Z wudaća: póndźela, 19 nowembera 2018

Serbska zjawnosć njeje konstituowanje Serbskeho sejma jara na wědomje brała. W Slepom 17. nowembra 2018 nimo tójšto cuzych awtow ničo na to njepokazowaše, zo wotmě so w tamnišim Serbskim kulturnym centrumje runje njewšědny po­dawk. Tón historikarjo snano raz jako wu­znamny w serbskich stawiznach wopisuja. Mała rostlinka Serbski sejm dyrbi najprjedy rosć. Předsyda Krabatoweho towarstwa Reiner Deutschmann je mjez čłonami prěnjeho serbskeho parlamenta wo wutrajnosć wabił, zepěrajo so na nazhonjenja Samow w Norwegskej. Woni trjebachu něhdźe dźesać lět, zo běchu ze swojim zastupnistwom politice runohódny partner. Jeno sprawne a systematiske dźěło Serbskeho sejma móže k tomu wjesć, zo přez demokratiske wólby docpěta legitimacija tež akceptancu w serbskim ludźe a podpěra z njeho zdobywa. Proces to, wo kotrymž dźensa hišće nichtó njewě, kak dołho budźe trać. Axel Arlt

Brüssel (dpa/SN). Wonkowni ministrojo čłonskich statow EU su dźensa w Brüsselu wurjadny wjeršk w zwisku z wustupom Wulkeje Britaniskeje z EU přihotowali, kotryž ma so přichodnu njedźelu wotměć. Při tym dźěše wo nadrobnosće zrěčenja kaž tež wo ćežke nutřkopolitiske połoženje britiskeje premierministerki Theresy May a wo wotpowědne sćěhi.

Jan Bart sen. z Budyšina piše k wólbam Serbskeho sejma:

W swojim připisu k wólbam Serbskeho sejma (SN z 25. oktobra) skoržach, zo přemało wo kandidatach wěm, dokelž „njemóžeš z papjeru rěčeć“. – Připadnje zetkach so njedawno po serbskich kemšach w Hodźiju z jednym nětko wu­zwolenym čłonom noweho gremija.

W dobrej rozmołwje, w „žiwej konfrontaciji“, zeznach přichodneho sejmikarja jako zahoriteho zakitowarja serbšćinu spěchowacych idejow. Jeho słowa na papjerje (SN z 5. oktobra), „... WITAJ, 2plus a rěčne kubłanje za dorostłych kwantitatiwnje a kwalitatiwnje polěpšić“, dóstachu w naju rozmołwje hinašu wahu a wěrypodobnosć. To so tež w jeho swójbje wotbłyšćuje.

Hdyž su jeho sobuwojowarjo samsneje powahi a zwólniwi, čas a móc na dobro Serbstwa zasadźić, potom móžemy – tež hdyž sejm kritisce a wočakujo wobhladujemy – tola wjeseli a dźakowni być, zo so tu nowa horstka zmužitych ludźi spyta sobu na čoło stupić (přerězna staroba = 45,9 lět!).

Choćebuz (SN/MiR). Choćebuska decernentka za młodźinu, kulturu a socialne Maren Dieckmann wopyta zašły tydźeń serbske kubłanske institucije města Choćebuza. Přewodźała je ju zamołwita za serbske naležnosće města Ana Kosacojc-Kozelowa. Wopyt wjedźeše jej do Witaj-pěstowarnje „Mato Rizo“, kotraž je w nošerstwje Serbskeho šulskeho towarstwa. Dale stej byłoj w zakładnej šuli „Lutki“ a we Witaj-horće „Wjewjerčka“ kaž tež w Delnjoserbskim gymnaziju.

Wulka kermušna mjerwjeńca knježeše wčera popołdnju a nawječor na Radworskej nawsy. Natwarjene běchu tam karusel, budce za losowanje a třělenje kaž tež předawanski wóz. Wjele ludźi je składnosć wužiwało a ze znatymi a susodami pobjesadowało. Při temperaturach wokoło nule wšak bě horce wino najpožadaniše. Foto: Bosćij Handrik

Po tym zo je Serbskopazličanske karnewalowe towarstwo wčera tydźenja do noweje póstniskeje sezony startowało, dožiwi wone sobotu z wólbu noweho princa swój prěni wjeršk. A tón bě we wjacorym­ nastupanju chětro tur­bulentny.

Njebjelčicy (AKr/SN). Kaž kóžde lěto so tež sobotu w Njebjelčanskej „Bjesadźe“ prašachu, štó drje budźe lětsa nowy princ. Wšitko je dźě jara tajne. Kaž bě wot zamołwiteho za pytanje princa Chrystofa Cyža zhonić, bě lětsa jara ćežko zwólniweho za zastojnstwo namakać. Takrjec na posledni wokomik je wón tola kan­didata našoł. Na derje pjelnjenej žurli „Bjesady“ dožiwichu wopytowarjo najprjedy rjany a wotměnjawy program. Dźak wupraji prezident towarstwa Daniel Wätzig dotalnemu princowskemu porej Jensej I. a Sylviji I. kaž tež dźěćacemu princej Richardej za rjane lěto regentstwa. Kóžda bywša princesna dósta šerpu z lětoličbu a bywši princ dósta norsku kapu.

Wo komunalnej pawšali so dojednali, ale nic bjez kritiki

Hodźij (CK/SN). Tepjenje w swojim komunalnym twarskim zawodźe da Hodźijska gmejna ponowić. To je tamniša gmejnska rada na swojim zašłym posedźenju z jednym napřećiwnym hłosom wobzamknyła. Po tym zo bě wobwodny saznik dalše wužiwanje tepjenja zakazał, dokelž wotpłuny dowolenu hranicu překročowachu, dyrbja nětko nuznje jednać, rěka we wobkrućenju. Zarjadnistwo bě štyri firmy napominało, swoje podłožki wotedać. Dwě z nich, mjez nimaj jedna z Hodźija, stej nadawk pobrachowacych kapacitow dla wotpokazałoj. Skónčnje so radźićeljo rozsudźichu, nadawk we wob­jimje 21 000 eurow přepodać Budyskej firmje Gottlöber.

Bróžnja so wotpaliła

Wjelećin. Wjace hač 70 wohnjowych wobornikow wołachu wčera rano k hašenju do Wjelećina. Tam bě so z dotal njeznateje přičiny bróžnja palić započała. Płomjenja hrožachu na bydlenski dom přeskočić. Tomu pak wobornicy w dalokej měrje zadźěwachu. W bróžni so mjez druhim motorske typa Suzuki zniči. Škoda wučinja něhdźe 50 000 eurow.

Worklecy (CRM/SN). „Serbja, jich kral a kónc monarchije před sto lětami“ běše minjeny štwórtk tema přednoška z wobrazami Chróšćanskeho kapłana a wurjadneho stawiznarja dr. Jensa Buliša na žurli něhdyšeho hrodu, kiž připosłu­charstwo putaše. Katolski duchowny Jakub­ Bart-Ćišinski zbasni 1878 „Kralowsku hymnu sakskich Serbow“, a ewan­gelski kantor Korla Awgust Kocor ju zhudźbni. Wšitke šěsć štučkow zaspěwa rodźeny Worklečan Marek Rjelka a Hodźijski farar Christoph Rummel jeho na e-pianje přewodźeše. „Serbja wšak nje­česćachu sej jeno swojeho sakskeho krala, ale pěstowachu zdawna tež ekumenu, a to prjedy, hač bě tutón wuraz docyła znaty“, dr. Buliš k tomu přispomni. Wón rysowaše dom Wettinow jako „swojim“ Serbam přichileny, mjeztym zo bě to ­pola Hohenzollerow w Braniborskej cyle hinak, rěčnik doraznje wobkrući. Tež klóštraj­ Marijina hwězda a Marijiny doł běštej přez krala před sekularizaciju ­škitanej, ale Nowa Cala, jenički klóšter w Delnjej Łužicy (z kotrehož přińdźechu mjez druhim cistercienscy rjadnicy za hnadowne městno Róžant) bu zběh­njeny.

Kopańca, wokrjesna wyša liga

Wojerecy – SG Großnaundorf 3:1 (0:1)

TSV Połčnica – Motor Kumwałd 1:3 (0:0)

Bukecy – Hnašecy-Dobruša 1:0 (1:0)

LSV Hory – Módro-běli Kulow wupad

Sokoł Ralbicy/Hórki – Budyšin 3:1 (0:0)

Radwor – Kinspork/Łužnica 1:1 (1:0)

Němske Pazlicy – Porchow 1:1 (0:0)

Ramnow – Rakečanske ST 1:0 (1:0)

1. Rakečanske ST 12 37 : 4 33

2. Módro-běli Kulow 11 24 : 11 24

3. Sokoł Ralbicy/Hórki 11 24 : 16 23

4. LSV Hory 12 26 : 19 21

5. Drohotka Ramnow 12 25 : 19 21

6. Póst Germania Budyšin 12 31 : 24 20

7. Natwar Němske Pazlicy 12 18 : 13 19

8. Motor Kumwałd 12 23 : 27 19

9. Wojerowski FC 12 29 : 20 18

10. ST Kinspork/Łužnica 12 19 : 20 16

11. TSV Połčnica 13 22 : 31 16

12. SG Großnaundorf 12 24 : 28 12

13. ST Hnašecy-Dobruša 11 20 : 24 11

14. Zeleno-běli Bukecy 12 16 : 41 10

15. ST Porchow 12 13 : 34 5

16. ST Radwor 12 12 : 32 2

sakski krajny pokal

Jednota Kamjenc – FSV Zwickau 1:4 (1:2)

Kamjeničanski FC – Biskopicy II 2:1 (1:1)

Laubegast – Budissa Budyšin 2:4 (1:1)

Fortuna Trjebin – Chemija Lipsk 3:6 (2:2)

po podlěšenju