Jancy.

Paduši w kupjeli

Kulow. Wospjet su so paduši do Kulowskeje kupjele zadobyli. Kaž dyrbjachu tam zawčerawšim zwěsćić, běchu njeznaći z kioska žiwidła a napoje w hódnoće 400 eurow pokradnyli. Nimo toho načinichu 500 eurow wěcneje škody.