Z wudaća: septembera 2018

Wjace hač 150 mótkow ma mjeztym sakski ministerski prezident Michael Kretschmer (CDU). Zawčerawšim je jich w Lipšćanskim zwěrjencu zetkał, hdźež witaše mjez druhim tež 13 nowych trójnikow a kwartet dweju holcow a hólcow Helen, Merle, Boas a Pepe. Wot lěta 1995 je sakski ministerski prezident awtomatisce čestny kmótr za trójniki hač do 14. žiwjenskeho lěta.

Rozhóršeny je tele dny britiski wonkowny minister Jeremy Hunt, kiž postorkuje so dla powěsće prezidenta Europskeje rady Donalda Tuska na internetnej plat­formje Instagram. Tam bě Tusk wobraz premierministerki Wulkeje Britaniskeje Theresy May před tykancowym bufetom wozjewił a k tomu napisał: Chceće tykanc? Bohužel pak njejsu hižo žanych wišnjow. Powěsć měrješe so přećiwo Wulkej Britaniskej, kotrejž wumjetuja sej hladajo na Brexit jenož to najlěpše wu­běrać.

Teorija, zo na suchej łužiskej pódźe jenož chójna rosće, hižo njepřitrjechi. Znajmjeńša płaći tole za lěsny wobwod, kotryž mjeztym hižo 18 lět swobodnemu knjezej Sebastianej von Rotenhan słuša. Nimo toho wobsedźi wón hišće lěsne přestrjenje wokoło Jabłońcy, Kromole a Mužakowa.

Z bliskosće Bamberga pochadźacy swobodny knjez je 69 lět stary, bě cyły čas swojeho žiwjenja lěsy wobsedźał, štož jeho powołanske žiwjenje charakterizowaše. Tež hospodarsce z jednym po cyłej Němskej najwjetšim drjewopředźěłacym předewzaću jeho tematika stajnje přewodźeše. Mjeztym ma bywši Bayerčan we Łužicy swoju domiznu a bydli w Ruśi (Reuthen). Wottam organizuje wón přetworjenje lěsa w Mužakowskim zahórku a je přewšo wuspěšny, wuslědki dźě su dotal spokojace. Wo tym zhonichu wopytowarjo 10. wodoweho a přirodoweho dnja njedawno w Grodkowskej wodarni. Regionalny zwjazk Nabu a tamniši zaměrowy wopłóčkowy zwjazk běštaj zarjadowanje zhromadnje přihotowałoj.

Na swoju kóždolětnu kubłansku jězbu poda so minjenu sobotu 29 čłonow župy „Jan Arnošt Smoler“ do Wojerec. 750. jubilej města bě dobra składnosć sej je ze serbskeho wida wotkryć. Nowinar a publicist Manfred Laduš skupinu cyły dźeń přewodźeše a wěcywustojnje wo stawi­znach a nastaću Wojerec rozprawješe. Něhdy bydlachu w měsće a wokoło njeho nimale jenož Serbja, hač na někotrych knježkow a zastojnikow, kiž běchu Němcy, ale wšitcy serbsce zrozumichu.

Dopołdnja běchu wobdźělnicy jězby w starym měsće po puću. Mjez druhim wobhladachu sej załoženski dom Domowiny. Referent skedźbni na stelu Wórše Lanzyneje hnydom pódla załoženskeho domu kaž tež na Serbsku studnju na torhošću, kotraž steješe něhdy w Budyšinje. Ducy po měsće wopytachu čłonojo Wjacsławkec drastowy dom a dźěchu po Dołhej hasy nimo ewangelskeje cyrkwje, kotraž bě kolebka serbskich ewangelskich cyrkwinskich dnjow. Dale Manfred Laduš wo znatych wosobinach města rozprawješe. Tak naspomni Konrada Zuseho a Brigittu Reimann, kotrejuž bě sam zeznał.

Na roli gmejny Njebjelčicy při Miłočanskej skale, kotrež bioratar Ignac Wjesela wotnaja, su sobotu dopołdnja Thomas Noack, Ruth Trinschert (wotprawa) a Uwe Asch z předewzaća Lausitzer Hoefeladen a towarstwa Kamjenjak 1 500 rostlinow miscan­thusa sadźeli. Te su trěbne za pokładźenje pódy z organiskej maćiznu, za twar z hlinu a za škit před słóncom. Foto: Feliks Haza

Njebjelčicy. Nošerske towarstwo za wólby do Serbskeho sejma Smy z.t., přeprošuje sobotu, 29. septembra, w 9 hodź. wšitkich kandidatow, přećelow, podpě­raćelow a zajimcow na wosebity wjeršk po puću k Serbskemu sejmej do Njebjelčanskeje Bjesady. Tam wotměje so dźěłarnička, na kotrejž wobjednaja wosebitosće a dušu serbskeho zhromadźenstwa. Dale zeznaja so z do zhromadnosće wjeducymi metodami při namakanju rozsudow. W druhim dźělu zarjadowanja wot 16 hodź. předstaja nominowace towarstwa swoje kandidatki a swojich kandidatow kaž tež mysle za přichodne dźěło Serbskeho sejma. Wjeršk dnja budźe wječorna předwólbna zabawa z live hudźbu kapały „Fünf an der Feier“ a ze serbskim hercom Jakubom Čornakom. Jědźe a napoje w přestawkach a wječor budu zaručene. Za čas dźěłarničkow wobsteji po potrjebje móžnosć za dohladowanje dźěći. K lěpšemu planowanju proša organizatorojo wo spěšne přizjewjenje e-mailnje pod adresu a wo informaciju, hač přińdu zajimcy cyły dźeń abo jenož chwilu a hač je dohladowanje dźěći trěbne.

Bjerwałd (SN). Při najwjetšim jězoru Sakskeje, Bjerwałdskim, su lětušu kupansku sezonu srjedź septembra zakónčili. Kaž hamtski nawoda towarstwa Krajinowy park Bjerwałdski jězor Roman Krautz zdźěli, su so tam w lětušej nimorjadnej sezonje tysacy domoródnych a turistow kupali a wólnočasne poskitki Hamor­skeje gmejny wužiwali. Dźakowano wurjadnemu zasadźenju pomocnikow, kaž wohnjowych wobornikow, kotřiž so wo wěstotu a porjad starachu, njeje minjenu sezonu k žanym wjetšim njezbožam dóšło. Roman Krautz pak na to skedźbnja, zo njeje po zakónčenju sezony kupanje w Bjerwałdskim jězoru we wupisanych wobłukach dowolene. Zjawne nuzniki su tuž zawrjene.

Na „kofej w třoch“

Budyšin (SN). Na zarjadowanju Budyskeho Serbskeho muzeja „kofej w třoch“ přednošuje jeho direktorka Christina Boguszowa jutře, srjedu, 26. septembra, w 15 hodź. wo temje „Žónske wobliča – wubrane podobizny z wuměłskeje zběrki Serbskeho muzeja“.

Předstaja protyku 2019

Kaž wšědnje słyšeše tež dźensa rano Hańža Rachelowa w swojim pyšnym tykowanym domje při Konječanskej kapałce zwón nowy dźeń witać. Dźensa pak klinčeše wón hišće rjeńšo hač hewak, wšako swjeći Hańža Rachelowa 90. narodniny.

Jubilarka narodźi so 25. požnjenca 1928 w Konjecach. Jeje starši staj ju kaž tež sydom sotrow a dweju bratrow narodnje a nabožnje derje kubłałoj. Wot- rostła je wona za čas swětoweje hospodarskeje krizy w skromnych poměrach. W Konjecach chodźeše narodninarka hač do lěta 1943 do šule. Wot toho časa nosy swěru katolsku narodnu drastu. 1950 wuda so na ćěslu Mikławša Rachelu, kiž je hižo 1985 zemrěł. Wobaj dźěłaštaj w ratarstwje.

Přidatne wudawki a dochody Rakečanskeje gmejny schwalili

Rakecy (JK/SN). Z přidatnymi dochodami a wudawkami Rakečanskeje gmejny mějachu so čłonojo tamnišeje gmejnskeje rady na swojim zašłym posedźenju zaběrać. Tak dyrbja lětsa přidatne pjenjezy za swoje lětne bilancy zaplanować. Spočatnje chcychu jenož bilancy za lěće 2013 a 2014 zdźěłać dać. Za to su trěbne wudawki schwalili. Po najnowšich informacijach zličbowanskeho zarjada wokrjesa, tak informowaše wjesnjanosta Swen ­Nowotny (CDU), maja pak lětsa tež hišće bilancy lětow 2015 a 2016 nastajić a pruwować dać.

Wo stawiznach torhošća

Wojerecy. We wobłuku lětušeje 750. róčnicy Wojerec přewjedźe tamniša domiznowědna towaršnosć jutře, srjedu, w 17 hodź. na žurli hrodu přednošk pod hesłom „Wojerecy – kajkež něhdy běchu“. Z historiskimi fotami a pohladnicami chcedźa so dopominać na stare torhošćo. Nimo radnicy mějachu tam něhdy tři hotele, apoteku, Klichec piwarnju a ­Röhrichtec drogeriju. Zastup płaći pjeć eurow.

Wodźerjo motorskich z přiwozom ze Sakskeje a z dalšich kónčin su minjenu sobotu zbrašenym wobydlerjam klóštra Marijineje hwězdy w Pančicach-Kukowje někotre rjane hodźinki wobradźili. Kaž kóžde lěto kónc septembra podachu so z nimi na wulět, kiž wjedźeše tónraz do Wjesela pola Minakała. Wobdźělili su so tohorunja serbscy jězdźerjo kaž Stani Suchi z mašinu typa MZ-ETZ 250. Foto: Feliks Haza